নিজৰ শিক্ষাগত অৰ্হতাক লৈ প্ৰশ্ন উত্থাপন হোৱাৰ পাছতে এইবাৰ পোনপটীয়াকৈ প্ৰধানমন্ত্ৰী নৰেন্দ্ৰ মোদীক প্ৰত্যাহ্বান জনালে ‘কক্ৰ’চ জনতা পাৰ্টী’ৰ প্ৰতিষ্ঠাপক অভিজিৎ দিপকে। তেওঁৰ বষ্টন বিশ্ববিদ্যালয়ৰ শিক্ষাগত অৰ্হতাক লৈ সামাজিক মাধ্যমত চৰ্চা আৰম্ভ হোৱাৰ পাছত দিপকে কয় যে নিজৰ সকলো নথি, আনকি বৃত্তি লাভৰ চিঠিও ৰাজহুৱা কৰিবলৈ তেওঁ সাজু। কিন্তু তেওঁৰ প্ৰশ্ন–কেৱল তেওঁৰ ডিগ্ৰী কিয়, প্ৰধানমন্ত্ৰীয়েও নিজৰ শিক্ষাগত নথি ৰাজহুৱা কৰক।
দিপকেৰ মতে, তেওঁ আৰু প্ৰধানমন্ত্ৰীৰ শিক্ষাগত নথি একেলগে ৰাজহুৱা হ’লে বহুদিন ধৰি চলি থকা এই বিতৰ্কৰ অন্ত পৰিব। সামাজিক মাধ্যমত কৰা এক পোষ্টত তেওঁ প্ৰধানমন্ত্ৰী নৰেন্দ্ৰ মোদীক পোনপটীয়াকৈ উল্লেখ কৰি দুয়োৰে ডিগ্ৰী ৰাজহুৱা কৰাৰ প্ৰস্তাৱ আগবঢ়ায়।
দিপকে পূৰ্বতে আম আদমী পাৰ্টীৰ কৌশলবিদ হিচাপে কাম কৰিছিল। ২০২৬ চনৰ মে’ মাহত তেওঁ ‘কক্ৰ’চ জনতা পাৰ্টী’ প্ৰতিষ্ঠা কৰে। পৰীক্ষাৰ প্ৰশ্নকাকত ফাদিল, নিবনুৱা সমস্যা আদি বিষয়ক কেন্দ্ৰ কৰি ছাত্ৰ আন্দোলনৰ পৰিৱেশৰ মাজতে এই ব্যংগাত্মক ৰাজনৈতিক প্ৰচেষ্টাৰ আৰম্ভণি হৈছিল।
শেহতীয়াকৈ দিপকেৰ বষ্টন বিশ্ববিদ্যালয়ৰ শিক্ষাগত অৰ্হতাক লৈ সামাজিক মাধ্যমত বিভিন্ন প্ৰশ্ন উত্থাপন হয়। ইয়াৰ উত্তৰত তেওঁ এক্সত কৰা পোষ্টত কয় যে নিজৰ শিক্ষাগত নথি প্ৰকাশ কৰাত তেওঁৰ কোনো আপত্তি নাই। একে সময়তে তেওঁ প্ৰধানমন্ত্ৰী মোদীৰ শিক্ষাগত নথিও প্ৰকাশ কৰিবলৈ আহ্বান জনায়।
দিপকে লগতে দাবী কৰে যে সাধাৰণ লোকে প্ৰায় ১২ বছৰ ধৰি প্ৰধানমন্ত্ৰীৰ শিক্ষাগত অৰ্হতাৰ নথি নিজ চকুৰে চোৱাৰ অপেক্ষাত আছে। ২০১৪ চনৰ পৰা নৰেন্দ্ৰ মোদী দেশৰ প্ৰধানমন্ত্ৰী হৈ থকাৰ কথাকে ভিত্তি কৰি তেওঁ ১২ বছৰৰ উল্লেখ কৰে।
প্ৰধানমন্ত্ৰী মোদীৰ শিক্ষাগত অৰ্হতাক লৈ দিপকে ইয়াৰ পূৰ্বেও প্ৰশ্ন তুলিছিল। তেওঁৰ দাবী আছিল যে দিল্লী বিশ্ববিদ্যালয়ে আন বহু প্ৰতিষ্ঠানৰ দৰে নৰেন্দ্ৰ মোদীক ৰাজহুৱাভাৱে প্ৰাক্তন ছাত্ৰ হিচাপে প্ৰচাৰ নকৰে। অৱশ্যে এই বিষয়টো বহুদিন ধৰি ৰাজনৈতিক বিতৰ্কৰ অংশ হৈ আহিছে।
প্ৰধানমন্ত্ৰীৰ ডিগ্ৰীক লৈ বিতৰ্ক অৱশ্যে নতুন নহয়। প্ৰায় এটা দশক পূৰ্বে তেতিয়াৰ দিল্লীৰ মুখ্যমন্ত্ৰী অৰবিন্দ কেজৰিৱাল আৰু আম আদমী পাৰ্টীয়ে তথ্য জনাৰ অধিকাৰ আইনৰ অধীনত নৰেন্দ্ৰ মোদীৰ শিক্ষাগত নথি ৰাজহুৱা কৰাৰ দাবী তুলিছিল। তেওঁৰ স্নাতক আৰু স্নাতকোত্তৰ ডিগ্ৰীত অসামঞ্জস্য থকাৰ অভিযোগো তেতিয়া উত্থাপন হৈছিল।
ইয়াৰ পাছত তেতিয়াৰ বিজেপিৰ ৰাষ্ট্ৰীয় সভাপতি অমিত শ্বাহ আৰু কেন্দ্ৰীয় মন্ত্ৰী অৰুণ জেটলীয়ে সংবাদমেল আয়োজন কৰি মোদীৰ ডিগ্ৰীৰ প্ৰতিলিপি প্ৰকাশ কৰিছিল। তেওঁলোকৰ দাবী অনুসৰি, মোদীয়ে ১৯৭৮ চনত দিল্লী বিশ্ববিদ্যালয়ৰ পৰা বি এ আৰু ১৯৮৩ চনত গুজৰাট বিশ্ববিদ্যালয়ৰ পৰা এম এ সম্পূৰ্ণ কৰিছিল। একে সময়তে কেজৰিৱালক ভিত্তিহীন অভিযোগ উত্থাপনৰ বাবে ক্ষমা খুজিবলৈও দাবী জনোৱা হৈছিল।
পাছত এই বিষয়টো আদালতলৈ যায়। ২০২৫ চনৰ আগষ্ট মাহত দিল্লী উচ্চ ন্যায়ালয়ে কয় যে তথ্য জনাৰ অধিকাৰ আইনৰ গোপনীয়তা সম্পৰ্কীয় বিধান অনুসৰি শিক্ষাগত অৰ্হতা ব্যক্তিগত তথ্যৰ অন্তৰ্গত। সেয়ে দিল্লী বিশ্ববিদ্যালয়ে প্ৰধানমন্ত্ৰীৰ শিক্ষাগত নথি প্ৰকাশ কৰাটো বাধ্যতামূলক নহয় বুলি আদালতে মত প্ৰকাশ কৰে। এই ৰায়ৰ বিৰুদ্ধে বৰ্তমান খণ্ড বিচাৰপীঠত আবেদন দাখিল কৰা হৈছে আৰু পৰৱৰ্তী শুনানি এতিয়াও বাকী আছে।
ইফালে, অভিজিৎ দিপকেৰ এই নতুন প্ৰত্যাহ্বানক লৈ এতিয়ালৈকে প্ৰধানমন্ত্ৰীৰ কাৰ্যালয় অথবা বিজেপিৰ ফালৰ পৰা কোনো আনুষ্ঠানিক প্ৰতিক্ৰিয়া প্ৰকাশ পোৱা নাই।
