যোৱা ৩০ জানুৱাৰিত শিৱসাগৰৰ মাৰোৱাৰী পট্টীৰ আশাৰাম বাগৰী নামৰ ব্যৱসায়িক প্ৰতিষ্ঠানত চিলাৰায় দিৱসৰ বাবে বৰঙনি বিচাৰি যোৱা কোচ ৰাজবংশী ছাত্ৰ সন্থাৰ সদস্যক শাৰীৰিকভাৱে অপদস্থ কৰাৰ লগতে অসমীয়া জাতিক লৈ অপমান সুচক মন্তব্য কৰাক লৈ আজি পুনৰ নগৰখনত এক উত্তেজনাময় পৰিৱেশৰ সৃষ্টি হয়।
ঘটনা সন্দৰ্ভত আজি শিৱসাগৰ আৰক্ষীয়ে বীৰ লাচিত সেনাৰ শৃংখল চলিহা, আমছুৰ ইউনিচ তামুলী আৰু চিতু নামৰ তিনিগৰাকী যুৱকক গ্ৰেপ্তাৰ কৰি কাৰাগাৰলৈ প্ৰেৰণ কৰাক কেন্দ্ৰ কৰি বহুকেইটা দল-সংগঠনৰ নেতা কৰ্মীয়ে আদালতৰ চৌহদত অৰ্ধ উলংগ হৈ তীব্ৰ প্ৰতিবাদ সাব্যস্ত কৰে। সতীৰ্থক কাৰাগাৰলৈ প্ৰেৰণ কৰা কাৰ্য্যৰ প্ৰতিবাদত বীৰ লাচিত সেনাৰ নেতা কৰ্মীয়ে দ’লমুখ চাৰি আলিত অৱস্থান গ্ৰহণ কৰি পৰিৱেশ উত্তাল কৰি তোলে।
উল্লেখযোগ্য যে ৩০ জানুৱাৰিৰ ঘটনাৰ পিছতে ৰাইজৰ প্ৰতিবাদত আশাৰাম বাগৰীৰ স্বত্বাধিকাৰী পৱন বাগৰীক আৰক্ষীয়ে আটক কৰিছিল যদিও তেওঁ জামিনত মুক্তি লাভ কৰাৰ লগতে ঘটনা সন্দৰ্ভত শিৱসাগৰ আৰক্ষী থানাত এখন এজাহাৰ দাখিল কৰে। ইয়াৰ পিছতে দেওবাৰে শিৱসাগৰ আৰক্ষীয়ে সোধপোচৰ বাবে বীৰ লাচিত সেনাৰ শৃংখল চলিহা, বৃহত্তৰ অসমীয়া যুৱ মঞ্চৰ বিষ্ণু শইকীয়া, আমছুৰ ইউনিচ তামুলী আৰু ঐক্য সেনাৰ মুনু আহমেদক থানালৈ লৈ আনে।
এই চাৰি নেতাক আটক কৰাৰ পিছতেই বিভিন্ন দল সংগঠনৰ কেইবা শতাধিক সদস্য ৰাজপথলৈ ওলাই আহি নগৰৰ সকলো দোকান পোহাৰ বন্ধ কৰি দিয়াৰ উপৰি সন্ধিয়ালৈ নগৰখনৰ বিভিন্ন দল-সংগঠনৰ সদস্য তথা সচেতন ব্যক্তিৰ উপস্থিতিত দুয়ো পক্ষৰ মাজত বিষয়টো মীমাংসা কৰোৱা হয়।
সংগঠনৰ নেতাসকলে বাগৰীক থানাৰ ভিতৰতে ৰাজহুৱা ভাৱে ক্ষমা খোজোৱাই আৰু বাগৰীয়েও ৰাজহুৱাভাৱে ক্ষমা খোজে। আনহাতে এই সমস্ত ঘটনাৰ কেইবাটাও ভিডিঅ’ চচিয়েল মিডিয়াত বিয়পি পৰাত আজি শিৱসাগৰ জিলা আৰক্ষীয়ে নিজাববীয়াকৈ এক গোচৰ ৰুজু কৰি শৃংখল চলিহা, চিতু আৰু ইউনিচ তামুলীক গ্ৰেপ্তাৰ কৰি আদালতত হাজিৰ কৰায়। আদালতে তিনিওজনকে কাৰাগাৰলৈ প্ৰেৰণ কৰে।