কাৰ্বি আংলঙত থকা জনজাতিসকলৰ অস্তিত্বৰ প্ৰতি ভাবুকিৰ সৃষ্টি হোৱাৰ উদ্বিগ্নতা ব্যক্ত কৰি জিলাখনত নিজৰ অধিকাৰ সুৰক্ষিত কৰিবৰ বাবে কাৰ্বি আংলং স্বায়ত্ত পৰিষদৰ ভোটাৰ তালিকাৰ পৰা অজনজাতিসকলৰ নাম বাতিল কৰাৰ বাবে কাৰ্বি সংগঠনসমূহে দাবী জনাই অহাৰ বিপৰীতে জিলাখনৰ অজনজাতীয় সংগঠনসমূহেও অজনজাতীয়ৰ অধিকাৰ সুনিশ্চিত কৰিবৰ বাবে চৰকাৰৰ ওচৰত দাবী জনাইছে৷
ইপিনে জিলাখনত স্বায়ত্ত পৰিষদৰ নিৰ্বাচনৰ বাবে স্বায়ত্ত পৰিষদে নীতি নিৰ্ধাৰণ সমিতি গঠন কৰাৰ পাছতেই জিলাখনত বসবাস কৰা অজনজাতিসকল বিশেষভাৱে শংকিত হৈ পৰিছে।
সেয়েহে শনিবাৰে বিভিন্ন অজনজাতীয় সংগঠনৰ যৌথ উদ্যোগত বোকাজানত এক বিশাল প্ৰতিবাদী সমদল উলিওৱা হয়। অমৰাজানৰ আদিবাসী ছাত্ৰ সন্থাৰ কাৰ্যালয়ৰ সমুখৰ পৰা আৰম্ভ কৰা প্ৰতিবাদী সমদলে বিভিন্ন শ্ল’গানেৰে ৰাজপথ উত্তাল কৰাৰ পাছত শুকানজানত এক পথসভা অনুষ্ঠিত কৰে।
উক্ত পথসভাৰ পাছত বোকাজান মহকুমাৰ মহকুমাধিপতিৰ জৰিয়তে অসমৰ ৰাজ্যপাল আৰু মুখ্যমন্ত্ৰীলৈ পৃথকে পৃথকে এখন স্মাৰক-পত্ৰ প্ৰেৰণ কৰে ৷
অজনজাতীয় সংগঠনসমূহে স্মাৰক-পত্ৰখনৰ জৰিয়তে অতি শীঘ্ৰে কাৰ্বি স্বায়ত্ত পৰিষদৰ নিৰ্বাচনৰ নীতি নিৰ্ধাৰণ সমিতি ভংগ কৰিবলৈ দাবী জনাইছে। তদুপৰি, জিলাখনৰ অজনজাতিসকলৰ বিকাশৰ বাবে অজনজাতি আঞ্চলিক উন্নয়ন পৰিষদ গঠন কৰাৰ লগতে অজনজাতিসকলক জিলাখনত অতি শীঘ্ৰে মাটিৰ পট্টা প্ৰদান কৰিবলৈ দাবী জনায়।
আনহাতে, সংগঠনসমূহে তেওঁলোকৰ স্মাৰক-পত্ৰৰ প্ৰতিলিপি প্ৰধানমন্ত্ৰী, ৰাষ্ট্ৰপতি, যুটীয়া সংসদীয় সমিতিৰ অধ্যক্ষ তথা অসম মানৱ অধিকাৰ সুৰক্ষা সমিতিলৈকো প্ৰেৰণ কৰা বুলি জানিবলৈ দিয়ে৷