উত্তৰ কাছাৰ পাৰ্বত্য স্বায়ত্তশাসিত পৰিষদৰ নৰ্মাল কৰ্মচাৰীসকলৰ বাকী থকা দহ মাহৰ দৰমহাৰ কাৰণে শেহতীয়াকৈ অসম বিধান সভাৰ বাজেটত ৭৭ কোটি টকাৰ প্ৰস্তাৱ ৰখা হৈছ। উপৰোক্ত ধনৰাশি চৰকাৰে অহা দুই-তিনি দিনৰ ভিতৰত পাছ কৰিব আৰু ইয়াৰ পাছত নৰ্মাল কৰ্মচাৰীসকলে বাকী থকা দহ মাহৰ দৰমহা এৰিয়াৰ হিচাবে লাভ কৰিব।
৬ অক্তোবৰত মাইবাঙ মহকুমাৰ হাজাদিচাৰ নাবলাইদিচাত বিজেপি দলৰ এখন কৰ্মী সমাৱেশৰ পাছত সাংবাদিকৰ আগত এই কথা সদৰী কৰে পৰিষদৰ চি ই এম দেৱলাল গাৰ্লোছাই।
তেওঁ কয় দৰমাহৰ সমস্যা ১৯৫২ চনৰ পৰা নহয়। নব্বৈৰ দশকৰ পৰাহে এই সমস্যাৰ সূত্ৰপাত হৈছে। প্ৰয়োজনতকৈ অধিক নিযুক্তিয়ে এই সমস্যাৰ সৃষ্টি কৰিছে।
উল্লেখযোগ্য যে কৰ্মী সমাৱেশখনত মুখ্য অতিথি হিচাপে উপস্থিত থাকে ৰাজ্যিক বিজেপি সভাপতি ৰঞ্জিত কুমাৰ দাস। লগতে থাকে ৰাজ্যিক বিজেপিৰ সাংগঠিনক সম্পাদক ফণীন্দ্ৰনাথ শৰ্মা, বিজেপি ডিমা হাচাও প্ৰ’ভাৰী ৰামকৃষ্ণ ঘোষ, জিলা বিজেপি সভাপতি নীপোলাল হোজাই, বিধায়ক বীৰভদ্ৰ হাগজেৰ, পৰিষদৰ অধ্যক্ষা ৰাণু লাংথাছা, ই এম ছেমুৱেল চাংছান, বিশ্বজিত দাউলাগুপু, থাইচ’দাও থাউচেন আদি।
ডিগেৰ মণ্ডল বিজেপিৰ উদ্যোগত আয়োজন কৰা এই কৰ্মী সমাৱেশত বক্তব্য আগ বঢ়াবলৈ গৈ ৰাজ্যিক বিজেপি সভাপতি ৰঞ্জিত কুমাৰ দাসে কয়, “বিজেপি দলে দেশজুৰি ৰাইজৰ উন্নয়নৰ হকে কাম কৰিছে আৰু অহা দিনতো কৰি যাব। মাথোঁ লাগে ৰাইজৰ সহযোগ।” তেওঁ লগতে কয় কংগ্ৰেছ দলে যোৱা এক দশকত হাজাদিচা, খেপ্ৰে, নাবলাইদিচা, ডিগেৰ আদি পিছপৰা অঞ্চলৰ উন্নয়নৰ হকে কোনো পৰিকল্পনাই গ্ৰহণ কৰা নাই। যাৰ কাৰণে ৰাইজৰ সাধাৰণ মৌলিক উপাদানখিনিও ইয়াত উপলব্ধ নহয়।
সমাৱেশত হাজাদিচা এলেকাৰ দুখীয়া ৰাইজৰ মাজত আয়ুষ্মান ভাৰত আঁচনিৰ অধীনত স্বাস্থ্য বীমাৰ কাৰ্ড বিতৰণ কৰা হয়। ৰাজ্যিক বিজেপিৰ সভাপতি ৰঞ্জিতকুমাৰ দাসে কয় যে এই কাৰ্ডৰ পৰা ৰাইজ যথেষ্ট উপকৃত হ’ব।
চি ই এম দেবলাল গাৰ্লোছাই কয়, “আমি প্ৰতিশ্ৰুতি নহয় কাম কৰাৰ বাবে প্ৰতিজ্ঞাবদ্ধ। আমি যোৱা দুই বছৰে কি কি কাম কৰিবলৈ সক্ষম হৈছো ইয়াৰ সাক্ষী ৰাইজ।”
গাৰ্লোছাই সিদিনা প্ৰাক্তন চি ই এম দেৱজিত থাউচেনৰ লগতে প্ৰাক্তন সাংসদ প্ৰকান্ত ৱাৰিচাৰ কঠোৰ সমালোচনা কৰি কয়, “ৰাইজে এওঁলোকক প্ৰত্যাখ্যান কৰিছে। অহা নিৰ্বাচনতো এওঁলোকক বিচাৰি পোৱা টান হ’ব।”
উল্লেখনীয় যে অহা মাহত উত্তৰ কাছাৰ পাৰ্বত্য স্বায়ত্তশাসিত পৰিষদৰ সাধাৰণ নিৰ্বাচন অনুষ্ঠিত হোৱাৰ কথা। যাৰ কাৰণে জিলাৰ বিভিন্ন প্ৰান্তত সভা-সমিতিত অংশ লৈ ফুৰিছে ৰাজ্যিক সভাপতি ৰঞ্জিতকুমাৰ দাস আৰু অন্যান্য বিজেপি নেতাই। জানিব পৰা মতে, সভাপতি ৰঞ্জিত দাস তিনি দিন ডিমা হাচাও জিলাত থাকিব।