বিগত কেইদিনমান আগতে আমাৰ এক প্ৰতিবেদনৰ যোগেদি আমি জখলাবন্ধাৰ দেৱসত্ৰ গাওঁৰ বিশুদ্ধ খোৱা পানী আঁচনিৰ এক বিধস্ত ৰূপ উদঙাই দেখুৱাইছিলো। বিশুদ্ধ খোৱা পানীৰ এই আঁচনিখন জখলাবন্ধা চিকিৎসালয়কে ধৰি দেৱসত্ৰ , বাণিপুৰ , সৰুভগীয়া, দয়াল চুক আদি গাওঁলৈ বিশুদ্ধ খোৱা পানীৰ যোগানৰ নামত বহু বছৰ ধৰি বিকল হৈ পৰি আছিল।
আনহাতে, পানী যোগানৰ আহিলা পাতি সমূহ মামৰে ধৰি পোত খাই থকাৰ বিপৰীতে পানী যোগানৰ কাৰ্যালয়টোও হাবিৰে আৱৰি এক ৰকম ভূত বাংলাত পৰিণত হৈছিল। এই সকলো বোৰ দেখি শুনিও বিভাগীয় কৰ্তৃপক্ষই চকুমুদা কুলিৰ ভাও জুৰি আছিল।
ইপিনে আমি নৰ্থইষ্ট নাওৰ পৰা দেৱসত্ৰ গাওঁৰ ৰাইজৰ অভিযোগ পাই উক্ত স্থান পৰিদৰ্শন কৰি সকলো তথ্য আমাৰ বাতৰিৰ যোগেদি সবিস্তাৰে প্ৰচাৰ কৰিছিলো আৰু তাৰ কেইমাহমানৰ পিছতে চৰকাৰ অৰ্থাৎ কলিয়াবৰ জনস্বাস্থ্য বিভাগৰ গা লৰিল। আজি কিছু দিন আগতে বিভাগীয় কৰ্তৃপক্ষই উক্ত পানী যোগান কেন্দ্ৰটো পুনৰ ন- ৰূপত কাৰ্যক্ষম কৰি ৰাইজক বিশুদ্ধ খোৱা পানীৰ যোগান ধৰিলে।
কিন্তু কথা হ’ল কেৱল দেৱসত্ৰ গাওঁতে যে এনে বিশুদ্ধ খোৱা পানীৰ হাহাকাৰ হৈছিল তেনে নহয় কলিয়াবৰত এতিয়াও এনে কিছুমান গাওঁ আছে য’ত এতিয়াও এটুপি বিশুদ্ধ খোৱা পানীৰ বাবে বহু লোকে হাহাকাৰ কৰি ৰৈছে। উদাহৰণস্বৰূপে কলিয়াবৰৰ শিলঘাটৰ মৰাপাট কলৰ পৰা ত্ৰিশূল ধাৰি সংযোগী লোকসকলে এতিয়াও এটুপি খোৱা পানীৰ বাবে হাহাকাৰ কৰি থাকে। তাৎপৰ্যপূৰ্ণভাৱে উক্ত এলেকাতো মহাবাহু ব্ৰহ্মপুত্ৰ নৈৰ পাৰতে অথচ উপযুক্ত খোৱা পানীৰ সুবিধাৰ পৰা বঞ্চিত।
তদুপৰি বিগত বৰ্ষত হাতীমূৰা কুকুৰাকটা বান্ধ ছিঙি কলিয়াবৰত হোৱা ভয়াবহ বানপানীৰ ফলত পূবথৰীয়াস্থিত পানী যোগান আঁচনিৰ বৈদ্যুতিক সৰঞ্জামসমূহ বিকল হৈছিল। কিন্তু আজি এবছৰে মেৰামতিৰ অভাৱত তেনেকৈয়ে পৰি ৰৈছে উক্ত পানী যোগান আঁচনিখন। ইপিনে বিভাগীয় কৰ্তৃপক্ষৰ কোনো কাণসাৰ নাই।
আনহাতে, দেৱসত্ৰৰ ৰাইজে নৰ্থ ইষ্ট নাওক ধন্যবাদ জনাই অনাগত দিন বোৰতো এনেদৰে ৰাইজৰ বৃহৎ সমস্যাসমূহৰ বিষয়ে বাতৰি পৰিবেশনৰ এই ধাৰা অব্যাহত ৰখাৰ বাবে অনুৰোধ জনায়।