আই এছ এলৰ চলিত সংস্কৰণৰ বাকী থকা মেচৰ বাবে নৰ্থ-ইষ্ট য়ুনাইটেড ক্লাবত চুক্তিবদ্ধ কৰা হৈছে কলম্বিয়ান চেণ্টাৰ বেক জেনেইলাৰ ৰিভাছ পেলাচিঅ’ছক। আজি নৰ্থ-ইষ্ট য়ুনাইটেড এফ চিৰ অফিচিয়েল ৱেবছাইটৰ জৰিয়তে ক্লাব কৰ্তৃপক্ষই এই কথা জানিবলৈ দিয়ে।
দলটোৰ ৰক্ষণ বিভাগত গুৰুত্বপূৰ্ণ দায়িত্ব গ্ৰহণ কৰি থকা ক্ৰোৱেছিয়াৰ অভিজ্ঞ খেলুৱৈ মিশ্লাভ কম’ৰস্কিৰ ঠাইত কলম্বিয়াৰ এইগৰাকী চেণ্টাৰ বেকক চুক্তিবদ্ধ কৰা হৈছে। উল্লেখ্য যে মিশ্লাভ যোৱা ৩০ জানুৱাৰিত বেংগালুৰু এফ চিৰ বিৰুদ্ধে খেলা খেলখনত বেয়াকৈ আঘাতপ্ৰাপ্ত হৈছিল।
কলম্বিয়াৰ চক’ৰ কুইব্দ’ত ১৯৮৮ চনৰ ১৮ মে’ত জন্মগ্ৰহণ কৰা ৰিভাছ পেলাচিঅ’ছে নৰ্থ-ইষ্ট য়ুনাইটেড দলত অন্তৰ্ভুক্ত হোৱাৰ পূৰ্বে কলম্বিয়াৰে মিল’নাৰিঅ’ছ ক্লাবৰ হৈ খেলিছিল। ইয়াৰ উপৰি তেওঁ চি এ চেৰ’, বয়েকা চিক’, এটলেটিকো হুইলা আদিৰ দৰে আগশাৰীৰ ক্লাবৰ হৈও ৰক্ষণ বিভাগৰ গুৰু দায়িত্ব পালন কৰিছিল।
উল্লেখ্য যে খেলপথাৰৰ বেক লাইনৰ পৰাই প্ৰতিপক্ষৰ শিবিৰত আক্ৰমণ কৰিব পৰা ক্ষমতাৰ বাবেই এইগৰাকী ৩০ বছৰীয়া কলম্বিয়ান চেণ্টাৰ বেকক ফুটবল জগতত পৰিচিত বুলি নৰ্থ-ইষ্ট য়ুনাইটেড এফ চি কৰ্তৃপক্ষই জানিবলৈ দিয়ে।