আজি খেলত নানামিলেও নৰ্থ-ইষ্ট য়ুনাইটেডে উত্তৰ-পূবৰ ফুটবল প্ৰেমীৰ বাবে কঢ়িয়াই আনিছে এটা বিশেষ সুখবৰ। দলটো চলিত পঞ্চম সংস্কৰণৰ আই এছ এল বা ইণ্ডিয়ান ছুপাৰ লীগৰ ছেমিত প্ৰৱেশ কৰিছে।
আজি জামছেদপুৰ আৰু চেন্নাইৰ খেল ড্ৰ হোৱাৰ লগে লগে দলটোৱে প্লে-অফত খেলাটো নিশ্চিত হয়। ১০ টা দলৰ প্ৰতিযোগিতাখনৰ শীৰ্ষ চাৰিলৈ উন্নীত হোৱাত নৰ্থ-ইষ্ট য়ুনাইটেডক প্ৰত্যাহ্বান জনাবৰ বাবে আজি জামেছেদপুৰক জয় অনিবাৰ্য্য আছিল যদিও ডিফেণ্ডিং চেম্পিয়ন তথা তালিকাৰ তলৰ ফালে থকা চেন্নাইৰ সৈতে ড্ৰ খেলিবলৈহে সক্ষম হয় দলটো।
একোখনকৈ খেল বাকী থকা অৱস্থাত নৰ্থ-ইষ্ট য়ুনাইটেডৰ পইণ্ট হয় ২৮ আৰু জামছেদপুৰৰ হয়গৈ ২৪। ফলত নিজৰ নিজৰ পৰৱৰ্তী খেলখত নৰ্থ-ইষ্ট য়ুনাইটেড হাৰিলেও আৰু জামছেদপুৰ জিকিলেও নৰ্থ-ইষ্ট য়ুনাইটেডক চতুৰ্থ স্থানৰ পৰা বিচ্যুত কৰিব নোৱাৰে।
গ্ৰুপ লীগৰ একোখনকৈ খেল বাকী থকা অৱস্থাত প্ৰথম তিনিটা দলৰ অৱস্থান ক্ৰমাগতভাৱে হ’ল – বেংগালুৰু এফ চি (পইণ্ট ৩৪), গোৱা (পইণ্ট ৩১) আৰু মুম্বাই এফ চি (পইণ্ট ৩০)।
উল্লেখযোগ্য যোৱাবাৰ নৰ্থ-ইষ্ট য়ুনাইটেডে একেবাৰে শেষত স্থান লাভেৰে গ্ৰুপ লীগৰ পৰাই বিদায় লৈছিল। কিন্তু এইবাৰ ডাচ্ছ প্ৰশিক্ষক এলকো স্কাটৰী (Eelco Schattorie) আৰু নাইজেৰিয়ান ফ’ৰৱাৰ্ড বৰ্থলমিউ অগবেচেৰ (Bartholomew Ogbeche) যুটিয়ে প্ৰথমৰ পৰাই দলটোক সঠিক গতিত আগুৱাই নিয়া দেখা গৈছে। এতিয়ালৈকে দুটা দলেই চেম্পিয়ন হৈছে। দল দুটা হ’ল- কলকাতা আৰু চেন্নাই- দুয়োটা দলেই দুবাৰকৈ জিকিছে খিতাপ। এইবাৰ দুয়োটা দলেই প্ৰতিযোগিতাৰ পৰা বাহিৰ হোৱাটো নিশ্চিত হোৱাত নতুন চেম্পিয়ন হোৱাটো নিশ্চিত হৈছে।
নৰ্থ-ইষ্ট য়ুনাইটেডৰ গ্ৰুপৰ বাকী থকা খেলখন আছে অহা ১ মাৰ্চত কেৰালাৰ বিৰুদ্ধে।