বিজেপি চৰকাৰ উত্থাপিত নাগৰিকত্ব বিধেয়কৰ বিৰুদ্ধে তীব্ৰ আন্দোলন গঢ়ি তোলা অসমৰ খিলঞ্জীয়া ৰাইজ এতিয়া আৰু অকলশৰীয়া নহয়। কাৰণ বিধেয়কখনৰ বিৰুদ্ধে আন্দোলনৰ বাবে ওলাই আহিছে সাতভনীৰ সন্তান।
নেচ’-ৰ উদ্যোগত বিধেয়কবিৰোধী ৰণলৈ টঙালি বান্ধিছে উত্তৰ-পূবৰ প্ৰত্যেক ৰাজ্যৰে ছাত্ৰ সংগঠন। আৰু এই আন্দোলন আৰম্ভ হ’ব অহা ২০ নৱেম্বৰৰ পৰা।
বুধবাৰে গুৱাহাটীৰ চহিদ ন্যাসত সংবাদমেলযোগে এই কথা সদৰী কৰে নেচ’ৰ অধ্যক্ষ চেমুৱেল জাইৰৱা প্ৰমুখ্যে নেতৃবৰ্গই।
২০ নৱেম্বৰত গুৱাহাটীত আৰম্ভ হ’ব লগা এই প্ৰতিবাদী কাৰ্য্যসূচীয়ে পৰৱৰ্তী সময়ত সামৰি ল’ব সমগ্ৰ উত্তৰ-পূব। ৩০ নৱেম্বৰত উত্তৰ-পূৰ্বাঞ্চলৰ সাতোখন ৰাজ্যৰ ৰাজধানীত বিধেয়ক বাতিলৰ দাবীত প্ৰতিবাদ কৰিব নেচ’ই।
আনহাতে সংসদৰ শীতকালীন অধিৱেশন আৰম্ভ হোৱাৰ সময়ত নতুন দিল্লীত বিধেয়কবিৰোধী আন্দোলন কৰিব সংগঠনটোৱে।
আছুৱে ইতিমধ্যে অসমত আৰম্ভ কৰাৰ দৰে উত্তৰ-পূবৰ প্ৰতিজন মন্ত্ৰী, বিধায়ক আৰু সাংসদক লগ ধৰি বিধেয়ক বিৰোধিতাৰ অনুৰোধ জনাব বুলিও নেচ’ৰ নেতৃত্বই সংবাদমেলত জানিবলৈ দিয়ে। নেচ’ৰ অংশীদাৰী প্ৰত্যেক ছাত্ৰ সংগঠনে নিজ নিজ ৰাজ্যত গ্ৰহণ কৰিব এই কাৰ্য্যসূচী। উত্তৰ-পূবৰ সকলো সাংসদক লৈ বিধেয়ক বিৰোধিতাৰ বাবে এক বৈঠকো অনুষ্ঠিত কৰিব বুলিও সংবাদমেলত জানিবলৈ দিয়ে সংগঠনটোৱে।
সংবাদমেলত নেচ’ৰ অধ্যক্ষ চেমুৱেল জাইৰৱাই কয়, ‘আমি এই বিধেয়কৰ বিৰোধিতা কৰি ইতিমধ্যে কেন্দ্ৰীয় গৃহ মন্ত্ৰী ৰাজনাথ সিং আৰু গৃহ ৰাজ্য মন্ত্ৰী কিৰেন ৰিজিজুক সাক্ষাৎ কৰি আমাৰ কথা জনাইছো। কিন্তু কোনো ফল পোৱা নগ’ল। এই বিধেয়কখন আইনত পৰিণত হ’লে উত্তৰ-পূবৰ জনগাঁথনিয়েই সলনি হৈ যাব। আমি ত্ৰিপুৰাৰ খিলঞ্জীয়া মানুহৰ অস্তিত্বৰ সংকট দেখিছো। অসমতো বহুকেইখন জিলা ইতিমধ্যে অ-খিলঞ্জীয়া লোকৰ কবলত পৰিছে। গতিকে এই বিধেয়ক গৃহীত হ’লে আমাৰ প্ৰতি আৰু ভাবুকি আহিব।’
২০১৫ চনত কেন্দ্ৰীয় চৰকাৰে জাৰি কৰা নাগৰিকত্বৰ জাননী, পাৰপত্ৰ জাননী আৰু দীৰ্ঘকালীন ভিজা প্ৰদানৰো বিৰোধিতা কৰিছে নেচ’ই।
সংবাদমেলত নেচ’ৰ উপদেষ্টা তথা সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্বল কুমাৰ ভট্টাচাৰ্য্যই কয়, ‘নাগৰিকত্ব সংশোধনী বিধেয়ক, নাগৰিকত্বৰ জাননী, পাৰপত্ৰ জাননী আৰু দীৰ্ঘকালীন ভিজা প্ৰৱৰ্তনেৰে কেন্দ্ৰীয় চৰকাৰে অবৈধভাৱে ভাৰতত প্ৰৱেশ কৰা বাংলাদেশীসকলক সুৰক্ষা প্ৰদান কৰিব বিচাৰিছে। যাৰদ্বাৰা উত্তৰ-পূবৰ খিলঞ্জীয়া মানুহৰ অস্তিত্বৰ প্ৰতি সংকট নমাই আনিব। কিন্তু কেন্দ্ৰীয় চৰকাৰক আমি ক’ব বিচাৰিছো ক’লকাতাৰ পাছত দেশৰ এটা অংশ আছে, যিটো ‘উত্তৰ-পূব’ আৰু এই উত্তৰ-পূবক বিদেশীৰ ‘চৰনীয়া পথাৰ’ বুলি নাভাবিব।’
কেন্দ্ৰীয় চৰকাৰে এই বিধেয়ক আৰু জাননীসমূহৰ জৰিয়তে ৰাষ্ট্ৰীয় নাগৰিক পঞ্জী উন্নীতকৰণ প্ৰক্ৰিয়াটোতে ব্যাঘাত জন্মাব বিচাৰিছে বুলিও তেওঁ লগতে অভিযোগ কৰে।
উত্তৰ-পূবৰ জন প্ৰতিনিধিসকলক খিলঞ্জীয়া ৰাইজৰ স্বাৰ্থ দলতকৈ আগত বুলি মনত ৰাখি আগবাঢ়িবলৈ ভট্টাচাৰ্য্যই আহ্বান জনায়।
