সুদীর্ঘ আঠাইশ বছৰৰ অন্তত ফিফা বিশ্বকাপৰ মূল পৰ্যায়লৈ যোগ্যতা অর্জন কৰিছে নৰৱেৰ ফুটবল দলে। ১৯৯৮ চনৰ পিছত এইবাৰহে দলটোৱে বিশ্বকাপৰ যুঁজত অৱতীৰ্ণ হ’ব। আর্লিং হালাণ্ড আৰু মার্টিন অ’ডেগার্ডৰ দৰে তাৰকা খেলুৱৈৰে গঠিত এই দলটো ইতিমধ্যে গৈ আমেৰিকাত উপস্থিত হৈছেহি।
খেলৰ উপৰিও অন্য এক বিশেষ কাৰণত নৰৱেৰ দলটোৱে এতিয়া সকলোৰে দৃষ্টি আকর্ষণ কৰিছে। খেলুৱৈসকলৰ শাৰীৰিক সুস্থতা আৰু পুষ্টিৰ প্ৰতি লক্ষ্য ৰাখি দলটোৱে নিজ দেশৰ পৰা প্ৰায় তিনিশ কিলোগ্ৰাম সতেজ মাছ আৰু এশ ষোল্ল কিলোগ্ৰাম পৰিমাণৰ তেওঁলোকৰ পৰম্পৰাগত ব্ৰাউন চীজ লগত লৈ গৈছে।
খেলুৱৈসকলে যাতে পৰিচিত আৰু স্বাস্থ্যসন্মত খাদ্য গ্ৰহণ কৰি খেলপথাৰত নিজৰ শ্ৰেষ্ঠ প্ৰদৰ্শন কৰিব পাৰে, তাৰ বাবে এই ব্যৱস্থা কৰা হৈছে। দলটোৰ লগত এৰন এস্পেলেণ্ড আৰু এৰিক টাফটে নামৰ দুজন পাকৈত ৰান্ধনিও গৈছে। আমেৰিকাৰ স্থানীয় বজাৰৰ খাদ্য সামগ্ৰীৰ ওপৰত ভৰসা নকৰি তেওঁলোকে নৰৱেৰ থলুৱা আৰু উন্নত মানৰ উপাদানসমূহ ব্যৱহাৰ কৰাটোহে উচিত বুলি বিবেচনা কৰিছে।
ৰান্ধনি দুগৰাকীৰ মতে, আধা টনৰো অধিক পৰিমাণৰ মাছ আৰু পনীৰ নৰৱেৰ পৰা সুদূৰ আমেৰিকালৈ কঢ়িয়াই নিয়াটো একেবাৰেই সহজ কাম নাছিল। তথাপিও খেলুৱৈসকলক পুষ্টিকৰ আৰু পৰিচিত সোৱাদৰ খাদ্য যোগান ধৰাৰ স্বাৰ্থত তেওঁলোকে এই প্ৰত্যাহ্বান গ্ৰহণ কৰিছে। অহা ষোল্ল জুন তাৰিখে ইৰাকৰ বিৰুদ্ধে অৱতীৰ্ণ হৈ নৰৱেই এইবাৰৰ বিশ্বকাপৰ যাত্ৰা আনুষ্ঠানিকভাৱে আৰম্ভ কৰিব।
