নৰৱেৰ এখন আগশাৰীৰ বাতৰি কাকতত ভাৰতৰ প্ৰধানমন্ত্ৰী নৰেন্দ্ৰ মোদীক এজন বাজীগৰ অৰ্থাৎ সাপ নচুওৱা মানুহ হিচাপে দেখুৱাই এটা কাৰ্টুন প্ৰকাশ কৰাৰ পিছৰে পৰা আন্তঃৰাষ্ট্ৰীয় পৰ্যায়ত এক তীব্ৰ বিতৰ্কৰ সৃষ্টি হৈছে। এই কাৰ্টুনটোক লৈ আফটেনপোষ্টেন নামৰ বাতৰি কাকতখনৰ বিৰুদ্ধে বৰ্ণবাদ, ঔপনিৱেশিক মানসিকতা আৰু ভাৰতক অপমান কৰাৰ গুৰুতৰ অভিযোগ উত্থাপন হৈছে। প্ৰধানমন্ত্ৰীগৰাকীৰ নৰৱে ভ্ৰমণৰ সময়ত এগৰাকী সাংবাদিকৰ প্ৰশ্নক কেন্দ্ৰ কৰি সৃষ্টি হোৱা উত্তেজনাৰ মাজতে এই বিতৰ্কিত কাৰ্টুনটো পোহৰলৈ অহাত পৰিস্থিতি অধিক উত্তপ্ত হৈ পৰিছে।
বুধবাৰে প্ৰকাশ পোৱা এই কাৰ্টুনটোত দেখা গৈছে যে প্ৰধানমন্ত্ৰী মোদীয়ে হাতত এডাল পেট্ৰ’ল পাম্পৰ পাইপ ধৰি আছে আৰু সেই পাইপডাল যেন এটা সাপৰ দৰে নাচি উঠিছে। ইয়াৰ লগতে প্ৰকাশ পোৱা এটা মতামত কেন্দ্ৰিক প্ৰবন্ধৰ শিৰোনাম আছিল এজন টেঙৰ আৰু অলপ আমনিদায়ক মানুহ। এই ছবিখন প্ৰকাশ পোৱাৰ পিছতে বহু লোকে অভিযোগ কৰিছে যে ই ভাৰতক গভীৰভাৱে অৱমাননা কৰিছে আৰু অতীতৰ সেই পুৰণি সাপুৰাৰ দেশ বুলি কৰা কুসংস্কাৰ তথা ইতিকিং পুনৰ ঘূৰাই আনিবলৈ চেষ্টা কৰা হৈছে।
প্ৰকৃততে এই বিতৰ্কৰ আৰম্ভণি হৈছিল নৰৱেৰ সাংবাদিক হেলে লেঙে কৰা এটা প্ৰশ্নৰ পৰা। নৰৱেৰ প্ৰধানমন্ত্ৰী জোনাছ গাহৰ ষ্টোৰৰ সৈতে এক যৌথ অনুষ্ঠানত অংশ লোৱাৰ সময়ত সাংবাদিকগৰাকীয়ে মোদীক সোধে যে তেওঁ কিয় বিদেশ ভ্ৰমণৰ সময়ত সাংবাদিকৰ প্ৰশ্নৰ উত্তৰ নিদিয়ে। এই প্ৰশ্নৰ ওপৰত প্ৰধানমন্ত্ৰী মোদীয়ে কোনো প্ৰতিক্ৰিয়া প্ৰকাশ কৰা নাছিল যদিও পৰৱৰ্তী সময়ত ভাৰতৰ বৈদেশিক পৰিক্ৰমা মন্ত্ৰালয়ে ইয়াৰ এক কঠোৰ উত্তৰ দিয়ে। ভাৰতীয় কূটনীতিবিদ চিবি জৰ্জে উক্ত সাংবাদিকগৰাকীৰ বক্তব্যৰ তীব্ৰ বিৰোধিতা কৰে।
এই কাৰ্টুনটো ছচিয়েল মিডিয়াত প্ৰকাশ পোৱাৰ লগে লগে বহু ভাৰতীয় আৰু প্ৰবাসী ভাৰতীয় নাগৰিকে নিজৰ ক্ষোভ উজাৰি দিয়ে। বহুতে মত প্ৰকাশ কৰে যে এই ধৰণৰ ছবিয়ে কেৱল প্ৰধানমন্ত্ৰীক নহয়, বৰঞ্চ সমগ্ৰ ভাৰতবৰ্ষকে অপমানিত কৰিছে। তেওঁলোকৰ অভিযোগ যে নৰৱেৰ কাকতখনে ঔপনিৱেশিক যুগৰ সেই পুৰণি ধাৰণা সাৰোগত কৰি ভাৰতক এতিয়াও সাপ নচুওৱা বাজীগৰৰ দেশ হিচাপে দেখুৱাবলৈ চেষ্টা কৰিছে, যিটো কেৱল বৰ্ণবাদীয়েই নহয়, সাংস্কৃতিকভাৱেও অত্যন্ত অসন্মানজনক।
সমালোচকসকলৰ মতে এগৰাকী সাংবাদিকৰ প্ৰশ্নক লৈ সৃষ্টি হোৱা বিতৰ্কক সাৰ-পানী দি নৰৱেৰ সংবাদ মাধ্যমে এনেধৰণৰ কাৰ্টুন প্ৰকাশ কৰি উদ্দেশ্যপ্ৰণোদিতভাৱে পৰিস্থিতি অধিক জটিল কৰি তুলিছে। অৱশ্যে আন একাংশৰ মতে ৰাজনৈতিক ব্যংগচিত্ৰ প্ৰকাশ কৰাটো পশ্চিমীয়া সংবাদ মাধ্যমৰ এক পুৰণি ৰীতি, কিন্তু এই ক্ষেত্ৰত বৰ্ণবাদী ইংগিত থকাটো কোনো কাৰণতে অস্বীকাৰ কৰিব নোৱাৰি। যদিও নৰৱেৰ বাতৰি কাকতখনে এতিয়ালৈকে এই সন্দৰ্ভত কোনো আনুষ্ঠানিক প্ৰতিক্ৰিয়া প্ৰকাশ কৰা নাই, তথাপিও মুক্ত চিন্তা আৰু মত প্ৰকাশৰ স্বাধীনতাৰ নামত বৰ্ণবাদ বিয়পাব পাৰিনে বুলি আন্তঃৰাষ্ট্ৰীয় মহলত প্ৰশ্ন উঠিছে। একে সময়তে এনে কাৰ্টুনে দুই দেশৰ কূটনৈতিক সম্পৰ্কত অপ্ৰয়োজনীয় চাপৰ সৃষ্টি কৰিব পাৰে বুলিও আশংকা কৰা হৈছে।
