বলীউডৰ অভিনেত্ৰী জেকলিন ফাৰ্ণাণ্ডেজৰ বাবে সমস্যা যেন ক্ৰমান্বয়ে বৃদ্ধি পাইছে। ২০০ কোটি টকাৰ ধনৰ অবৈধ লেনদেনৰ গোচৰত জেকলিনে চৰকাৰী সাক্ষী হোৱাৰ বাবে আদালতত যি আবেদন জনাইছিল, এনফৰ্চমেণ্ট ডাইৰেক্টৰেট চমুকৈ ইডিয়ে তাৰ তীব্ৰ বিৰোধিতা কৰিছে। সোমবাৰে আদালতত কেন্দ্ৰীয় সংস্থাটোৱে স্পষ্টকৈ কয় যে জেকলিন কোনো ভুক্তভোগী নহয়, বৰঞ্চ তেওঁ সুকেশ চন্দ্ৰশেখৰৰ অপৰাধমূলক ইতিহাসৰ বিষয়ে সকলো জানিছিল। ইডিৰ মতে, সুকেশৰ প্ৰকৃত পৰিচয় জনাৰ পাছতো অভিনেত্ৰীগৰাকীয়ে তেওঁৰ সৈতে সম্পৰ্ক বজাই ৰাখিছিল আৰু সুকেশে অবৈধভাৱে উপাৰ্জন কৰা ধনেৰে বিলাসী উপহাৰ গ্ৰহণ কৰিছিল।
ইডিয়ে আদালতত দাখিল কৰা যুক্তি অনুসৰি জেকলিন আৰু তেওঁৰ পৰিয়ালৰ সদস্যসকলে জানি-শুনি এই অপৰাধৰ ধনৰ সুবিধা লৈছিল। সুকেশে যিবোৰ ধন ঠগি আনিছিল, সেই ধনেৰে জেকলিনক বহু দামী উপহাৰ দিছিল আৰু অভিনেত্ৰীগৰাকীয়ে সেইবোৰ উপভোগ কৰিছিল।
সংস্থাটোৰ মতে এয়া কেৱল এটা সম্পৰ্ক নাছিল, বৰঞ্চ জেকলিনে জানি-শুনি ধনৰ অবৈধ লেনদেন প্ৰক্ৰিয়াত সক্ৰিয়ভাৱে অংশগ্ৰহণ কৰিছিল। ইডিয়ে কয় যে জেকলিনে নিজকে নিৰ্দোষী বুলি দাবী কৰিলেও তেওঁৰ বিৰুদ্ধে থকা তথ্য-প্ৰমাণে আন এক কাহিনীহে কয়।
আনহাতে জেকলিন ফাৰ্ণাণ্ডেজে এই সকলো অভিযোগ অস্বীকাৰ কৰি আহিছে। তেওঁ আদালতত কয় যে সুকেশে নিজকে এজন প্ৰতিষ্ঠিত ব্যৱসায়ী বুলি পৰিচয় দি তেওঁক বিপথে পৰিচালিত কৰিছিল। অভিনেত্ৰীগৰাকীৰ মতে সুকেশে তেওঁৰ আৱেগৰ সৈতে খেলা কৰিছিল আৰু তেওঁৰ জীৱনটো অতি কষ্টকৰ কৰি তুলিছিল। জেকলিনে কয় যে এই সমগ্ৰ ঘটনাই তেওঁৰ কেৰিয়াৰ আৰু জীৱিকাৰ যথেষ্ট ক্ষতি কৰিছে। কিন্তু ইডিয়ে তেওঁৰ এই মন্তব্য গ্ৰহণ কৰিবলৈ মান্তি হোৱা নাই আৰু ২০২২ চনৰ আগষ্ট মাহতে দাখিল কৰা অভিযোগনামাত তেওঁক এজন সহ-অভিযুক্ত হিচাপে নাম অন্তৰ্ভুক্ত কৰিছে।
উল্লেখ্য যে সুকেশ চন্দ্ৰশেখৰৰ বিৰুদ্ধে ৰানবাক্সীৰ প্ৰাক্তন প্ৰসাৰকৰ পত্নীক ২০০ কোটি টকা প্ৰৱঞ্চনা কৰাৰ গুৰুতৰ অভিযোগ আছে। চৰকাৰী বিষয়াৰ পৰিচয় দি সুকেশে জেলৰ পৰা জামিন দিয়াৰ নামত এই বৃহৎ পৰিমাণৰ ধন সংগ্ৰহ কৰিছিল। বৰ্তমান কাৰাগাৰত থকা সুকেশে জেকলিনক নিজৰ প্ৰেমিকা বুলি দাবী কৰি আহিছে যদিও জেকলিনে তাক অস্বীকাৰ কৰি আহিছে। ইডিয়ে এই সমগ্ৰ বিষয়টোত অধিক তথ্য দাখিল কৰিবলৈ আদালতৰ পৰা সময় বিচাৰিছে আৰু অভিনেত্ৰীগৰাকীৰ চৰকাৰী সাক্ষী হোৱাৰ আবেদন নাকচ কৰিবলৈ জোৰ দিছে।
