গোলাঘাট নগৰত সম্প্ৰতি দ্ৰুতগতিত বৃদ্ধি পাইছে চুৰি ঘটনা। নগৰখনত আৰক্ষীৰ নিৰাপত্তাক ভেঙুচালি দেখুৱাই ১৫ ফেব্ৰুৱাৰিত দিনদুপৰতে নগৰৰ মাজমজিয়াৰ পৰা দুৰ্বৃত্তই লুটি নিয়ে ছয় লক্ষাধিক টকা। নগৰখনৰ সদা ব্যস্ত কলেজ তিনিআলিত অৱস্থিত ‘সোণালীকা ট্ৰেক্টৰছ’ৰ ডিলাৰৰ সন্মুখত এই ঘটনা সংঘটিত হয়।
ঘটনাৰ বিৱৰণী মতে উক্ত ব্যৱসায়িক প্ৰতিষ্ঠানটোৰ গৰাকী পৰাগ শইকীয়াই দুপৰীয়া ব্যৱসায়িক লেনদেন সংক্ৰান্তত ব্যয়ৰ বাবে ৬ লাখ ৩৫ হাজাৰ টকা এটা বেগত লৈ ডিলাৰলৈ আহিছিল। টকাৰ বেগটো তেওঁৰ এ এছ ০৫ এফ ১১২২ নম্বৰৰ মেৰুণ ৰঙৰ এক্স ইউ ভি বাহনখনৰ আগছিটত ৰাখি গাড়ীখন তেওঁৰ ডিলাৰৰ সম্মুখত ৰাখি ডিলাৰৰ ভিতৰলৈ যায়।
উক্ত সময়তে এখন বাইকত অহা দুজন যুৱকে টকাখিনি লুট কৰি লৈ যায়। ইতিমধ্যে ডিলাৰটোৰ চি চি টি ভি কেমেৰাত বন্দী হোৱা দৃশ্যত বাইক চালকৰ লগত অহা যুৱক জনে গাড়ীৰ গ্লাছ ভাঙি টকাৰ বেগটো উলিয়াই অনা আৰু ইয়াৰ পিছতে দুয়ো দ্ৰুতবেগত পলায়ন কৰা স্পষ্টভাৱে দেখা গৈছে।
আনহাতে ঘটনা সন্দৰ্ভত গোলাঘাট আৰক্ষীক জনোৱাৰ পিছত আৰক্ষীয়ে তদন্ত আৰম্ভ কৰিছে যদিও বৰ্তমানলৈকে যুৱক দুজনৰ কোনো সম্ভেদ পোৱা নাই। দিন দুপৰতে ব্যৱসায়িক প্ৰতিষ্ঠানটোৰ সন্মুখৰ পৰাই চিনেমাৰ কায়দাৰে সংঘটিত উক্ত ধন লুটৰ ঘটনাই নগৰবাসীক সচকিত কৰি তুলিছে।
উল্লেখযোগ্য যে বিগত দুটা মাহত নগৰৰ বিভিন্ন স্থানৰ পৰা পঁচিশখনকৈ বুলেট চুৰি ঘটনা আৰু আজিৰ পৰা প্ৰায় পোন্ধৰ দিনৰ পূৰ্বে এজন ব্যক্তিৰ গাড়ীৰ গ্লাছ ভাঙি ৬০ হাজাৰ টকা লুট কৰি নিয়াৰ পিছত আজি পুনৰ নগৰৰ মাজমজিয়াত উক্ত ধন লুটৰ ঘটনাই সমগ্ৰ নগৰখনত আৰক্ষীৰ চৰম বিফলতাৰ ছবিখন পুনৰ উদঙাই দিছে।