যথেষ্ট সম্ভাৱনা থকা সত্ত্বেও অসমত শক্তিশালী আঞ্চলিকতাবাদৰ ধাৰা আগুৱাই নিয়াত অগপ ব্যৰ্থ হোৱাত এতিয়া আঞ্চলিকতাবাদত বিশ্বাসী ৰাজনৈতিক নেতাসকলৰ বাবে বিকল্প হোৱাৰ দৌৰত আছে কনৰাড চাংমা নেতৃত্বাধীন নেশ্যনেল পীপলছ পাৰ্টি। নাগৰিকত্ব সংশোধনী বিধেয়ক বিৰোধী আন্দোলনত উত্তৰ-পূবৰ ৰাইজৰ পক্ষত থাকি কনৰাড চাংমাই লোৱা সৱল স্থিতিৰ পাছত এতিয়া অসমত এন পি পিৰ গ্ৰহণযোগ্যতা বৃদ্ধি পোৱা দেখা গৈছে।
অগপই নিজৰ স্থিতিক লৈ দোধোৰ-মোধোৰত থকাৰ সময়তে কাইলৈ অৰ্থাৎ ৬ মাৰ্চত ৰাজ্যখনত আনুষ্ঠানিকভাৱে আত্মপ্ৰকাশ কৰিব এন পি পিয়ে।
উল্লেখযোগ্য যে যোৱা মেঘালয় বিধানসভা নিৰ্বাচনৰ পিছত ২০১৮ বৰ্ষৰ ৬ মাৰ্চতেই দলটোৱে মেঘালয়ত চৰকাৰ গঠন কৰিছিল আৰু কাইলৈ চৰকাৰখনৰো এটা বছৰ সম্পূৰ্ণ হ’ব। দলটোৱে নিজকে যদিও ৰাষ্ট্ৰীয় দল হিচাপে ঘোষণা কৰে, উত্তৰ-পূবৰ বাবে ই আঞ্চলিক চৰিত্ৰ বহন কৰা দল। মেঘালয়ত চৰকাৰ গঠন কৰাৰ উপৰি দলটোৰ বিধায়ক আছে মণিপুৰ, নাগালেণ্ড আৰু অৰুণাচলতো।
এই বৰ্ষপূৰ্তিৰ দিনটোতে মেঘালয়ৰ মুখ্য মন্ত্ৰী কনৰাড চাংমাৰ উপস্থিতিত অসমত দলটোৱে আনুষ্ঠানিকভাৱে আত্মপ্ৰকাশ কৰিব। ইয়াৰ লগতে গুৱাহাটীৰ গণেশগুৰিৰ কাহিলিপাৰা পথত দলটোৰ অসম ৰাজ্যিক কাৰ্যালয়ো উদ্বোধন কৰা হ’ব বুলি দলৰ অসমৰ আহ্বায়ক দিলীপ বৰাই আমাক জানিবলৈ দিছে।
এই উপলক্ষে গণেশগুৰিৰে গণেশ উদ্যানত এখন ৰাজহুৱা সভাও অনুষ্ঠিত কৰিব দলটোৱে। সভাখনত কনৰাড চাংমাৰ উপৰি মেঘালয়ৰ উপ মুখ্য মন্ত্ৰী প্ৰেষ্টন টেংচং, মন্ত্ৰী জেমচ চাংমা, দলটোৰ অসমৰ দায়িত্বত থকা থমাছ এ চাংমাকে ধৰি কেইবাজনো শীৰ্ষনেতা উপস্থিত থাকিব।
উল্লেখযোগ্য যে, দলটোৱে ইতিমধ্যে অসমত সদস্যভৰ্তিৰ কাম চলাই আছে। যোৱা ২১ ফেব্ৰুৱাৰিত অগপৰ উপ-সভাপতি হিচাপে পদত্যাগ কৰা দিলীপ বৰাই ২৩ ফেব্ৰুৱাৰিত এন পি পিত যোগদান কৰে। তেওঁক নতুন দলটোৱে ৰাজ্যিক আহ্বায়কৰ দায়িত্ব দিছে।
ইপিনে, লোকসভা নিৰ্বাচনৰ দিন চমু চাপি অহাৰ সময়ত আঞ্চলিক দল অগপই নিজৰ স্থিতি সুনিশ্চিত কৰিব পৰা নাই। দলটোৰ শীৰ্ষ নেতৃত্বৰ বিৰুদ্ধে ক্ষোভ উজাৰি দিলীপ বৰাৰ পাছতেই আজি অগপ এৰিছে তথ্য আৰু প্ৰচাৰ সম্পাদক তথা ৰাজ্যিক মুখপাত্ৰ আৰু ইস্তাহাৰ সমিতিৰ সদস্যৰ দায়িত্বত থকা দিৱস ফুকনে। তেওঁ কাইলৈ কনৰাড চাংমাৰ উপস্থিতিতে এন পি পিত যোগ দিয়াৰ পূৰ্ণ সম্ভৱনা আছে।
একেদৰে, অগপৰ উপৰি এ আই য়ু ডি এফ আৰু কেইবাটাও জাতীয়-জনগোষ্ঠীয় সংগঠনৰ নেতায়ো এন পি পিক অসমত ৰাজনৈতিক বিকল্প হিচাপে লোৱাৰ সম্ভাৱনা আছে। আনকি ৰাষ্ট্ৰীয় দলৰ প্ৰাৰ্থিত্ব বঞ্চিত দুই এজন সৰু-বৰ নেতাই দলটোৰ মজিয়াত ৰাজনৈতিক আশ্ৰয় লোৱাটোও আচৰিত হ’ব লগীয়া নহ’ব।