নুমলীগড় শোধনাগাৰ লিমিটেডে ২০২৫-২৬ বিত্তীয় বৰ্ষত উৎপাদনৰ ক্ষেত্ৰত এক নতুন অভিলেখ গঢ়িবলৈ সক্ষম হৈছে। শোধনাগাৰটোৰ এই ঐতিহাসিক প্ৰদৰ্শনৰ বাবে কেন্দ্ৰীয় পেট্ৰ’লিয়াম আৰু প্ৰাকৃতিক গেছ দপ্তৰৰ মন্ত্ৰী হৰদীপ সিং পুৰীয়ে বুধবাৰে এন আৰ এল কৰ্তৃপক্ষক আন্তৰিক অভিনন্দন জ্ঞাপন কৰে। এই সাফল্যক শোধনাগাৰটোৰ বাবে এক ঐতিহাসিক বৰ্ষ বুলি অভিহিত কৰি মন্ত্ৰীগৰাকীয়ে ইয়াৰ কাম-কাজৰ ভূয়সী প্ৰশংসা কৰে।
সামাজিক মাধ্যমযোগে মন্ত্ৰীগৰাকীয়ে প্ৰকাশ কৰা তথ্য অনুসৰি, সদ্যসমাপ্ত ২০২৫-২৬ বিত্তীয় বৰ্ষত এন আৰ এলে ৩,১১৩ টি এম টি (হাজাৰ মেট্ৰিক টন) খাৰুৱা তেল প্ৰক্ৰিয়াকৰণ কৰিবলৈ সক্ষম হৈছে। শোধনাগাৰটোৱে নিজৰ নিৰ্ধাৰিত ক্ষমতাৰ ১০৩ শতাংশ ব্যৱহাৰ কৰি এই চমকপ্ৰদ সফলতা অৰ্জন কৰিছে। উল্লেখযোগ্য যে, ক্ৰমাগত দ্বিতীয়টো বছৰৰ বাবে শোধনাগাৰটোৱে ইয়াৰ নিৰ্ধাৰিত ক্ষমতা অৰ্থাৎ বছৰি ৩০ লাখ মেট্ৰিকটনতকৈ অধিক উৎপাদন কৰিবলৈ সক্ষম হৈছে, যিয়ে প্ৰতিষ্ঠানটোৰ শক্তিশালী কাৰ্যক্ষমতা আৰু নিৰ্ভৰযোগ্যতাকে প্ৰতিফলিত কৰিছে।
এন আৰ এলৰ সমগ্ৰ কৰ্তৃপক্ষক অভিনন্দন জনাই কেন্দ্ৰীয় মন্ত্ৰী পুৰীয়ে কয়, “এটা ঐতিহাসিক বছৰৰ বাবে সমগ্ৰ এন আৰ এল কৰ্তৃপক্ষক অভিনন্দন। ২০২৫-২৬ বিত্তীয় বৰ্ষত ৩,১১৩ টি এম টি খাৰুৱা তেল প্ৰক্ৰিয়াকৰণ, ১০৩ শতাংশ ক্ষমতা ব্যৱহাৰ আৰু একেৰাহে দ্বিতীয় বছৰৰ বাবে এন আৰ এলে ইয়াৰ নিৰ্ধাৰিত ৩ এম এম টি পি এ (MMTPA) ক্ষমতাৰ ঊৰ্ধত চলিছে।” ইয়াৰ লগতে মন্ত্ৰীগৰাকীয়ে শোধনাগাৰটোৰ এল পি জি (LPG) উৎপাদন বৃদ্ধিৰ ওপৰতো বিশেষ আলোকপাত কৰে। কেৱল ২০২৬ চনৰ মাৰ্চ মাহতেই শোধনাগাৰটোৰ উৎপাদন ২২ শতাংশতকৈ অধিক বৃদ্ধি পাইছে বুলি তেওঁ জানিবলৈ দিয়ে। দেশক অতিৰিক্ত যোগানৰ প্ৰয়োজন হোৱা এক গুৰুত্বপূৰ্ণ সময়ত এই বৃদ্ধিয়ে ৰাষ্ট্ৰীয় শক্তিৰ প্ৰয়োজনীয়তা পূৰণত শোধনাগাৰটোৰ সঁহাৰিক প্ৰতিপন্ন কৰিছে।
এল পি জিৰ সমান্তৰালভাৱে শোধনাগাৰটোৱে মটৰ স্পিৰিট বা এম এছ (MS) উৎপাদনৰ ক্ষেত্ৰতো বাৰ্ষিক সৰ্বাধিক সীমা স্পৰ্শ কৰিছে, যিয়ে দেশৰ ইন্ধন যোগান ব্যৱস্থাক আৰু অধিক শক্তিশালী কৰি তুলিছে। নুমলীগড় শোধনাগাৰক কেৱল অসমৰ এক ঔদ্যোগিক একক হিচাপে গণ্য নকৰি ভাৰতৰ শক্তি সুৰক্ষাৰ ক্ষেত্ৰত এক গুৰুত্বপূৰ্ণ ভূমিকা পালন কৰা কৌশলগত ৰাষ্ট্ৰীয় সম্পদ বুলি মন্ত্ৰীগৰাকীয়ে আখ্যা দিয়ে।
