উচ্চ শিক্ষাৰ খেলিমেলি যেন শেষেই নহয়। NEET বিতৰ্কৰ পিছত এইবাৰ UGC NET জুনৰ পৰীক্ষাত চৰম বিশৃংখলতা! প্ৰশ্নকাকতত পোৱা একাধিক ভুল আৰু গুৰুতৰ বিসংগতিৰ বাবে তিনিটা বিষয় ইংৰাজী, বাণিজ্য আৰু সমাজবিজ্ঞানৰ পৰীক্ষা বাতিল কৰা হৈছে বুলি ৰাষ্ট্ৰীয় পৰীক্ষণ সংস্থাই (NTA) ঘোষণা কৰিছে। প্ৰাৰ্থীসকলৰ নিৰপেক্ষ আৰু সঠিক মূল্যায়নৰ স্বাৰ্থত এই তিনিটা বিষয়ৰ পুনৰ পৰীক্ষা ছেপ্টেম্বৰ মাহত অনুষ্ঠিত হ’ব বুলি আনুষ্ঠানিকভাৱে ঘোষণা কৰিছে সংস্থাটোৱে।
পৰীক্ষা শেষ হোৱাৰ পিছৰে পৰাই ইংৰাজী, কমাৰ্চ আৰু ছচিয়লজিৰ প্ৰশ্নকাকতক লৈ অভিযোগৰ পিছত অভিযোগ আহিবলৈ ধৰে। বিতৰ্ক বাঢ়ি অহাৰ লগে লগে এনটিএই সমগ্ৰ বিষয়টোৰ পুংখানুপুংখ তদন্তৰ বাবে এখন বিশেষ বিশেষজ্ঞ সমিতি গঠন কৰে।
প্ৰশ্নকাকতত পোৱা ভুলবোৰ ঠিক কি আছিল?
কমিটীৰ প্ৰতিবেদনত স্পষ্টকৈ উল্লেখ আছে যে প্ৰশ্নকাকত প্ৰস্তুত কৰাৰ ক্ষেত্ৰত চৰম গাফিলতি আৰু দায়িত্বহীনতাৰ প্ৰমাণ পোৱা গৈছে। তাত পোৱা ভুলৰ প্ৰকাৰসমূহ হ’ল:
- বিখ্যাত গৱেষক আৰু বিশেষজ্ঞসকলৰ বানানৰ গুৰুতৰ ভুল।
- বিখ্যাত কিতাপৰ শিৰোনামৰ বানান ভুল আৰু অস্পষ্ট।
- মূল প্ৰশ্নৰ গঠনত ভুল, ব্যাকৰণগত বিভ্ৰান্তি আৰু লিংগ আৰু বচনৰ ব্যৱহাৰৰ বিসংগতি।
- সুপ্ৰতিষ্ঠিত ধাৰণা বা তত্ত্ব প্ৰকাশৰ বাবে মনেসজা শব্দৰ ব্যৱহাৰ আৰু বিৰাম চিহ্নৰ যথেষ্ট ভুল ব্যৱহাৰ ।
- কেৱল সেয়াই নহয়, আগৰ বছৰবোৰৰ প্ৰশ্নকাকতৰ পৰা হুবহু বহু প্ৰশ্ন ৰিপিট বা পুনৰাবৃত্তি কৰা হৈছিল।
এনটিএই জনাইছে যে এই স্তৰৰ ভুলৰ পিছত এঞ্চাৰ কী (Answer Key) প্ৰত্যাহ্বানৰ পিছত কেৱল নিৰ্দিষ্ট প্ৰশ্নসমূহ বাতিল কৰিয়েই ইয়াৰ সমাধান সম্ভৱ নহয়। কাৰণ ই পৰীক্ষাৰ নিৰপেক্ষতা আৰু সঠিক মানদণ্ডৰ লগত আপোচ কৰে। সেয়ে সমগ্ৰ প্ৰশ্নকাকতখন নতুনকৈ প্ৰস্তুত কৰি পুনৰ পৰীক্ষা কৰাটোৱেই একমাত্ৰ উপায়।
পুনৰ পৰীক্ষাৰ নতুন সময়সূচী
ইংৰাজী – ৯ ছেপ্টেম্বৰ, ২০২৬ প্ৰথম শ্বিফট – পুৱা ৯:০০ বজাৰ পৰা দুপৰীয়া ১২:০০ বজালৈ
বাণিজ্য – ৯ ছেপ্টেম্বৰ, ২০২৬ দ্বিতীয় শ্বিফট – বিয়লি ৩:০০ বজাৰ পৰা ৬:০০ বজালৈ
সমাজবিজ্ঞান – ১০ ছেপ্টেম্বৰ, ২০২৬ – প্ৰথম শ্বিফট – পুৱা ৯:০০ বজাৰ পৰা দুপৰীয়া ১২:০০ বজালৈ
পৰীক্ষাৰ্থীৰ বাবে গুৰুত্বপূৰ্ণ তথ্য
এই তিনিটা বিষয়ৰ পৰীক্ষাৰ্থীয়ে পুনৰ পৰীক্ষাত অৱতীৰ্ণ হোৱাৰ বাবে কোনো অধিক বা অতিৰিক্ত মাচুল দিব নালাগে। পৰীক্ষাৰ চহৰ, নিৰ্দিষ্ট কেন্দ্ৰ আৰু এডমিট কাৰ্ড সম্পৰ্কীয় সকলো সবিশেষ শীঘ্ৰে এনটিএৰ অফিচিয়েল ৱেবছাইটত জাননীৰ জৰিয়তে অৱগত কৰা হ’ব।
বাকী ৮৪টা বিষয়ৰ ফলাফলত কি প্ৰভাৱ পৰিব?
এই তিনিটা বিষয়ৰ পুনৰ পৰীক্ষাৰ ফলত বাকী ৮৪টা বিষয়ৰ ফলাফল ঘোষণাত কোনো ধৰণৰ প্ৰভাৱ নপৰে বা পলম নহ’ব বুলি এন টি এয়ে আশ্বাস দিছে। যিবোৰ ৮৪টা বিষয়ৰ বাবে উত্তৰবহীৰ প্ৰত্যাহ্বান প্ৰক্ৰিয়া পূৰ্বতে সম্পূৰ্ণ হৈছে, সেইবোৰৰ ফলাফল সূচী অনুসৰি ঘোষণা কৰা হ’ব। জুনিয়ৰ ৰিচাৰ্চ ফেল’শ্বিপ (জে আৰ এফ), সহকাৰী অধ্যাপকৰ অৰ্হতা আৰু পি এইচ ডি নামভৰ্তিৰ বাবে ই-চাৰ্টিফিকেট প্ৰদানৰ কাম সময়মতে অব্যাহত থাকিব।
প্ৰাৰ্থীসকলক এডমিট কাৰ্ড সম্পৰ্কীয় আপডেট আৰু খবৰৰ বাবে নিয়মীয়াকৈ অফিচিয়েল ৱেবছাইটত চকু ৰাখিবলৈ পৰামৰ্শ দিয়া হৈছে।
