অন্য পিছপৰা শ্ৰেণী (OBC)ৰ প্ৰমাণপত্ৰ বাতিলৰ গোচৰত অহা মঙলবাৰে অন্তৱৰ্তীকালীন ৰায়দান দিব কলিকতা উচ্চ ন্যায়ালয়ে। বাদীসকলে এই গোচৰত ৰাজ্য চৰকাৰে কৰা সমীক্ষা প্ৰক্ৰিয়াৰ ওপৰত আপত্তি দৰ্শাই কয় যে ৰাজহুৱা জনগাঁথনিগত তথ্যৰ অবিহনেই বিভিন্ন সম্প্ৰদায়ক OBC হিচাপে চিনাক্ত কৰা হৈছে।
গোচৰীয়া পক্ষৰ মতে, আদালতৰ পূৰ্বৰ নিৰ্দেশনা মতে সমগ্ৰ ৰাজ্যজুৰি সামাজিক, অৰ্থনৈতিক আৰু পেচাগতভাৱে বিভিন্নতা থকা সকলো সম্প্ৰদায়ৰ মাজত এক বিস্তৃত সমীক্ষা চলোৱা হ’ব। কিন্তু ৰাজ্যখনে এই সমীক্ষা কেৱল জিলা ভিত্তিত কিছুমান পৰিয়ালৰ মাজতে সীমাবদ্ধ ৰাখিছে বুলি অভিযোগ উঠিছে। লগতে, বৰ্তমান OBC তালিকা আৰু পূৰ্বৰ তালিকাৰ মাজত সামান্য পাৰ্থক্য পৰিলক্ষিত হোৱা বুলি তেওঁলোকে দাবী কৰিছে।
আনহাতে, ৰাজ্য চৰকাৰে আদালতক অৱগত কৰিছে যে এই গোচৰৰ ফলত মহাবিদ্যালয়ত নামভৰ্তিৰ পৰা আৰম্ভ কৰি চৰকাৰী নিযুক্তি প্ৰক্ৰিয়া সম্পূৰ্ণৰূপে স্থগিত হৈ আছে। সোমবাৰে ৰাজ্য চৰকাৰে এই তথ্য উচ্চ ন্যায়ালয়ৰ ন্যায়াধীশ তপোব্ৰত চক্ৰৱৰ্তী আৰু ন্যায়াধীশ ৰাজশেখৰ মন্থাৰ গঠন কৰা দ্বৈত বিচাৰপীঠত দাখিল কৰে।
বাদীসকলৰ আন এটা গুৰুত্বপূর্ণ অভিযোগ হ’ল—তালিকাত অন্তৰ্ভুক্ত কৰা সম্প্ৰদায়বোৰক OBC হিচাপে ঘোষণা কৰিবলৈ কোনো সমীক্ষা নকৰাকৈ সিদ্ধান্ত গ্ৰহণ কৰা হৈছে। তেওঁলোকে আদালতক কয় যে, নতুনকৈ কোনো সম্প্ৰদায়ক OBC হিচাপে স্বীকৃতি দিবলৈ হ’লে, বিধানসভাত এক বিধেয়ক দাখিল কৰি আইনী প্ৰক্ৰিয়া অনুসৰণ কৰা বাধ্যতামূলক। কিন্তু ৰাজ্যখনে এতিয়ালৈকে তেনে কোনো বিধেয়ক দাখিল কৰা নাই। সেয়ে, এই নতুন OBC তালিকাৰ অধিসূচনাক বাতিল কৰাৰ অনুৰোধ জনাইছে বাদী পক্ষই।
আনহাতে, কেন্দ্ৰীয় চৰকাৰে আদালতক অৱগত কৰিছে যে, ৰাজ্য চৰকাৰে দিয়া তালিকাৰ পৰা ৰাষ্ট্ৰীয় পিছপৰা শ্ৰেণী আয়োগে ৩৫টা সম্প্ৰদায় বাদ দিছে। কেন্দ্ৰৰ মতে, লোকপিয়ল অবিহনে কোনবোৰ সম্প্ৰদায়ক OBC হিচাপে গণ্য কৰিব পাৰি, সেইটো নিৰ্ধাৰণ কৰা কঠিন। কেন্দ্ৰই লগতে জনাইছে যে অহা বছৰৰ পৰা লোকপিয়লৰ কাম আৰম্ভ হ’ব।
ৰাজ্য চৰকাৰে দাবী কৰিছে যে তেওঁলোকে বেঞ্চমাৰ্ক ভিত্তিত সমগ্ৰ ৰাজ্যজুৰি জৰীপ চলাইছে আৰু আদালতৰ নিৰ্দেশনাৰ আধাৰতেই প্ৰচাৰো কৰা হৈছে। কিন্তু এই গোচৰৰ ফলত শিক্ষা ক্ষেত্ৰত নামভৰ্তি আৰু নিযুক্তি সম্পূৰ্ণৰূপে থমকি পৰাৰ কথা চৰকাৰে আদালতত উত্থাপন কৰে। ন্যায়াধীশসকলে জাননী দিয়ে যে এই সমস্যা তেওঁলোকে বিবেচনাত লৈছে। তদুপৰি, নিম্ন আদালতসমূহত ন্যায়াধীশ নিযুক্তি দীঘলীয়া সময় ধৰি হোৱা নাই, অবসৰপ্ৰাপ্ত ন্যায়াধীশসকলৰ স্থানত নতুন নিযুক্তি নোহোৱাত কাম বন্ধ হৈ পৰিছে বুলি সদৰী কৰে।
উল্লেখযোগ্য যে, ২০২৪ চনৰ ২২ মে’ তাৰিখে আদালতে ৰায় দিছিল যে ২০১০ চনৰ পূৰ্বে যিসকল ৬৬টা সম্প্ৰদায় OBC তালিকাত আছিল, সেইসকলৰ প্ৰমাণপত্ৰহে বৈধ। ফলস্বৰূপে বাকী সকলো OBC প্ৰমাণপত্ৰ বাতিল কৰা হয়। এই ৰায়ক পুনৰীক্ষাৰ বাবে উচ্চতম ন্যায়ালয়ত আবেদন দিয়া হৈছিল যদিও, উচ্চতম ন্যায়ালয়ে সেই ৰায় স্থগিতাদেশ জাৰিকৰৰ্স হোৱা নাই। এতিয়া এই গোচৰ উচ্চ ন্যায়ালয়ত বিচাৰাধীন অৱস্থাত আছে আৰু অন্তৱৰ্তীকালীন আদেশ মঙলবাৰে ঘোষণা হ’ব বুলি আশা কৰা হৈছে।
