নিজৰ ওপজা দিনটোত দেওবাৰে অৰ্থাৎ ১৮ নৱেম্বৰত উত্তৰ পূব গ্ৰন্থমেলাৰ বাকৰিত দেখা গ’ল জনপ্ৰিয় কণ্ঠশিল্পী জুবিন গাৰ্গক।
উল্লেখযোগ্য যে ৪৬ সংখ্যক ওপজা দিনটোত উত্তৰ পূব গ্ৰন্থমেলাৰ বাকৰিত যুৱপ্ৰজন্মৰ হাৰ্টথ্ৰ’বগৰাকীয়ে নিজৰ জন্মদিন উদযাপন কৰে। জনপ্ৰিয় কণ্ঠশিল্পী গৰাকীয়ে উত্তৰ-পূব গ্ৰন্থমেলাৰ অনুষ্ঠানৰ মাজতে কেক কাটি নিজৰ জন্মদিন উদযাপন কৰে।
জন্মদিন উদযাপনস্থলীত জুবিন গাৰ্গৰ লগতে উপস্থিত থাকে জুবিন গাৰ্গৰ পিতৃ মহিনী মোহন বৰঠাকুৰ, পত্নী গৰিমা গাৰ্গ, বিশিষ্ট সাংবাদিক ফণীন্দ্ৰ কুমাৰ দেৱ চৌধুৰী, অনুৰাধা শৰ্মা পূজাৰীৰ লগতে বহুতো বিশিষ্ট ব্যক্তি।
উল্লেখযোগ্য যে জন্মদিন উপলক্ষে এই অনুষ্ঠানতে জুবিন গাৰ্গে নিজৰ কবিতা পুথি ‘পদ্য’ উন্মোচন কৰে। ইফালে জুবিনৰ অনুষ্ঠান চাবলৈ গ্ৰন্থমেলাৰ বাকৰিত ভিৰ কৰে শ-শ অনুৰাগীয়ে।
শিৱসাগৰ :
একেদৰে শিৱসাগৰৰ নাজিৰা ফেন ক্লাৱ আৰু শিৱসাগৰ সেউজী ধৰণী ধুনীয়াৰ উদ্যোগতো এক ব্যতিক্ৰমী কাৰ্যসূচীৰে দেওবাৰে জুবিন গাৰ্গৰ জন্মদিন উদযাপন কৰা হয়।
এই উপলক্ষে নাজিৰাস্থিত মানসিক বিকাৰগ্ৰস্ত ৰোগীক চিকিৎসা আৰু পুনৰসংস্থাপন প্ৰদান কৰা হিউমেন ৱেলফেয়াৰ চ’ছাইটি সংস্থাপন কেন্দ্ৰ ‘জ্যোতি’ত পালন কৰে জুবিন গাৰ্গৰ জন্মদিন।
শিল্পীজনৰ জন্মদিন উপলক্ষে কেন্দ্ৰটোত থকা ৰোগী সকলক গৰম কাপোৰ, মিঠাই বিতৰণ কৰাৰ লগতে তেঁওলোকক এসাঁজ ভাত খুৱাই। তাৰ পিছতেই ৰোগীসকলক লগত লৈ জুবিন গাৰ্গৰ জন্মদিনৰ কেক কাটে জুবিন ফেন ক্লাবৰ সদস্য সকলে।
অনুষ্ঠানটোত ‘জ্যোতি’ৰ সভাপতি ডা: নবীন চন্দ্ৰ ফুকন, সঞ্চালক নাছেৰ খান, প্ৰাক্তন অধ্যক্ষ ৰাজেন শৰ্মা, উপসভাপতি আব্দুল মুচ্ছবিৰ, জিয়াৰা ইছলাম, সাংবাদিক নবুল কোঁৱৰকে ধৰি কেইবাজনো গণ্যমান্য ব্যক্তি আৰু জুবিন ফেন ক্লাৱৰ সদস্যসকল উপস্থিত থাকে।