দল সলনিৰ সকলো দৃষ্টান্ত যেন ভাঙি-ছিঙি চূৰমাৰ হৈ পৰিল। প্ৰথমে মনোনয়ন দাখিল। তাৰপিছত দল ঠিক হ’ব! এনে আজৱ কাণ্ডত নিৰ্বাচনৰ দায়িত্বত থকা বিষয়াসকলৰ চকু কপালত উঠিল।
মোডী-শ্বাহৰ ৰাজ্য গুজৰাটৰ স্থানীয় নিৰ্বাচনত এজন প্ৰাৰ্থীয়ে এটাতকৈ অধিক দলৰ বাবে মনোনয়ন দাখিল কৰিছে। বিজেপি, কংগ্ৰেছ আৰু আম আদমী পাৰ্টি (আপ)ৰ বাবে দাখিল কৰিছে মনোনয়ন।
এই তিনিটা প্ৰতিদ্বন্দ্বী দলৰ বাবে মনোনয়ন দাখিল কৰা ব্যক্তিজন হৈছে ভৰত সিং ভাখালা। অঞ্চলটোত তেওঁৰ যথেষ্ট নাম আছে। তেওঁ ‘ভাৰত ভাই’ বুলি পৰিচিত। ইয়াৰ লগতে তেওঁৰ সঘনাই দল সলনি কৰাৰ অভ্যাস আছে। কংগ্ৰেছৰ পৰা আপ আৰু তাৰ পিছত পুনৰ বিজেপিত নাম লগাইছে।
যোৱা বিধানসভা নিৰ্বাচনত তেওঁ আপৰ টিকটত প্ৰতিদ্বন্দ্বিতা কৰি বিজেপিক কঠোৰ প্ৰত্যাহ্বান জনাইছিল। সন্মুখত এইবাৰ পৌৰসভা, পঞ্চায়ত আৰু তালুক পৰ্যায়ত নিৰ্বাচন গুজৰাটত। এই নির্বাচনত ‘ভৰত ভাই’ দহোদ জিলা পঞ্চায়তৰ পিপেৰো সমষ্টিৰ বাবে তিনিটা দলৰ হৈয়েই মনোনয়ন দাখিল কৰিছে৷ আৰু এই আজৱ ঘটনাই যথেষ্ট আলোড়নৰ সৃষ্টি কৰিছে।
যোৱা শুকুৰবাৰ আৰু শনিবাৰে মুঠ তিনিবাৰকৈ মনোনয়ন দাখিল কৰিছিল। প্ৰথম অৱস্থাত কাৰো দৃষ্টিগোচৰ হোৱা নাছিল। পিছত মনোনয়ন পত্ৰ পৰীক্ষা কৰি থাকোঁতে বিষয়াসকলৰ চকু কপালত উঠিল। পিপেৰো সমষ্টিৰ বাবে ১১খন মনোনয়ন পত্ৰ দাখিল কৰা হৈছে। ইয়াৰে ‘ভৰত ভাই’য়ে আপ, বিজেপি আৰু কংগ্ৰেছৰ বাবে তিনিখনকৈ মনোনয়ন দাখিল কৰিছে।
তেন্তে কোনটো দলৰ প্ৰাৰ্থী হ’ব পাৰে তেওঁ? জানিব পৰা মতে, নির্দিষ্ট সময়ৰ ভিতৰত ভাখালাক তেওঁলোকৰ প্রার্থী হিচাপে ঘোষণা কৰা দলটোৰ বাবে তেওঁ নির্বাচনত প্রতিদ্বন্দ্বিতা কৰিব৷ বাকী দুখন মনোনয়ন বাতিল হৈ যাব। এনে পৰিস্থিতিত মোডী ৰাজ্যৰ নির্বাচনী বিষয়াসকলৰ কাম-কাজক লৈও প্রশ্ন উত্থাপন হ’বলৈ আৰম্ভ কৰিছে৷
