ছত্তীশগড়ৰ ছুকমা জিলাত নক্সালবাদীৰ ভয়ংকৰ আক্ৰমণৰ সন্মুখীন হৈছে চিআৰপিএফ বাহিনীৰ জোৱান।
কোব্ৰা ২০৬ বেটেলিয়নৰ জোৱানসকল এই ভয়ংকৰ আক্ৰমণৰ সন্মুখীন হয়। এই আক্ৰমণত এজন চিআৰপিএফ কমাণ্ডো নিহত হোৱাৰ লগতে আন ১০জন জোৱান আহত হৈছে।
বাতৰি অনুসৰি, নিশা দহ বজাত চিআৰপিএফ বাহিনীটোৱে অভিযান চলাই ওভতাৰ পথত তাদমেটলা গাওঁৰ ওচৰত আই ই ডিৰ বিস্ফোৰণ ঘটে। ফলত এজন কমাণ্ডো নিহত হোৱাৰ উপৰি ১০জন জোৱান আহত হয়।
ছুকমাৰ আৰক্ষী অধীক্ষক কে এল ধ্ৰুবই এই আক্ৰমণৰ ঘটনাৰ সত্যতা স্বীকাৰ কৰিছে।
আহত জোৱানসকলক চিকিৎসাৰ বাবে হেলিকপ্টাৰেৰে ৰায়পুৰলৈ নিয়া হয়।
আনহাতে, বস্তাৰৰ আই জি সুন্দৰৰাজ পি’য়ে কয় যে জোৱানসকল জংঘলৰ পৰা উভতি আহিলেই এই বিষয়ে বিশদ তথ্য জানিব পৰা যাব।
বাতৰি অনুসৰি, শনিবাৰে তাদেমতলা অঞ্চলত সুৰক্ষা বাহিনীৰ এটা যৌথ দল নক্সালবাদীৰ বিৰুদ্ধে তালাচী অভিযানত গৈছিল।
ইয়াৰ মাজতে স্পাইক হলত পৰি কেইবাজনো জোৱান আহত হয়। একেই সময়তে আই ই ডি বিস্ফোৰণৰ খৱৰো পোৱা যায়। আহত জোৱানসকলক কোব্ৰা ২০৬বেটেলিয়নৰ জোৱান বুলি জানিব পৰা গৈছে।
