পুৰীৰ জগন্নাথ ৰথ যাত্ৰাৰ আনন্দময় মুহূৰ্তত বৰা দণ্ডা (গ্ৰেণ্ড ৰোড শ্ব)ত শোকৰ ছাঁ নামি আহিল। বৃহস্পতিবাৰে লক্ষাধিক লোকৰ ভিৰত ৰথ টানি অনাৰ সময়ত চৰম বিশৃংখলতাৰ সৃষ্টি হয়। ৰাইজৰ হেঁচাত প্ৰায় ১২০ জন ভক্তই শ্বাস-প্ৰশ্বাসজনিত সমস্যাত ভোগে। তেওঁলোকক ততাতয়াকৈ উদ্ধাৰ কৰি চিকিৎসাৰ বাবে পুৰী চিকিৎসা মহাবিদ্যালয়লৈ লৈ যোৱা হয়। এই ঘটনাত এজন ভক্তৰ মৃত্যু হোৱা বুলি জানিব পৰা গৈছে।
প্ৰত্যক্ষদৰ্শীয়ে জনোৱা মতে, বিপুল জনসমাগমৰ মাজত শ্বাসৰুদ্ধ হৈ এজন ব্যক্তি অচেতন হৈ পৰে। শীঘ্ৰে তেওঁক পুৰী জিলা সদৰ চিকিৎসালয়লৈ লৈ যোৱা হয় আৰু চিকিৎসকে তেওঁক মৃত ঘোষণা কৰে। অৱশ্যে এই মৃত্যু সন্দৰ্ভত এতিয়ালৈকে প্ৰশাসন বা আৰক্ষীয়ে কোনো চৰকাৰী বিবৃতি দিয়া নাই।
পৰিস্থিতি নিয়ন্ত্ৰণ কৰিবলৈ বিশেষ উদ্ধাৰ গোটে উদ্ধাৰ অভিযান আৰম্ভ কৰিছে। ভিৰৰ মাজত আবদ্ধ হৈ থকা লোকসকলক উলিয়াই অনাৰ উপৰি বৰা দণ্ডাত জনসমাৱেশৰ ক্ষেত্ৰতো কর্তৃপক্ষই নিষেধাজ্ঞা কটকটীয়া কৰিছে৷
উল্লেখযোগ্য যে দ্বাদশ শতিকাৰ মন্দিৰৰ পৰাই বৃহস্পতিবাৰে আৰম্ভ হৈছিল ভগৱান জগন্নাথ, বলোৰাম আৰু দেৱী সুভদ্ৰাৰ ৰথযাত্ৰা। ৰাতিপুৱাৰ পৰাই পুৰীত লক্ষাধিক ভক্তৰ সমাগম ঘটিছিল। শংখ, ঘণ্টা, কৰতলৰ শব্দৰ মাজতে সুভদ্ৰাৰ ‘দৰ্পদলন’ ৰথত চক্ৰৰাজ সুদৰ্শনক প্ৰথমে অনা হৈছিল। তাৰ পাছত দেৱী সুভদ্ৰাক ‘শুন্য পাহাণ্ডী’ৰ জৰিয়তে তেওঁৰ ৰথত অনা হ’ল। অৱশেষত ভগৱান জগন্নাথৰ ৰথযাত্ৰা আৰম্ভ হোৱাৰ লগে লগে ‘জয় জগন্নাথ’ৰ শব্দত মুখৰ হৈ পৰিল গোটেই বৰা দণ্ডা।
কিন্তু ৰথ যাত্ৰাৰ সেই শুভ মুহূৰ্তত ৰাইজৰ তীব্ৰ ভিৰৰ বাবে পৰিস্থিতি নিয়ন্ত্ৰণৰ বাহিৰলৈ গৈছিল। ভক্তসকলৰ উৎসাহ আৰু ৰথৰ চাৰিওফালে অত্যধিক জনসমাগমৰ বাবে বিশৃংখলতাৰ সৃষ্টি হয় আৰু পদপিষ্টসদৃশ পৰিস্থিতিৰ সৃষ্টি হয়। দুৰ্ঘটনাটোৰ পিছত মন্দিৰ কৰ্তৃপক্ষ আৰু প্ৰশাসনে নিৰাপত্তাৰ ব্যৱস্থা আৰু অধিক কটকটীয়া কৰিছে। জনসমাগম নিয়ন্ত্ৰণ আৰু অনাগত দিনকেইটাত এনেধৰণৰ অশুভ ঘটনাৰ পুনৰাবৃত্তি ৰোধ কৰিবলৈ জৰুৰীকালীন সতৰ্কতা জাৰি কৰা হৈছে।
