কলিয়াবৰৰ সোণাৰী গাঁৱৰ ৰে’লৱে ট্ৰেকত আজি পুৱাই প্ৰবীণ বৰদলৈ নামৰ এজন যুৱকৰ মৃতদেহ উদ্ধাৰ হয়। যুৱকজনক কোনো দুৰ্বৃত্তই হত্যা কৰাৰ সন্দেহ প্ৰকাশ কৰিছে পৰিয়ালৰ লোকে।
কোনো দুৰ্বৃত্তই নিশা যুৱকজনক হত্যা কৰি ৰে’লৱে ট্ৰেকত মৃতদেহটো পেলাই আত্মহত্যাৰ ৰূপ দিবলৈ চেষ্টা কৰা বুলি মৃত যুৱকজনৰ পৰিয়ালৰ লোকে অভিযোগ উত্থাপন কৰিছে। যিহেতু মৃত বৰদলৈৰ শৰীৰৰ কেইবাঠাইতো আঘাতৰ চিন স্পষ্ট হৈ আছে।
পিছত ঘটনাস্থলীত কলিয়াবৰৰ শিলঘাট আৰক্ষীৰ এটা দল উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে নগাওঁ অসামৰিক চিকিৎসালয়লৈ প্ৰেৰণ কৰাৰ লগতে ঘটনা সন্দৰ্ভত তদন্ত আৰম্ভ কৰিছে।
ইফালে স্থানীয় ৰাইজে ঘটনাটো হত্যাকাণ্ড বুলি সন্দেৰ প্ৰকাশ কৰিছে যদিও শিলঘাট আৰক্ষীয়ে মৰোনত্তৰ প্ৰতিবেদনত স্পষ্ট ৰূপত হত্যা নে আত্মহত্যা প্ৰতিফলিত হ’ব বুলি উল্লেখ কৰে। লগতে আৰক্ষীৰ বিভাগীয় তদন্তত উক্ত প্ৰতিবেদনে যথেষ্ট সহায় কৰিব বুলিও শিলঘাট আৰক্ষীয়ে জানিবলৈ দিয়ে।
