ৰাজ্যত সংঘটিত প্ৰায় ৫০০ কোটি টকীয়া বীমা কেলেংকাৰিত জড়িত থকাৰ অভিযোগত বৰপেটা আৰক্ষীয়ে সোমবাৰে আৰু এজন লোকক আটক কৰিছে ৷
আৰক্ষীয়ে আটক কৰা লোকজন হৈছে এল আই চিৰ এজেন্ট মধুসুদন ঠাকুৰীয়া। বৰপেটা জিলাৰ জনীয়াৰ মৃত নবাব আলীৰ নামত এল আই চিৰ এজেন্ট মধুসুদন ঠাকুৰীয়াই পলিচি কৰিছিল বুলি জানিব পৰা গৈছে ।
ৰাজ্য জোকাৰি যোৱা বীমা কেলেংকাৰিৰ অভিযোগত বৰপেটা আৰক্ষীয়ে এই পৰ্যন্ত দুগৰাকী চৰকাৰী চিকিৎসকসহ ১০জন লোকক গ্ৰেপ্তাৰ কৰিবলৈ সক্ষম হৈছে।
ইয়াৰ পূৰ্বে এই বীমা কেলেংকাৰিত দুগৰাকী চিকিৎসক ডাঃ শ্বহিদুল ইছলাম আৰু ডাঃ নুৰুল ইছলামক আৰক্ষীয়ে গ্ৰেপ্তাৰ কৰিছিল। তদুপৰি কেলেংকাৰিটোত জড়িত থকা ইছমাইল হুছেইন, একাব্বৰ আলী,মফিদা বেগম, আজিজুল হক, হৰমুজ আলী আৰু আমজাদ আলীৰ লগতে আৰু আন দুজন দালালক বৰপেটা আৰক্ষীয়ে গ্ৰেপ্তাৰ কৰিছিল।
উল্লেখযোগ্য যে ৰাজ্যখনত প্ৰৱঞ্চনাৰ জাল ৰচি এটা বৃহৎ চক্ৰই বিভিন্ন মৃত ব্যক্তিৰ নামত বীমাৰ পলিচি খুলি বিভিন্ন বীমা প্ৰতিষ্ঠানৰ পৰা কোটি কোটি টকা সৰকাইছে। এনে প্ৰৱঞ্চনাৰে বীমাৰ ধন সৰকোৱা ঘটনাই আৰক্ষীৰ বাবেও প্ৰত্যাহ্বানৰ সৃষ্টি কৰিছিল। এইক্ষেত্ৰত দৰং আৰু বৰপেটা জিলাত সৰ্বাধিক বীমা কেলেংকাৰি সংঘটিত হোৱাৰ কথা ইতিমধ্যে পোহৰলৈ আহিছে।
উল্লেখযোগ্য যে গুৱাহাটী উচ্চ ন্যায়ালয়ত দাখিল কৰা এখন ৰাজহুৱা স্বাৰ্থজড়িত আৱেদনত অলপতে ৰাজ্যখনত ইতিমধ্যে প্ৰায় ৫০০ কোটি টকাৰ বীমা কেলেংকাৰি সংঘটিত হোৱাৰ তথ্য পোহৰলৈ আহিছিল।