শিৱসাগৰ জিলা জয়সাগৰ আৰক্ষী চকীৰ অন্তৰ্গত ৰূদ্ৰসাগৰ গাঁৱৰ ঐতিহাসিক পুৰণি পুখুৰীৰ সৰ্মীপত এ টি ৰোডত আজি সন্ধ্যা সংঘটিত হোৱা এক পথ দুৰ্ঘটনাত এজন লোক নিহত হয়। নিহত লোকজন গৌৰীসাগৰৰ সমীপৰৰ নামদাঙৰ নন্দেশ্বৰ দাস( ৫৩) বুলি জানিব পৰা গৈছে।
ঘটনাৰ বিৱৰণী মতে এ এছ ০৪ জে ২৭১৩ নম্বৰৰ মটৰচাইকেলখনৰে নিহত নন্দেশ্বৰ দাস নামৰ ব্যক্তিজনে পত্নীৰ সৈতে শিৱসাগৰ নগৰৰ দিশৰপৰা ঘৰলৈ বুলি আহি আছিল। ঠিক সেই সময়তে বিপৰীত দিশৰ পৰা তীব্ৰ বেগত আহি থকা এখন মটৰচাইকেলে দাসৰ মটৰ চাইকেলখনত খুন্দা মাৰি দিয়াত দাস দম্পতী মটৰচাইকেলসহ পথৰ ওপৰতে বাগৰি পৰি গুৰুতৰভাৱে আহত হয়।
আনহাতে ঘটনা সংঘটিত কৰি বিপৰীত দিশৰ পৰা অহা মটৰচাইকেলসহ চালকজন পলায়ন কৰে। পিছত ঘটনাস্থলীত উপস্থিত হোৱা স্থানীয় ৰাইজে জয়সাগৰ আৰক্ষীক খবৰ দিয়াত আৰক্ষীয়ে উদ্ধাৰ কৰি আহত দম্পতীহালক ততাতৈয়াকৈ শিৱসাগৰ অসামৰিক চিকিৎসালয়লৈ নিয়ে।
কিন্তু দুৰ্ভাগ্যজনকভাৱে চিকিৎসালয়তে নন্দেশ্বৰ দাস নামৰ ব্যক্তিজনে মৃত্যুক সাবটি লয়। নিহত নন্দেশ্বৰ দাস পেছাত এজন শিক্ষক আছিল।
মৃত্যুৰ সময়ত তেওঁ পত্নীসহ এজন পুত্ৰ আৰু চাৰিগৰাকীকৈ কন্যা ইহসংসাৰত এৰি থৈ যায়।