ৰাজ্যৰ চৌদিশে ফাকুৱাৰ আনন্দ উল্লাসৰ মাজতেই বৃহস্পতিবাৰে নিশা প্ৰায় ৯ বজাত শিৱসাগৰৰ আখৈখুটীয়াৰ বাঢ়ৈটিঙত সংঘটিত এক পথ দুৰ্ঘটনাত এজন যুৱকৰ মৃত্যু হয়। ঘটনা বিৱৰণী মতে বন্ধুৰ লগত ফাকুৱা খেলি শিৱসাগৰৰ নগৰৰ পৰা বাইকেৰে (AS 04 N 1819) তিনিজন যুৱক সূৰয হাজৰিকা, মুকেশ দাস আৰু চাংকু দাসে আখৈফুটীয়াৰ ঘৰলৈ আহি আছিল।
তেনে অৱস্থাত বাঢ়ৈটিঙৰ লংচাই দলঙৰ ওচৰত বিপৰীত দিশৰ পৰা অহা এখন গাড়ীৰ লগত মুখামুখি সংঘৰ্ষ লাগে আৰু বাইকৰ পৰা তিনিও জন যুৱক বহুদূৰ উফৰি পৰে। বাইক চলাই অহা সূৰয হাজৰিকাই ভৰি, বুকুত আঘাত পোৱাত উন্নত চিকিৎসাৰ বাবে তেওঁক ডিব্ৰুগড়লৈ লৈ যোৱা হয়। আনহাতে বাইকৰ মাজত বহি অহা মুকেশ দাসৰ ঘটনাস্থলীতে মৃত্যু হয় আৰু বাইকৰ পিছত বহি অহা চাংকু দাসে মূৰত আঘাত পায়।
আনহাতে এই সমস্ত ঘটনা স্থানীয় এটা ব্যৱসায় প্ৰতিষ্ঠানৰ চি চি টি ভি কেমেৰাত বন্দী হয়। তীব্ৰ বেগত অহা বাইক খনে মুখামুখি ইণ্ডিকা গাড়ীখনৰ লগত খুন্দা মাৰে আৰু বাইকৰ তিনিও জন আৰোহী বহু দূৰৈত উফৰি পৰে। ঘটনা সংঘটিত কৰিয়েই গাড়ীখন তীব্ৰ বেগত ঘটনাস্থলীৰ পৰা পলাই যায়।
ইতিমধ্যে আৰক্ষীয়ে চিচিটিভিৰ ফুটেজ সংগ্ৰহ কৰিছে আৰু ঘটনাৰ তদন্ত আৰম্ভ কৰিছে। তিনিওজন যুৱকৰ ঘৰ আখৈফুটীয়া অঞ্চলত আৰু তিনিওৰে বয়স ২০ পৰা ২২ ৰ ভিতৰত বুলি আৰক্ষী সূত্ৰে জানিব পৰা গৈছে।
