হাফলঙৰ ডনবস্কো হায়াৰ ছেকেণ্ডাৰী স্কুলত এজন দ্বিতীয় শ্ৰেণীৰ ছাত্ৰ জ্যেষ্ঠ ছাত্ৰই চলোৱা শাৰীৰিক নিৰ্যাতনত গুৰুতৰভাৱে আহত হোৱা ঘটনাই সমগ্ৰ অঞ্চলত চাঞ্চল্যৰ সৃষ্টি কৰিছে।
প্ৰাপ্ত তথ্য অনুসৰি হাফলং ডনবস্কো হায়াৰ ছেকেণ্ডাৰী বিদ্যালয়ৰ দ্বিতীয় শ্ৰেণীৰ ছাত্ৰ ৰিঙমাইদাও কাৰিগাপচাক একেখন বিদ্যালয়ৰে জ্যেষ্ঠ ছাত্ৰই শাৰীৰিক অত্যাচাৰ কৰে। এই অত্যাচাৰত কণমানি ছাত্ৰজন গুৰুতৰভাৱে অসুস্থ হৈ পৰে। ভূক্তভোগী ছাত্ৰজনৰ চকু, মুখ আৰু ডিঙিত আঘাতৰ চিন স্পষ্ট হৈ আছে।
অভিযোগ অনুসৰি ডিঙিত ৰছী লগাই হত্যাৰ চেষ্টা কৰা হৈছিল ছাত্ৰজনক। গুৰুতৰভাৱে আঘাতপ্ৰাপ্ত ছাত্ৰজন শ্ৰেণীকোঠাতে অচেতন হৈ পৰি আছিল বহু সময়। বিদ্যালয় কৰ্তৃপক্ষই পাছত ঘটনাটো গম পাই ততাতয়াকৈ আহত ছাত্ৰজনক হাফলং অসামৰিক চিকিৎসালত ভৰ্তি কৰে।
আনহাতে, ঘটনা সন্দৰ্ভত ছাত্ৰজনৰ পৰিয়ালৰ লোকে হাফলং সদৰ থানাত এটা গোচৰ ৰুজু কৰিছে। বিদ্যালয় কৰ্তৃপক্ষই সমগ্ৰ ঘটনাটো গাপ দিয়াৰ চেষ্টা কৰাত অভিভাৱকসকল নিজ নিজ সন্তানসকলৰ সুৰক্ষাকলৈ শংকিত হৈ পৰিছে। একাংশ অভিভাৱকে ইমান ডাঙৰ ঘটনাটো সংঘটিত হোৱাৰ পাছতো বিদ্যালয় কৰ্তৃপক্ষই গমে পোৱা নাছিল বুলি বিষয়টো এৰাই চলিব খোজা কাৰ্য্যক সমালোচনা কৰে।
উল্লেখযোগ্য যে, এনেধৰণৰ বিদ্যালয়ত ছাত্ৰ-ছাত্ৰী নিৰ্যাতনৰ সন্মুখীন হ’ব লগা হোৱাটো নতুন কথা নহয়। প্ৰায়ে এনে ঘটনা সংঘটিত হৈ আছে শিক্ষাৰ নামত বেহা চলাই অহা ডনবস্কো বা অনুৰূপ ধৰণৰ বিদ্যালয় সমুহত। ভবিষ্যতে এনে বিদ্যালয় সমূহক নাকী লগাবৰ বাবে স্থানীয় সচেতন ৰাইজে চৰকাৰক আহ্বান জনাইছে।
