হাতী-মানুহৰ সংঘাতত এজন ৪০ বছৰীয়া মহিলাই মৃত্যুক আকোৱালী লোৱা খবৰে পশ্চিম কাৰ্বি আংলঙৰ খেৰণি বনাঞ্চলিক কাৰ্যালয় তথা খেৰণি থানাৰ অন্তৰ্গত মাইলু বস্তীত শোকৰ ছাঁ পৰিছে।
আজি পুৱতি নিশা মাইলু বস্তীৰ বাসিন্দা এঘৰৰ ঘৰৰ পিছফালে প্ৰৱেশ কৰা এটা বনৰীয়া হাতীয়ে অচম্বিতে মহিলাগৰাকীক আক্ৰমণ কৰাত মহিলাগৰাকীৰ কৰুণ মৃত্যু ঘটে। মৃত মহিলাগৰাকী সুখীয়া দেৱী (৪০) বুলি জানিব পৰা গৈছে।
পৰিয়ালৰ লোকে জনোৱা অনুসৰি আজি ৰাতিপুৱা প্ৰায় ৫ মান বজাত মৃত মহিলাগৰাকীয়ে ঘৰৰ পৰা বাহিৰলৈ যাওতেই বনৰীয়া হাতীটোৱে আক্ৰমণ কৰে। আৰু আক্ৰমণ কৰাৰ ফলত থিতাতে মহিলাগৰাকীৰ মৃত্যু হয়।
উল্লেখযোগ্য যে প্ৰায় ২০-২৫ জনীয়া এটা হাতীৰ জাকে পুৱাৰ ভাগতে উক্ত গাওঁখনত প্ৰৱেশ কৰি সন্ত্ৰাসৰ সৃষ্টি কৰিছিল বুলি স্থানীয় লোকে জানিবলৈ দিয়ে। ইফালে স্থানীয় ৰাইজে মৃত মহিলাগৰাকীৰ পৰিয়ালক অতি শীঘ্ৰে ক্ষতিপূৰণ দিয়াৰ বাবে চৰকাৰৰ ওচৰত দাবী জনায়।
আনহাতে এই ঘটনাৰ পাছত স্থানীয় ৰাইজে বন বিভাগৰ নীৰৱ ভূমিকাৰ প্ৰতি বৃহৎ প্ৰশ্ন উত্থাপন কৰে। উক্ত অঞ্চলটোত বিগত বহু দিনৰে পৰাই বনৰীয়া হাতীয়ে উপদ্ৰৱ চলাই অহা বুলি স্থানীয় ৰাইজে মত প্ৰকাশ কৰাৰ লগতে খেৰণি বন বিভাগে একো ব্যৱস্থা গ্ৰহণ নকৰাৰো অভিযোগ তোলে।