টকাৰ লেন দেন থকা অনলাইন গেম নিষিদ্ধ কৰা বিধেয়ক সন্দৰ্ভত, আদালতে বিবেচনা নকৰালৈকে বিধেয়কখন আইনত পৰিণত নকৰিবলৈ অনুৰোধ জনাইছে আবেদনকাৰীয়ে। অৱশ্যে ৰাষ্ট্ৰপতিয়ে সন্মতি দিলে অধিসূচনা জাৰি কৰাটো সাংবিধানিক কাৰ্যকলাপ বুলি উল্লেখ কৰে কেন্দ্ৰৰ ছলিচিটৰ জেনেৰেলে।
এইবাৰ আদালতে অনলাইন গেম নিয়ন্ত্ৰণ কৰা বিধেয়ক সন্দৰ্ভত কেন্দ্ৰৰ পৰা স্পষ্টীকৰণ বিচাৰিছে। অধিবেশনত সংসদৰ দুয়োখন সদনে ‘অনলাইন গেমিং প্ৰমোচন এণ্ড ৰেগুলেচন বিল, ২০২৫’ গৃহীত কৰে। এই বিধেয়কত ধনৰ বিনিময়ত খেলা অনলাইন গেম নিষিদ্ধ কৰিব বিচৰা হৈছে। ইতিমধ্যে কেন্দ্ৰৰ এই বিধেয়কখনৰ বিৰুদ্ধে কৰ্ণাটক উচ্চ ন্যায়ালয়ত গোচৰ ৰুজু কৰা হৈছে। শনিবাৰে উচ্চ ন্যায়ালয়ে এই বিষয়ত কেন্দ্ৰৰ পৰা সঁহাৰি বিচাৰিছিল।
অনলাইন গেমিং কোম্পানী ‘হেড ডিজিটেল ৱৰ্কছ প্ৰাইভেট লিমিটেড’ই কেন্দ্ৰৰ এই বিধেয়কখনৰ বিৰুদ্ধে আদালতত গোচৰ তৰিছে। এই কোম্পানীয়ে টকাৰ বিনিময়ত বনোৱা অনলাইন ‘ৰমি’ (এবিধ কাৰ্ড গেম)ও নতুন বিলৰ বাবে বিপদত পৰিছে। আবেদনকাৰী কোম্পানীটোৰ অধিবক্তাসকলৰ মতে, যদিও বিধেয়কখনৰ নামত অনলাইন গেমৰ ‘প্ৰচাৰ’ৰ কথা উল্লেখ আছে, তথাপিও প্ৰকৃততে গেম নিষিদ্ধ কৰিবলৈ কৰা হৈছে। আবেদনকাৰীৰ অধিবক্তাই উচ্চ ন্যায়ালয়ক এই বিধেয়ক সন্দৰ্ভত অন্তৱৰ্তীকালীন আদেশ জাৰি কৰিবলৈও অনুৰোধ জনায়। আদালতে বিষয়টো বিবেচনা নকৰালৈকে বিধেয়কখন আইনত পৰিণত হ’ব নালাগে বুলিও অনুৰোধ জনায়৷
কেন্দ্ৰৰ হৈ আদালতত উপস্থিত আছিল ছলিচিটৰ জেনেৰেল তুষাৰ মেহতা আৰু অতিৰিক্ত ছলিচিটৰ জেনেৰেল এন ভেংকটাৰমণ। ছলিচিটৰ জেনেৰেলে কয় যে এইটোৱেই প্ৰথমবাৰৰ বাবে আদালতে পৰীক্ষা কৰিব যে ধনৰ বিনিময়ত জুৱা খেলৰ ক্ষেত্ৰত সংসদৰ আইন প্ৰণয়নৰ অধিকাৰ আছে নে নাই। তেওঁ কয়, “ৰাষ্ট্ৰপতিয়ে সন্মতি দিলে অধিসূচনা জাৰি কৰাটো সাংবিধানিক কাৰ্য্য। ন্যায়পালিকাই পৰীক্ষা নকৰাকৈয়ে ইয়াক বন্ধ কৰিব নোৱাৰে।” বাৰ এণ্ড বেঞ্চৰ মতে, মেহতাক এই সন্দৰ্ভত শীঘ্ৰে অধিসূচনা জাৰি কৰাৰ সম্ভাৱনা আছে নেকি বুলি সোধা হৈছিল, যদিও তেওঁ ইয়াৰ উত্তৰত কোনো নিৰ্দিষ্ট মন্তব্য কৰা নাছিল, তথাপিও তেওঁ এই সম্ভাৱনা নুই কৰা নাছিল।
দুয়োপক্ষৰ যুক্তি শুনানিৰ পাছত আদালতে বিধেয়কখনৰ সন্দৰ্ভত কেন্দ্ৰৰ বিবৃতি বিচাৰিছিল। এই গোচৰৰ পৰৱৰ্তী শুনানি হ’ব ৮ ছেপ্টেম্বৰত। বিধেয়কখনৰ প্ৰতি লক্ষ্য ৰাখি কোনো অন্তৱৰ্তীকালীন আদেশ জাৰি কৰিব নে নকৰে সেইদিনা উচ্চ ন্যায়ালয়ে বিবেচনা কৰিব।
