শেহতীয়াকৈ ৰাজ্যখনত বৃদ্ধি পোৱা আলফা স্বাধীনৰ কাৰ্য-কলাপ প্ৰতিহত কৰাৰ বাবে তৎপৰ হৈ পৰিছে অসম আৰক্ষী। ৰাজ্যখনত আইন-শৃংখলাজনিত সমস্যা সৃষ্টি হোৱাৰ শংকা বৃদ্ধি পোৱাৰ প্ৰতি লক্ষ্য ৰাখি নিষিদ্ধ সংগঠনটোৰ বিৰুদ্ধে আৰক্ষীয়ে অভিযান তীব্ৰতৰ কৰি তুলিছে।
ডিমৌত আই ই ডি বিস্ফোৰণৰ ফলত দুজন লোক নিহত হোৱা ঘটনাৰ পাছতেই আৰক্ষীয়ে ৰাজ্যখনত আলফাবিৰোধী অভিযান তীব্ৰতৰ কৰি তুলিছে। ৰাজ্যৰ বিভিন্ন প্ৰান্তত আৰক্ষীয়ে অভিযান চলাই আলফাৰ লগত সম্পৰ্ক থকাৰ অভিযোগত ১৯জনকৈ লিংকমেনক আটক কৰে। তদুপৰি, ৰাজ্যখনৰ আন প্ৰান্তৰ পৰাও আৰক্ষীয়ে আন দুজন লিংকমেনক আটক কৰিছে।
মহানগৰ আৰক্ষী আয়ুক্তৰ কেন্দ্ৰীয় জিলাৰ উপ-আৰক্ষী আয়ুক্ত ৰঞ্জন ভূঞাই জানিবলৈ দিয়া মতে শুকুৰবাৰে নিশা মহানগৰ আৰক্ষীয়ে মহানগৰীৰ চন্দ্ৰপুৰ, নুনমাটি তথা পল্টনবজাৰৰ পাহাৰীয়া অঞ্চলত আলফাবিৰোধী অভিযান চলাই ১৭জন লোকক গ্ৰেপ্তাৰ কৰিবলৈ সক্ষম হয়।
আটক কৰা লোককেইজনৰ বিৰুদ্ধে পূৰ্বতে আলফাৰ লগত সম্পৰ্ক থকাৰ গোচৰ আছে বুলি উপ আৰক্ষী আয়ুক্ত গৰাকীয়ে জানিবলৈ দিয়ে। তদুপৰি, ধৃত লিংকমেন কেইজনক আৰক্ষীয়ে থানাত মাৰাথন জেৰা অব্যাহত ৰাখিছে।
