কৰ’না সংক্ৰমণ প্ৰতিৰোধৰ বাবে দেশত অব্যাহত থকা ল’কডাউনৰ পৰিপ্ৰেক্ষিতত দেশৰ বিভিন্ন প্ৰান্তত অসমৰ লক্ষাধিক লোক আৱদ্ধ হৈ থকিব লগা হৈছে।
উক্ত লোকসকল বিভিন্ন সমস্যাৰ সন্মুখীন হোৱাৰ খবৰ সংবাদ মাধ্যমৰ লগতে চ’ছিয়েল মিডিয়াৰ যোগে প্ৰচাৰ হৈছে।
তেনে সময়তে বৰ্হি ৰাজ্যত আৱদ্ধ হৈ পৰা অসমৰ লোকসকলক চৰকাৰে ভাড়া মাফ কৰি ৰাজ্যলৈ উভতাই আনিবলৈ দাবী জনাইছে বিৰোধী দলপতি দেৱব্ৰত শইকীয়াই।
নৰ্থ ইষ্ট নাওলৈ প্ৰেৰণ কৰা এক ভিডিওযোগে মুখ্যমন্ত্ৰী সৰ্বানন্দ সোণোৱালক বিশেষভাৱে অনুৰোধ জনায় বিৰোধী দলপতি দেৱব্ৰত শইকীয়াই।
উল্লেখ্য যে, ল’কডাউনৰ ফলত ৰাজ্যৰ বাহিৰত আবদ্ধ হৈ থকা বহুলোকে চৰকাৰৰ কেয়াৰ আঁচনিৰ ধন লাভ কৰিবলৈও সক্ষম হোৱা নাই।
ল’কডাউনৰ পৰিপ্ৰেক্ষিতত বাহিৰত অৰ্থাৎ বহিঃ ৰাজ্যত আৱদ্ধ হৈ থকা ছাত্ৰ-ছাত্ৰী, শ্ৰমিক তথা চিকিৎসাৰ বাবে যোৱা বহুতো লোকক ভাৰত চৰকাৰে বিশেষ ৰেল যোগে নিজ ৰাজ্যলৈ পঠিওৱাৰ ব্যৱস্থা কৰিছে।
উক্ত ভিডিওত শইকীয়াই কয় “সেয়েহে বহুতো ৰাজ্য চৰকাৰে আৱদ্ধ হৈ থকা তেওঁলোকৰ নাগৰিক সকলক বিনা ভাড়াই উক্ত ৰেল যোগে ঘৰলৈ অহাৰ পৰিকল্পনা কৰিছে।”
মুখ্যমন্ত্ৰী সৰ্বানন্দ সোণোৱাল লৈ আহ্বান জনাই তেওঁ কয় “আমাৰ ৰাজ্যৰ নাগৰিক সকলকো যেন বিনা ভাড়াই ঘৰলৈ উভতি অহাৰ ব্যৱস্থা কৰি দিয়ে।”
