তামিলনাডুৰ পূৰ্বৰ ডি এম কে চৰকাৰ দুৰ্নীতিৰ সৈতে জড়িত আছিল। চৰকাৰী প্ৰকল্পৰ আৱন্টনৰ বিনিময়ত ঠিকাদাৰে ‘পাৰ্টি ফাণ্ড’লৈ ৭-১০ শতাংশ ধন দিবলগীয়া হৈছিল। কালি বিধানসভাত বৰ্তমানৰ মুখ্যমন্ত্ৰী বিজয়ে এনে অভিযোগ উত্থাপন কৰে। আনকি তেওঁ প্ৰয়াত নেতা মুৰাচলি মৰাণৰ নামো উল্লেখ কৰিছিল। মুখ্যমন্ত্ৰীয়ে নিজৰ দাবীৰ সমৰ্থনত বলবৎকাৰী সঞ্চালকালয় (ইডি) আৰু অন্যান্য নথি-পত্ৰক অস্ত্ৰ হিচাপে ব্যৱহাৰ কৰে।
তেওঁৰ এই মন্তব্যক কেন্দ্ৰ কৰি অধিবেশন উত্তাল হৈ পৰে। যাৰ প্ৰভাৱ আজি মঙলবাৰেও দেখা গ’ল। অধ্যক্ষই বিৰোধী ডি এম কেৰ বিধায়কসকলক বাহিৰলৈ উলিয়াই দিবলৈ নিৰ্দেশ দিবলৈ বাধ্য হয়। ফলত তীব্ৰ হুলস্থুলৰ সৃষ্টি হয় ।
মঙলবাৰে বিধানসভাৰ অধিৱেশন আৰম্ভ হোৱাৰ লগে লগে সদনৰ মাজভাগলৈ নামি আহে ডি এম কেৰ বিধায়কসকল। শ্লোগান দি থাকে। কালি মুখ্যমন্ত্ৰীয়ে কৰা বিতৰ্কিত মন্তব্য বিধানসভাৰ কাৰ্য্যবিৱৰণীৰ পৰা আঁতৰাই পেলাবলৈ দাবী জনায় বিৰোধীয়ে। তাৰ পাছত শাসকীয় টিভিকেৰ বিধায়কসকলে ইয়াৰ প্রত্যুত্তৰত শ্ল’গান দিয়াত এক বৃহৎ হুলস্থুলৰ সৃষ্টি হয়৷
আজি মুখ্যমন্ত্ৰী বিজয়ৰ হৈ বিতৰ্কত নামে ৰাজ্যিক আইন মন্ত্ৰী আৰ নিৰ্মল কুমাৰ। চৰকাৰী আয়োগৰ প্রতিবেদন আৰু ইডিৰ নথিৰ আধাৰত মুখ্যমন্ত্রীয়ে এই মন্তব্য কৰিছে বুলিও তেওঁ কয়৷ কেৱল সেয়াই নহয়, দুৰ্নীতিৰ অভিযোগত তেওঁৱো ডি এম কেক আক্ৰমণ কৰে। স্বাভাৱিকতে অসন্তুষ্ট ডি এম কেৰ বিধায়কসকলে শ্লোগান দিবলৈ আৰম্ভ কৰিলে।
ইপিনে, অধ্যক্ষ জেচিডি প্ৰভাকৰে বিধানসভাৰ কার্যবিৱৰণীৰ পৰা মুখ্যমন্ত্রীৰ বক্তব্য ‘বাদ দিয়া’ৰ দাবী নাকচ কৰে৷ লগতে ডি এম কেৰ বিধায়কসকলক নিজৰ আসনলৈ ঘূৰি যাবলৈ অনুৰোধ জনায়। ইয়াৰ পিছতো কোনো লাভ নহ’ল। বাৰে বাৰে অনুৰোধ জনোৱাৰ পিছতো ডি এম কেৰ বিধায়কসকল ঘূৰি নগ’ল। এনে পৰিস্থিতিত তেওঁলোকক সদনৰ পৰা উলিয়াই দিবলৈ মাৰ্শ্বালসকলক অধ্যক্ষই নিৰ্দেশ দিয়ে।
