কাষ চাপিছে ২০২৪ চনৰ লোকসভা নিৰ্বাচন। দিল্লীৰ মচনদ দখলৰ লক্ষ্যৰে যো-জা চলাইছে শাসক-বিৰোধী উভয়েই। নৰেন্দ্ৰ মোদী নেতৃত্বাধীন বিজেপিয় জয়ৰ পথ ৰুদ্ধ কৰাৰ প্ৰচেষ্টাৰে একজোঁট হোৱাৰ কুচকাৱাজ অব্যাহত ৰাখিছে বিৰোধী দলসমূহে।
এনে নিৰ্বাচনী ৰণনীতি প্ৰস্তুতৰ লক্ষ্যৰে অহা ১২ জুনত পাটনাত বিৰোধী দলসমূহৰ এক বৈঠক অনুষ্ঠিত হ’ব বুলি এক সূত্ৰই প্ৰকাশ কৰিছে। এই সন্মিলনত ১৮ টাতকৈও অধিক বিৰোধী দলে অংশগ্ৰহণ কৰিব বুলি জানিব পৰা গৈছে।
বিৰোধী দলৰ এগৰাকী জ্যেষ্ঠ নেতাই অৱশ্যে সংবাদ মাধ্যমৰ আগত এই বৈঠকক এখন ‘প্ৰস্তুতিমূলক বৈঠক’ বুলিহে অভিহিত কৰিছে। বিৰোধী দলসমূহৰ মূল বৈঠক পিছত অনুষ্ঠিত হ’ব বুলিও তেওঁ লগতে কয়।
আজি প্ৰধানমন্ত্ৰী নৰেন্দ্ৰ মোদীয়ে নতুন সংসদ ভৱন মুকলি কৰাৰ অনুষ্ঠান ২০ টা বিৰোধী দলে ঐক্যবদ্ধভাৱে বৰ্জন কৰাৰ সময়তে বৈঠকৰ তাৰিখ সন্দৰ্ভত এই সিদ্ধান্ত লোৱা হৈছে।
ৰাষ্ট্ৰপতি দ্ৰৌপদী মুৰ্মুক সংসদ ভৱন উদ্বোধনী অনুষ্ঠানত চৰকাৰে আওকাণ কৰাৰ অভিযোগ উত্থাপন কৰি বিৰোধী দলসমূহে আজিৰ অনুষ্ঠানৰ বৰ্জন কৰে।
উল্লেখ্য যে ২০২৪ চনৰ সাধাৰণ নিৰ্বাচনৰ পূৰ্বে বিৰোধী ঐক্যৰ বাবে মূল হোতা হিচাপে আগভাগ লোৱা বিহাৰৰ মুখ্যমন্ত্ৰী নীতিশ কুমাৰে শেহতীয়াকৈ কংগ্ৰেছৰ মুৰব্বী মল্লিকাৰ্জুন খৰ্গে আৰু ৰাহুল গান্ধীক দিল্লীত সাক্ষাৎ কৰিছিল।
নীতিশ কুমাৰে যথাসম্ভৱ প্ৰতিটো বিৰোধী দলকে ঐক্যজোঁটত সামৰি লোৱাৰ পৰিকল্পনা কৰিছে আৰু মমতা বেনাৰ্জী, অৰবিন্দ কেজৰিৱাল আৰু সমাজবাদী পাৰ্টিৰ মুৰব্বী অখিলেশ যাদৱৰ সমৰ্থন আদায়ত কিছু পৰিমাণে সক্ষমো হৈছে।
এনে ৰণপ্ৰস্তুতিত অৱশ্যে কুমাৰ কেনেদৰে সফল হয়, সেয়া লক্ষণীয় হ’ব। বিশেষকৈ বিৰোধীৰ এই ঐক্যজোঁটত কংগ্ৰেছৰ অন্তৰ্ভুক্তিক মমতা বেনাৰ্জী, কেজৰিৱাল আৰু অখিলেশ যাদৱে কিদৰে গ্ৰহণ কৰে, ইয়াৰ ওপৰতে নিৰ্ভৰশীল হৈ পৰিব এই বিজেপিক ভেটাৰ কৌশলৰ সফলতা
