সোমবাৰৰ পৰা আৰম্ভ হ’ব সংসদৰ বৰ্ষাকালীন অধিৱেশন। ইয়াৰ পূৰ্বে পৰম্পৰা অনুসৰি আজি চৰকাৰে সৰ্বদলীয় বৈঠকৰ আহ্বান কৰে। তাত এনচিপিআইকো আমন্ত্ৰণ জনোৱা হৈছিল। আৰু তাতেই উত্তপ্ত নাটকৰ সাক্ষী হ’ল সংসদ।
আজি এন চি পি আইৰ অংশগ্ৰহণক লৈ প্ৰশ্ন উত্থাপন কৰি সৰ্বদলীয় বৈঠকৰ পৰা বিৰোধী নেতাসকলে ৱাক আউট কৰে। অৱশ্যে পিছত তেওঁলোকে অলপ সময়ৰ ভিতৰতে পুনৰ সভাত যোগদান কৰে।
জানিব পৰা মতে, কালি লোকসভাৰ তৃণমূল কংগ্ৰেছৰ বিদ্ৰোহীসকললৈ সংসদীয় পৰিক্ৰমা মন্ত্ৰী কিৰেন ৰিজিজুৱে এখন পত্ৰ প্ৰেৰণ কৰে। কিন্তু লোকসভাৰ অধ্যক্ষ ওম বিৰলাই বিদ্ৰোহী সাংসদৰ নতুন গোট এন চি পি আইক এতিয়াও আনুষ্ঠানিকভাৱে স্বীকৃতি দিয়া নাই।
এই ক্ষেত্ৰত বিৰোধীৰ যুক্তি হ’ল অধ্যক্ষই বিদ্ৰোহী তৃণমূল সাংসদসকলক স্বীকৃতি দিয়া নাই, গতিকে স্বীকৃতি অবিহনে তেওঁলোকক এই সৰ্বদলীয় বৈঠকলৈ কেনেকৈ নিমন্ত্ৰণ কৰা হ’ল? বিদ্ৰোহী সাংসদসকলে দাবী জনায় যে তেওঁলোকক যাতে মূল তৃণমূল সাংসদসকলৰ সৈতে বহিবলৈ নিদিয়ে। পিছত এই দাবী মানি লৈ তেওঁলোকৰ বাবে সুকীয়া বেঞ্চৰ ব্যৱস্থা কৰা হ’ল।
এই বৰ্ষাকালীন অধিৱেশনত চৰকাৰৰ কাৰ্যসূচীত মূলতঃ বিভিন্ন বিধেয়কৰ ওপৰত গুৰুত্ব আৰোপ কৰা হৈছে। চৰকাৰে নতুন ফৰ্মেটত সমষ্টি সীমা নিৰ্ধাৰণ বিধেয়ক, মহিলা সংৰক্ষণ বিধেয়ক আৰু প্ৰধানমন্ত্ৰী, মুখ্যমন্ত্ৰী আৰু মন্ত্ৰীসকলক অপসাৰণৰ প্ৰস্তাৱিত বিধেয়ক সন্দৰ্ভত আলোচনা কৰিব বিচাৰিছে।
ইফালে বিৰোধীয়ে কেইবাটাও বিষয়ত চৰকাৰক চাপত ৰখাৰ পৰিকল্পনা কৰিছে। বিৰোধী সাংসদসকলে সংসদত ই-২০ ইন্ধন বিতৰ্ক, মুদ্ৰাস্ফীতি, বৈদেশিক নীতি, দুৰ্নীতি আদি বিষয় উত্থাপন কৰিব পাৰে।
আজিৰ বৈঠক আৰম্ভ হোৱাৰ পূৰ্বে কিৰেণ ৰিজিজুৱে বৰ্ষাকালীন অধিৱেশন সন্দৰ্ভত বিৰোধী দলসমূহক সম্বোধন কৰি কয়, “কাইলৈৰ পৰা সংসদৰ বৰ্ষাকালীন অধিৱেশন আৰম্ভ হ’ব। চৰকাৰে আজি সকলো দলৰ নেতাৰ বৈঠক আহ্বান কৰিছে। এই বৰ্ষাকালীন অধিৱেশন সুচাৰুৰূপে পৰিচালিত হোৱাৰ বাবে সকলো ৰাজনৈতিক দলকে অৰিহণা আৰু সহযোগিতা আগবঢ়াবলৈ আমি আহ্বান জনাইছো। সংসদ সকলোৰে বাবে; আশা কৰিছো যে আইন সংক্ৰান্ত কাম আৰু চৰকাৰে অনা বিধেয়কসমূহত শাসকীয় দল আৰু বিৰোধীৰ সকলো সদস্যই অংশগ্ৰহণ কৰিব।”
ৰিজিজুৱে লগতে কয় যে সংসদে যিমানেই ভালদৰে কাম কৰিব, সিমানেই দেশৰ কল্যাণ হ’ব। “মই পুনৰবাৰ সকলো দলৰ নেতাক আহ্বান জনাইছো যে সংসদৰ কাম-কাজ সুচাৰুৰূপে হোৱাটো নিশ্চিত কৰক আৰু এই প্ৰক্ৰিয়াত অৰিহণা যোগাওক। আমি বিৰোধীৰ কথা শুনিম আৰু আশা কৰিছো যে তেওঁলোকেও আমাৰ কথা শুনিব।”
