প্ৰথমবাৰৰ বাবে বিশ্বৰ আটাইতকৈ ধনী ব্যক্তিৰ আসনত বহিবলৈ ওলাইছে অৰেকলৰ সহ-প্ৰতিষ্ঠাপক লেৰী এলিছন। তেওঁ ইলন মাস্কক অতিক্ৰম কৰি শীৰ্ষস্থান দখল কৰিছে।
ব্লুমবাৰ্গ বিলিয়নাৰ সূচকাংক অনুসৰি বুধবাৰে নিউয়ৰ্কত পুৱা ১০:১০ বজালৈকে এলিছনৰ মুঠ সম্পত্তিৰ পৰিমাণ আছিল ৩৯৩ বিলিয়ন মাৰ্কিন ডলাৰ। সেই সময়ত মাস্কৰ সম্পত্তিৰ পৰিমাণ আছিল ৩৮৫ বিলিয়ন ডলাৰ। অৰ্থাৎ এলিছনে ৮ বিলিয়ন ডলাৰ আগবাঢ়ি গৈছে।
অৰেকলৰ ত্ৰিমাসিক প্ৰতিবেদন প্ৰকাশ পোৱাৰ পিছতে এই উত্থান ঘটিছে। কোম্পানীটোৰ ফলাফল আশা কৰাতকৈ ভাল আছিল। ইয়াৰ উপৰিও আৰু বৃদ্ধি হ’ব বুলিও কোৱা হৈছে। ইয়াৰ বাবেই এলিছনৰ সম্পত্তি এদিনতে ১০১ বিলিয়ন ডলাৰ বৃদ্ধি পাইছে। যিটো ব্লুমবাৰ্গ সূচকাংকৰ ইতিহাসত এদিনীয়া সৰ্বাধিক বৃদ্ধি।
৮১ বছৰীয়া লেৰী এলিছন অৰেকল কৰ্প’ৰেশ্যনৰ সহ-প্ৰতিষ্ঠাপক। বৰ্তমান তেওঁ অধ্যক্ষ আৰু মুখ্য প্ৰযুক্তি বিষয়া। তেওঁৰ সম্পত্তিৰ ডাঙৰ অংশ অৰেকলৰ শ্বেয়াৰত সংযুক্ত হৈ আছে।
মঙলবাৰলৈকে এই বছৰ অৰেকলৰ শ্বেয়াৰৰ মূল্য ৪৫ শতাংশ বৃদ্ধি পাইছিল। আৰু বুধবাৰে প্ৰতিবেদন প্ৰকাশ পোৱাৰ পিছত ই আৰু ৪১ শতাংশ বৃদ্ধে পায়। কোম্পানীটোৰ অভূতপূৰ্ব সফলতাৰ কাৰণ হৈছে বুকিংৰ বৃহৎ বৃদ্ধি আৰু ক্লাউড আন্তঃগাঁথনি ব্যৱসায়ৰ বাবে আক্ৰমণাত্মক দৃষ্টিভংগী বুলি ধাৰণা কৰা হৈছে। এইটোৱেই হৈছে অৰেকলৰ ইতিহাসত এদিনীয়াকৈ শ্বেয়াৰৰ মূল্যৰ আটাইতকৈ ডাঙৰ উত্থান।
আনহাতে, টেছলাৰ শ্বেয়াৰ চলিত বৰ্ষত ১৩ শতাংশ হ্ৰাস পোৱা বুলি বিভিন্ন বাতৰি প্ৰকাশ পাইছে। মাস্কৰ আয় সেয়েহে কমিছে। যদিও শেহতীয়াকৈ টেছলাৰ ব’ৰ্ডে তেওঁৰ বাবে এক বিশাল পে পেকেজৰ প্ৰস্তাৱ দিছিল। সফল হ’লে তেওঁ হ’ব পাৰে বিশ্বৰ প্ৰথম ট্ৰিলিয়নাৰ।
উল্লেখ্য যে ২০২১ চনত প্ৰথমবাৰৰ বাবে বিশ্বৰ আটাইতকৈ ধনী ব্যক্তিজনৰ আসনত বহিছিল ইলন মাস্ক। পিছলৈ আমাজনৰ জেফ বেজোছ আৰু এলভিএমএইচৰ বাৰ্নাৰ্ড আৰ্নাল্টে তেওঁক চেৰ পেলাইছিল। যোৱা বছৰ পুনৰ শীৰ্ষ স্থানলৈ উভতি আহিছিল মাস্ক। তেওঁ ৩০০ দিনতকৈও অধিক সময় ধৰি আটাইতকৈ ধনী ব্যক্তিৰ খিতাপ ধৰি ৰাখিছিল। এইবাৰ লেৰী এলিছনৰ হাতত সেইটো হেৰুৱালে।
