এক অদ্ভুত ঘটনাত অসম চৰকাৰে অসমীয়া লিপি পুনৰীক্ষণৰ দায়িত্ব অৰ্পন কৰা এখন কমিটীত এগৰাকী প্ৰয়াত ভাষাবিদক অন্তৰ্ভুক্ত কৰিছে।
শেহতীয়াকৈ সাংস্কৃতিক পৰিক্ৰমা বিভাগে “অসমীয়া লিপিৰ বাবে সুকীয়া ক’ড চাৰ্টৰ সংশোধিত প্ৰস্তাৱ প্ৰস্তুত”ৰ বাবে এখন ১৭ জনীয়া কমিটী পুনৰ গঠন কৰিছে। তালিকাভুক্ত সদস্যসকলৰ ভিতৰত আছে চাৰি বছৰ পূৰ্বে মৃত্যু হোৱা প্ৰখ্যাত ভাষাবিদ আৰু সাহিত্যিক ড° ৰমেশ পাঠক।
২০২১ চনৰ ২৭ জানুৱাৰীত ৭৯ বছৰ বয়সত গুৱাহাটীস্থিত নিজা বাসভৱনত ডঃ পাঠকৰ মৃত্যু হয়। অসম সাংস্কৃতিক পৰিক্ৰমা বিভাগৰ অতিৰিক্ত মুখ্য সচিব বি কল্যাণ চক্ৰৱৰ্তীয়ে ২৯ জানুৱাৰী, ২০২৫ তাৰিখে জাৰি কৰা এক অধিসূচনাত ১১ এপ্ৰিল, ২০১৯ চনৰ পূৰ্বৰ অধিসূচনাৰ আংশিক পৰিৱৰ্তনৰ উদ্ধৃতি দি কমিটীখনৰ পুনৰ গঠনৰ কথা ঘোষণা কৰে।
অসম সাহিত্য সভাৰ সভাপতি, গুৱাহাটী বিশ্ববিদ্যালয়ৰ আই টি বিশেষজ্ঞ, অৱসৰপ্ৰাপ্ত চৰকাৰী বিষয়া, সাংস্কৃতিক কৰ্মী, শিক্ষাবিদ আদি বিভিন্ন ক্ষেত্ৰৰ বিশিষ্ট ব্যক্তিসকলক লৈ গঠন কৰা কমিটীখনত অসমৰ ৰাজ্যপালগৰাকীয়ে অনুমোদন জনায়।
ডঃ পাঠকক অন্তৰ্ভুক্ত কৰাৰ পিছত অৱশ্যে সামাজিক মাধ্যমত ক্ষোভৰ সৃষ্টি হৈছে। চৰকাৰৰ অমনোযোগিতাক সমালোচনা কৰি অতিৰিক্ত মুখ্য সচিব বি কল্যাণ চক্ৰৱৰ্তীক নেটিজেনসকলে গৰিহণা দিছে।
‘এয়া প্ৰয়াত ব্যক্তিজনৰ বাবে অপমান, আৰু ই চৰকাৰৰ নিতান্ত দায়িত্বহীনতাকে উদঙাইছে। এনে ভুল জাননী জাৰি কৰাৰ বাবে দায়বদ্ধ বিষয়াসকলৰ বিৰুদ্ধে ব্যৱস্থা গ্ৰহণ কৰিব লাগে।’-এজন ব্যৱহাৰকাৰীয়ে এক্স (পূৰ্বৰ টুইটাৰ)ত লিখিছে।
আন এজন ব্যৱহাৰকাৰীয়ে মন্তব্য কৰিছে, “অসম চৰকাৰৰ বিষয়াসকলৰ কাম-কাজৰ কথা বিবেচনা কৰক। ইউনিক’ডৰ বাবে গঠন কৰা কমিটীত ডঃ ৰমেশ পাঠকক অন্তৰ্ভুক্ত কৰিছে আই এ এছ বিষয়া বি কল্যাণ চক্ৰৱৰ্তীয়ে। ডঃ পাঠকৰ মৃত্যুৰ চাৰি বছৰ হ’ল৷ মই ভাবো @himantabiswa এইবোৰ কথাও চাব লাগে!”
উল্লেখ্য যে ৰাজ্যখনৰ এগৰাকী কৃতবিদ্য ভাষাবিদ তথা সাহিত্যচাৰ্য ডঃ ৰমেশ পাঠক কটন কলেজৰ অসমীয়া বিভাগৰ অধ্যাপক আছিল। সেই সূত্ৰে তেওঁ বৰ্তমান মুখ্যমন্ত্ৰী হিমন্ত বিশ্ব শৰ্মাৰো শিক্ষাগুৰু আছিল।
