বান পৰিস্থিতিয়ে ৰাজ্যত পুনৰ উদ্বেগৰ সৃষ্টি কৰিছে। প্ৰায় দুই লাখ লোক এই বানত ক্ষতিগ্ৰস্ত হৈছে। ৰাজ্যৰ বিভিন্ন অঞ্চল নৈসমূহৰ বাঢ়নী পানীত ডুব গৈছে। চলিত বৰ্ষত ৰাজ্যখনত এই পৰ্যন্ত বানত ১৫ জন লোকৰ মৃত্যু হৈছে।
সোমবাৰে অসম চৰকাৰে প্ৰকাশ কৰা বুলেটিনত কোৱা হৈছে যে ৰাজ্যখনৰ বানত ১ লাখ ৯০ হাজাৰৰো অধিক লোক ক্ষতিগ্ৰস্ত হৈছে। সোমবাৰে এজন লোকৰ মৃত্যু হয়। ব্ৰহ্মপুত্ৰকে ধৰি ৰাজ্যৰ কেইবাখনো নদীৰ জলপৃষ্ঠ বৃদ্ধি পাইছে। নদীৰ পাৰৰ গাঁওবোৰ পানীত বুৰ গৈছে। বহু লোকে ঘৰ এৰি চৰকাৰী সাহায্য শিবিৰত আশ্ৰয় ল’বলৈ বাধ্য হৈছে।
লগতে পঢ়ক: ইছৰোৰ আদিত্য এল ১ অভিযানত গুৰুত্বপূৰ্ণ ভূমিকাত তেজপুৰ বিশ্ববিদ্যালয়ৰ গৱেষক
ব্ৰহ্মপুত্ৰৰ পানী কিছুমান ঠাইত বিপদসীমাৰ ওপৰেৰে বৈ আছে। গুৱাহাটী আৰু যোৰহাটত ব্ৰহ্মপুত্ৰৰ ফেৰী সেৱা বন্ধ কৰি দিয়া হৈছে। ৰাজ্যৰ বিভিন্ন প্ৰান্তত দুৰ্যোগ সঁহাৰি বাহিনীয়ে কাম কৰি আছে। তেওঁলোকে জনোৱা মতে, এই মুহূৰ্তত অসমৰ মুঠ ১৭খন জিলা বানপানীৰ ফলত ক্ষতিগ্ৰস্ত হৈছে। সৰ্বাধিক ক্ষতিগ্ৰস্ত হৈছে লখিমপুৰ। ইয়াৰ পিছতে আছে ধেমাজি। এই দুই জিলাত ৪০ হাজাৰৰো অধিক লোক বানপানীৰ ফলত ক্ষতিগ্ৰস্ত হৈছে।
অসম চৰকাৰে ৰাজ্যৰ বিভিন্ন প্ৰান্তত সাহায্য শিবিৰ মুকলি কৰিছে। এতিয়ালৈকে ৪৫টা সাহায্য প্ৰদান কৰা হৈছে আৰু প্ৰায় ৫০০ লোকে সেই শিবিৰত আশ্ৰয় লৈছে। ব্ৰহ্মপুত্ৰৰ উপৰি বেকী, দিছাং, দিখৌ, সুৱনশিৰি নদীয়ে বিপদ সীমা অতিক্ৰম কৰিছে। ৰাজ্যৰ ৮ হাজাৰ হেক্টৰৰো অধিক কৃষিভূমি বানপানীৰ বাবে পানীৰ তলত।
বানপানীৰ ফলত ক্ষতিগ্ৰস্ত হোৱা জিলা কেইখন হৈছে বিশ্বনাথ, চিৰাং, দৰং, ধেমাজি, ধুবুৰী, ডিব্ৰুগড়, গোলাঘাট, যোৰহাট, লখিমপুৰ, মাজুলী, মৰিগাঁও, নগাঁও, নলবাৰী, শিৱসাগৰ, শোণিতপুৰ, তামুলপুৰ আৰু ওদালগুৰি।
লগতে পঢ়ক: ইতিহাসত প্ৰথমবাৰৰ বাবে পাকিস্তানত ভাৰতীয় মিছনৰ নেতৃত্ব দিব এগৰাকী মহিলাই
লখিমপুৰত ৪৭,৩৩৮ লোক ক্ষতিগ্ৰস্ত হোৱাৰ পিছতে ধেমাজিত বানপানীৰ কবলত পৰিছে ৪০,৯৯৭ লোক, গোলাঘাটত ২৭,৮৬৯ জন লোক আৰু শোণিতপুৰ জিলাত বানপানীৰ বাবে ২১,৪৩৫ লোক ক্ষতিগ্ৰস্ত হৈছে।
বৰ্তমান ৫২২ খন গাঁও বানপানীৰ কবলত পৰাৰ লগতে সমগ্ৰ অসমৰ ক্ষতিগ্ৰস্ত জিলাসমূহত ৮,০৮৬ হেক্টৰৰো অধিক শস্যৰ ক্ষতিসাধন হৈছে।
নিজ নিজ জিলা প্ৰশাসনে চিৰাং, ধেমাজি, লখিমপুৰ আৰু শোণিতপুৰ জিলাত মুঠ ৪৭ টা সাহায্য শিবিৰ আৰু ৪৫ টা সাহায্য বিতৰণ কেন্দ্ৰ চলাই আছে য’ত ৪২৭ জন স্থানচ্যুত লোকে আশ্ৰয় লৈছে।
লগতে পঢ়ক: নামেৰী ৰাষ্ট্ৰীয় উদ্যানৰ সমীপৰ বিজেপি নেতাৰ ইক’ ৰিজ’ৰ্টৰ পৰা জব্দ হৰিণৰ মাংস
বিগত কিছুদিন ধৰি ৰাজ্যত চলি থকা অবিৰত বৰষুণৰ ফলত বহু নদী উফন্দি উঠিছে। বৰষুণ বন্ধ নহ’লে বান পৰিস্থিতিৰ উন্নতিৰ সম্ভাৱনা নাই।
