বাজেট অধিৱেশনৰ দ্বিতীয় পৰ্যায়ত কেন্দ্ৰীয় শিক্ষা মন্ত্ৰণালয়ে প্ৰকাশ কৰা তথ্য অনুসৰি দেশৰ বিভিন্ন কেন্দ্ৰীয় বিশ্ববিদ্যালয়ত মুঠ ৫,৪১০টা অধ্যাপকৰ খালি হৈ থকাৰ তথ্য প্ৰকাশ কৰিছে।
যি সময়ত মোদী চৰকাৰে দেশক বিশ্বগুৰু আসনত প্ৰতিষ্ঠা কৰাৰ কথা কৈ অহিছে তেনেসময়তে দেশৰ কেন্দ্ৰীয় বিশ্ববিদ্যালয়সমূহত যথেষ্ট সংখ্যক দক্ষ শিক্ষকৰ অভাৱে দেশৰ ভ্যৱিষ্যতক লৈ উদ্বেগৰ সৃষ্টি কৰিছে। কেন্দ্ৰীয় বিশ্ববিদ্যালয়বোৰত অধ্যাপকৰ পদ খালী হৈ আছে সেই সম্পৰ্কে বুধবাৰে ৰাজ্যসভাত কেৰালাৰ কংগ্ৰেছ সাংসদ জে. বি. এম. হিছামে সদনত প্ৰশ্ন উত্থাপন কৰিছিল।
উত্তৰত চৰকাৰে যদিও বিশ্ববিদ্যালয়ভিত্তিত তথ্য আগবঢ়োৱা নাছিল, কেন্দ্ৰীয় শিক্ষা ৰাজ্যিক মন্ত্ৰী ড° সুকান্ত মজুমদাৰে কয় যে কেন্দ্ৰীয় বিশ্ববিদ্যালয়বোৰত অনুমোদিত মুঠ ১৩,২৩৫টা অধ্যাপকৰ পদৰ ভিতৰত ৫,৪১০টা পদ খালী হৈ আছে। যি মুঠ পদৰ প্ৰায় ৪১%। ইয়াৰ ভিতৰত অনুসূচিত জাতিৰ বাবে সংৰক্ষিত ৭৮৮টা পদ, অনুসূচিত জনজাতিৰ বাবে সংৰক্ষিত ৪৭২টা, আৰু অন্যান্য পিছপৰা শ্ৰেণীৰ বাবে সংৰক্ষিত ১,৫২১টা পদো খালী হৈ থকা বুলি তথ্য প্ৰকাশ কৰিছে।
এই তথ্য প্ৰকাশ হোৱাৰ পিছতেই বিৰোধীৰ তীব্ৰ সমালোচনাৰ সন্মুখীন হৈছে কেন্দ্ৰীয় চৰকাৰ। তৃণমূল কংগ্ৰেছৰ ৰাজ্যসভা সাংসদ ঋতব্ৰত বন্দোপাধ্যায়ে মঙ্গলবাৰ আৰু বুধবাৰে সংসদত শিক্ষা মন্ত্ৰণালয়ক উদ্দেশ্য কৰি কয় কেন্দ্ৰীয় বিশ্ববিদ্যালয়সমূহত পাঁচ হাজাৰৰো অধিক পদ শূন্য হৈ থকাটোৱে শিক্ষাৰ ভয়াবহ অৱস্থক প্ৰতিফলিত কৰিছে। তেওঁ আৰু কয় যে “এই চৰকাৰে শিক্ষাখণ্ডলৈ মুঠ GDPৰ মাত্ৰ ০.৩৭% আবণ্টন কৰিছে। শিক্ষাখণ্ডলৈ অন্ততঃ ৬% আবণ্টন নকৰিলে উন্নত শিক্ষাৰ ব্যৱস্থা কৰাটো সম্ভৱ নহয় বুলি মত প্ৰকাশ কৰিছে।
উল্লেখ্য যে এইন খালী পদৰ সমস্যা কেৱল কেন্দ্ৰীয় বিশ্ববিদ্যালয়তে সীমাবদ্ধ নহয়। দেশজুৰি কেন্দ্ৰীয় বিদ্যালয়বোৰত ৫,৪১০তকৈ অধিক শিক্ষকৰ পদ আৰু ১,৫৬৩টা অশিক্ষক কৰ্মচাৰীৰ পদ খালী হৈ আছে। দেশৰ শিক্ষাখণ্ডৰ এই অৱস্থাই শিক্ষাৰ গুণগত মান আৰু চৰকাৰৰ শিক্ষাখণ্ডৰ সমস্যা সমাধানৰ প্ৰতি দায়বদ্ধতাক লৈ প্ৰশ্ন উত্থাপন হৈছে।
