সমগ্ৰ বিশ্বৰ ৰাজনৈতিক পৰিৱেশত পৰিৱৰ্তনৰ বতাহ বলিছে। ধনী আৰু প্ৰভাৱশালী লোকসকল দ্ৰুতগতিত ক্ষমতাৰ শীৰ্ষলৈ উঠিছে। ৰাজনৈতিক পদবী লাভৰ সম্ভাৱনাৰ পৰা আৰম্ভ কৰি ধন-সম্পত্তি বৃদ্ধিলৈকে – ধনীসকল সকলো দিশতে সাধাৰণ জনতাৰ তুলনাত বহু আগবাঢ়ি আছে।
ছুইজাৰলেণ্ডৰ ডাভোছত অনুষ্ঠিত হোৱা ৫৬ সংখ্যক বিশ্ব অৰ্থনৈতিক মঞ্চৰ (ৱৰ্ল্ড ইকোনমিক ফ’ৰাম) বাৰ্ষিক সন্মিলনৰ পূৰ্বে অক্সফাম ইণ্টাৰনেশ্যনেলে এনে এক ভয়ংকৰ বৈষম্যৰ ওপৰত আলোকপাত কৰিছে।
এই ক্ষেত্ৰত ভাৰতক উল্লেখযোগ্য ব্যতিক্ৰম বুলিও উল্লেখ কৰা হৈছে। এই দেশৰ সংৰক্ষণ ব্যৱস্থাৰ বাবে সাধাৰণ জনতাৰ ৰাজনৈতিক সৱলীকৰণৰ কথা উল্লেখ কৰিবলৈও পাহৰা নাই সংগঠনটোৱে।
প্ৰতিবেদনত কোৱা হৈছে যে এজন ধনী ব্যক্তিয়ে ৰাজনৈতিক পদবী লাভ কৰাৰ সম্ভাৱনা সাধাৰণ ব্যক্তিতকৈ ৪ হাজাৰ গুণ বেছি। যোৱা পাঁচ বছৰৰ গড় হাৰৰ তুলনাত ২০২৫ চনত বিশ্বৰ ধনী লোকৰ ধন-সম্পত্তি তিনিগুণ বেছি দ্ৰুতহাৰত বৃদ্ধি পাইছে। ই অভিলেখ সৃষ্টি কৰি ১৮.৩ ট্ৰিলিয়ন মাৰ্কিন ডলাৰ স্পৰ্শ কৰিছে। ভাৰতৰ হিচাপত যিটো প্ৰায় ১৬৬০ লাখ কোটি টকা।
কোটিপতিসকলে কেনেদৰে ৰাজনৈতিক ক্ষমতা ব্যৱহাৰ কৰি অৰ্থনীতি আৰু সামাজিক নীতি-নিয়ম নিজৰ স্বাৰ্থত পৰিবৰ্তন কৰিছে সেই কথাও প্ৰতিবেদনত উল্লেখ কৰা হৈছে।
কোৱা হৈছে যে যোৱা এবছৰত এই কোটিপতিসকলৰ মুঠ সম্পদ ২.৫ ট্ৰিলিয়ন ডলাৰ বৃদ্ধি পাইছে, যিটো বিশ্বৰ আটাইতকৈ দৰিদ্ৰ অৰ্ধেক মানুহৰ (প্ৰায় ৪.১ বিলিয়ন লোক) মুঠ সম্পত্তিৰ সমান। এই বিশাল সম্পদেৰে অন্ততঃ ২৬ বাৰ চৰম দৰিদ্ৰতাৰ অন্ত পেলোৱা সম্ভৱ আছিল।
এই সংকটৰ সময়ত অক্সফামে ভাৰতৰ সংৰক্ষণ ব্যৱস্থাক আশাৰ ৰেঙণি হিচাপে উল্লেখ কৰিছে। অনুসূচিত জাতি, অনুসূচিত জনজাতি আৰু মহিলাৰ বাবে আসন সংৰক্ষণ কৰি প্ৰান্তীয় লোকসকলক ৰাজনৈতিকভাৱে সবলীকৰণ কৰি ভাৰতে এক অনন্য নিদৰ্শন দাঙি ধৰিছে বুলি কয়। ৰাজনীতিৰ উপৰিও শিক্ষা বা চৰকাৰী চাকৰিতো আৰ্থিকভাৱে দুৰ্বল বা প্ৰান্তীয় লোকৰ বাবে সংৰক্ষণ আছে।
বিশ্বৰ কোটিপতিসকলৰ এই ক্ৰমবৰ্ধমান প্ৰভাৱ কেৱল অৰ্থনীতিতে সীমাবদ্ধ নহয়। সংবাদ মাধ্যম আৰু ছ’চিয়েল মিডিয়াতো এই প্ৰভাৱ ক্ৰমান্বয়ে বাঢ়িছে বুলি সংস্থাটোৱে জানিবলৈ দিয়ে। ইতিমধ্যে জেফ বেজোছে ‘ৱাশ্বিংটন পোষ্ট’ ক্ৰয় কৰিছে। ইলন মাস্কে ‘এক্স’ অধিগ্ৰহণ কৰিছে। একেদৰে কোটিপতিৰ এটা দলে দ্য ইকনমিষ্টৰ বৃহৎ অংশীদাৰিত্ব ক্ৰয় কৰিবলৈ সাজু হৈছে।
অক্সফামে কয় যে বিশ্বৰ আধাতকৈ অধিক প্ৰধান সংবাদ মাধ্যম এতিয়া ধনী লোকসকলৰ মালিকানাধীন। অক্সফামৰ মতে এই পৰিস্থিতি ৰোধৰ বাবে ভাৰতক অনুকৰণ কৰা উচিত।
