প্ৰতিকাৰহীন ৰোগ কোভিডৰ ভেকচিন আবিষ্কাৰ কৰিও হঠাতে থমকি ৰ’বলগীয়া হৈছে অক্সফোৰ্ড বিশ্ববিদ্যালয়-এষ্ট্ৰাজেনিকাৰ বিশেষজ্ঞ সকল।
কোভিডৰ ভেকচিনৰ ক্ষেত্ৰত বহু পৰিমাণে আশাৰ ৰেঙণি দেখুওৱা অক্সফোৰ্ডৰ ভেকচিন বিধ ২০২০ চনৰ এপ্ৰিল মাহৰ পৰাই বিশ্বৰ বিভিন্ন দেশত প্ৰায় ১৮,০০০ লোকৰ দেহত পৰীক্ষণ কৰি ভালেখিনি সুফল লাভ কৰা হৈছিল।
ভাৰততো এই ভেকচিনৰ তৃতীয় পৰ্যায়ৰ পৰীক্ষণ চলি আছিল।
কিন্তু এক অনাকাংক্ষিত ঘটনাৰ পিছতে ভেকচিন বিধৰ পৰীক্ষণ ভাৰতৰ লগতে বিভিন্ন দেশত বন্ধ কৰি দিয়া হৈছিল।
কিছুদিন পূৰ্বে এই ভেকচিন গ্ৰহণ কৰি ব্ৰিটেইনত অসুস্থ হৈ পৰিছিল এজন স্বেচ্ছাসেৱক।
ইয়াৰ পিছতে ব্ৰিটেইন,আমেৰিকা,ব্ৰাজিল,ভাৰত আদি দেশত কোভিশ্বিল্ড নামৰ ভেকচিন বিধৰ পৰীক্ষণ বন্ধ কৰা হৈছিল।
শেহতীয়াকৈ ব্ৰিটেইনৰ Medicines Health Regulatory Authority (MHRA-এ ভেকচিন বিধৰ পৰীক্ষণ সম্পূৰ্ণ নিৰাপদ বুলি ঘোষণা কৰাৰ লগতে ব্ৰিটেইনত পুনৰ ইয়াৰ পৰীক্ষণ কৰিব পাৰিব বুলি কৈছে।
ব্ৰিটেইমনৰ স্বাস্থ্য বিভাগে সেউজ সংকেত দিয়াৰ পিছতে পুনৰ দেশখনত আৰম্ভ হৈছে কোভিশ্বিল্ডৰ পৰীক্ষণ।
ব্ৰিটেইনৰ স্বাস্থ্য দপ্তৰৰ সচিব মেট হেনকুকে টুইটাৰত কৈছে যে অক্সফোৰ্ড বিশ্ববিদ্যালয়-এষ্ট্ৰাজেনিকাৰ ভেকচিন নিৰাপদ বুলি প্ৰমাণ হৈছে আৰু শীঘ্ৰে ইয়াৰ পৰীক্ষণো পুনৰ আৰম্ভ কৰা হ’ব।
ভাৰতত অৱশ্যে ড্ৰাগছ কণ্ট্ৰলাৰ জেনেৰেলে ভেকচিনৰ পৰীক্ষণ বন্ধ কৰিবলৈ দিয়া নিৰ্দেশৰ পিছত নতুনকৈ কোনো নিৰ্দেশ দিয়া নাই।
