জম্মু-কাশ্মীৰৰ পেহেলগাম সন্ত্ৰাসবাদী আক্ৰমণৰ গোচৰত ৰাষ্ট্ৰীয় তদন্ত সংস্থাই ছজন অভিযুক্তৰ বিৰুদ্ধে অভিযোগনামা দাখিল কৰিছে। সংস্থাটোৱে সদৰী কৰা মতে, এই আক্ৰমণৰ ষড়যন্ত্ৰ পাকিস্তানৰ পৰা পৰিকল্পনা কৰা হৈছিল আৰু নিষিদ্ধ সন্ত্ৰাসবাদী সংগঠন লস্কৰ-ই-টাইবা (LeT) আৰু ইয়াৰ সংযুক্ত সংগঠন দ্য ৰেজিষ্টেন্স ফ্ৰণ্ট (TRF)এই ঘটনাত জড়িত আছিল।
নিয়াৰ অভিযোগনামাত লস্কৰ-ই-টাইবা আৰু টিআৰএফৰ নেতা ছাজিদ জাটৰ নাম উল্লেখ কৰা হৈছে। লগতে এই দুয়োটা সংগঠনক আক্ৰমণৰ পৰিকল্পনা, সুবিধা প্ৰদান আৰু কাৰ্যকৰী কৰাৰ বাবে অভিযুক্ত কৰা হৈছে।
যোৱা ২২ এপ্ৰিলত জম্মু-কাশ্মীৰৰ পহলগামৰ ওচৰৰ বৈছাৰণ অঞ্চলত এই সন্ত্ৰাসবাদী আক্ৰমণ সংঘটিত হৈছিল। এই আক্ৰমণত ২৬ জন লোক নিহত আৰু ১৬ জন আহত হৈছিল।
আৰক্ষীৰ মতে, সন্ত্ৰাসবাদীয়ে পৰ্যটকসকলৰ নাম সোধি ধৰ্ম চিনাক্ত কৰাৰ পাছত আক্ৰমণ চলাইছিল। নিহতসকলৰ ভিতৰত তিনিজনৰ বাহিৰে বাকী সকলোৱে হিন্দু ধৰ্মাৱলম্বী আছিল।
অভিযোগনামাত ২৮ জুলাইত ভাৰতীয় নিৰাপত্তা বাহিনীয়ে চলোৱা নিৰাপত্তা অভিযানত নিহত হোৱা তিনিজন পাকিস্তানী সন্ত্ৰাসবাদীৰ নামো অন্তৰ্ভুক্ত কৰা হৈছে। এই সন্ত্ৰাসবাদীসকল আক্ৰমণটোৰ সৈতে প্ৰত্যক্ষভাৱে জড়িত আছিল বুলি নিয়াই দাবী কৰিছে।
সংস্থাটোৱে সন্ত্ৰাসবাদী সংগঠনসমূহ আৰু চাৰিজন ব্যক্তিৰ বিৰুদ্ধে ভাৰতীয় ন্যায় সংহিতা, ১৯৫৯ চনৰ অস্ত্ৰ আইন আৰু অবৈধ কাৰ্যকলাপ (প্ৰতিৰোধ) আইন (UAPA)ৰ অধীনত অভিযোগ উত্থাপন কৰিছে। লগতে দেশৰ বিৰুদ্ধে যুদ্ধ চলোৱাৰ ধাৰাও সংযোজন কৰা হৈছে।
নিয়াই সদৰী কৰা অনুসৰি, জুন মাহত সন্ত্ৰাসবাদীক আশ্ৰয় দিয়াৰ অভিযোগত পৰ্বৈজ আহমদ জোথাৰ আৰু বছৰ আহমদ জোথাৰ নামৰ দুজন লোকক গ্ৰেপ্তাৰ কৰা হৈছে।
