নাগৰিকত্ব (সংশোধন) আইনক সমালোচনা কৰিবলৈ গৈ ছ’চিয়েল মিডিয়াত নিজেই সমালোচনাৰ সন্মুখীন হ’বলগীয়া হ’ল পাকিস্তানৰ প্ৰধান মন্ত্ৰী ইমৰাণ খান।
শুকুৰবাৰে ইমৰাণ খানে ভাৰতৰ ‘কা’ বিৰোধী মুছলমান প্ৰতিবাদকাৰী সকলক আৰক্ষীয়ে প্ৰহাৰ কৰা ভিডিঅ’ নিজৰ টুইটাৰত পোষ্ট কৰে।
‘‘উত্তৰ-প্ৰদেশৰ মুছলমানৰ বিৰুদ্ধে ভাৰতীয় আৰক্ষীৰ অভিযান,’’ ভিডিঅ’ৰে সৈতে ইমৰাণ খানে এনেদৰে টুইট কৰে।
দুৰ্ভাগ্যবশত ইমৰাণ খানে ভুলতে ভাৰতৰ ভিডিঅ’ বুলি সাত বছৰ পুৰণি বাংলাদেশৰ এটা ভিডিঅ’হে ছ’চিয়েল মিডিয়াত শ্বেয়াৰ কৰে।
এনে অপপ্ৰচাৰত ছ’চিয়েল মিডিয়াত সাংঘাটিক ট্ৰোলৰ সন্মুখীন হয় ইমৰাণ খান।
পৰৱৰ্তী সময়ত নিজৰ ভুল উপলব্ধি কৰি ভিডিঅ’ কেইটা নিজৰ টুইটাৰ হেণ্ডেলৰ পৰা ডিলিট কৰি দিবলৈ বাধ্য হয় পাকিস্তানৰ প্ৰধান মন্ত্ৰীয়ে।
উল্লেখযোগ্য যে, ইয়াৰ পূৰ্বেও ছ’চিয়েল মিডিয়াত পাকিস্তানে ভাৰতৰ বিৰুদ্ধে এনেধৰণৰ অপপ্ৰচাৰ চলাই আন্তঃৰাষ্ট্ৰীয় পৰ্যায়ত সমালোচনাৰ সন্মুখীন হৈছে।
বিগত বৰ্ষত কাশ্মীৰত সেনাৰ ৰবৰ বুলেটৰ আঘাতত আঘাতপ্ৰাপ্ত হোৱা বুলি এগৰাকী কিশোৰীৰ ফটো ছ’চিয়েল মিডিয়াত আপলোড কৰিছিল পাকিস্তানৰ ডিজি আই এছ পি আৰে।
কিন্তু ফটোখন কাশ্মীৰৰ পৰিৱৰ্তে ছিৰিয়াৰ বুলিহে পাছত প্ৰমাণ হয় যাৰবাবে ৰাষ্ট্ৰসংঘৰ মজিয়াতো পাকিস্তানে সমালোচনাৰ সন্মুখীন হ’বলগীয়াত পৰে।
