অহা ১৫ ফেব্ৰুৱাৰীত অনুষ্ঠিত হ’বলগীয়া টি-২০ বিশ্বকাপৰ আটাইতকৈ চৰ্চিত ভাৰত বনাম পাকিস্তানৰ মেচখনক লৈ চৰম অনিশ্চয়তাই দেখা দিছে। পাকিস্তান চৰকাৰৰ আনুষ্ঠানিক ‘এক্স’ (পূৰ্বৰ টুইটাৰ) একাউণ্টৰ জৰিয়তে প্ৰকাশিত এক বিবৃতিত জনাইছে যে পাকিস্তান ক্ৰিকেট দলক বিশ্বকাপত অংশ লবলৈ শ্ৰীলংকালৈ যোৱাৰ অনুমতি দিয়া হৈছে যদিও ভাৰতৰ বিৰুদ্ধে নিৰ্ধাৰিত মেচখনত তেওঁলোকে অংশগ্ৰহণ নকৰে।
পাকিস্তান চৰকাৰৰ এই হঠকাৰী সিদ্ধান্তৰ কোনো স্পষ্ট কাৰণ বৰ্তমানলৈকে উল্লেখ কৰা হোৱা নাই। যদিও পাকিস্তান ক্ৰিকেট বৰ্ডে (PCB) এই সন্দৰ্ভত আইচিচিক (ICC) আনুষ্ঠানিকভাৱে একো জনোৱা নাই, তথাপিও আইচিচিয়ে দেওবাৰে নিশা এক বিবৃতি জাৰি কৰি পাকিস্তানক সঁকীয়াই দিছে। সংস্থাটোৰ মতে, এনে ‘নিৰ্বাচিত অংশগ্ৰহণ’ (Selective Participation) বিশ্ব ক্ৰিকেটৰ গৰিমা আৰু মনোভাৱৰ পৰিপন্থী। ইয়াৰ ফলত বিশ্ব ক্ৰিকেটত পাকিস্তানৰ অংশগ্ৰহণৰ ওপৰত দীৰ্ঘম্যাদী নেতিবাচক প্ৰভাৱ পৰিব পাৰে বুলিও আইচিচিয়ে সতৰ্ক কৰি দিছে।
অহা ৭ ফেব্ৰুৱাৰীৰ পৰা আৰম্ভ হ’বলগীয়া টি-২০ বিশ্বকাপত পাকিস্তানৰ অভিযান আৰম্ভ হ’ব নেদাৰলেণ্ডৰ বিৰুদ্ধে। ‘গোট-এ’ত (Group A) ভাৰত আৰু পাকিস্তানৰ সৈতে নামিবিয়া, নেদাৰলেণ্ড আৰু আমেৰিকা যুক্তৰাষ্ট্ৰ আছে।
পাকিস্তানৰ সূচী অনুসৰি:
১০ ফেব্ৰুৱাৰী: বনাম আমেৰিকা।
১৫ ফেব্ৰুৱাৰী: বনাম ভাৰত (যিখন মেচ বৰ্জনৰ কথা ঘোষণা কৰা হৈছে)।
১৮ ফেব্ৰুৱাৰী: বনাম নামিবিয়া।
যদি পাকিস্তানে ভাৰতৰ বিৰুদ্ধে খেলখন বৰ্জন কৰে, তেন্তে নিয়ম অনুসৰি তেওঁলোকে মেচখনৰ গুৰুত্বপূৰ্ণ ২ পইণ্ট হেৰুৱাব লাগিব, যাৰ ফলত তেওঁলোকৰ ছেমিফাইনেলৰ পথ কঠিন হৈ পৰিব পাৰে।
ইফালে আইচিচিৰ অধ্যক্ষ জয় শ্বাহৰ নেতৃত্বত সংস্থাটোৱে বিষয়টো সমাধানৰ বাবে পিচিবিৰ সৈতে যোগাযোগ অব্যাহত ৰাখিছে। ইফালে, ভাৰততো এই বিষয়টোৱে ৰাজনৈতিক মোৰ লৈছে। সমাজবাদী পাৰ্টিৰ মুৰব্বী অখিলেশ যাদৱে ভাৰত চৰকাৰৰ বিদেশ নীতিক সমালোচনা কৰিছে। তেওঁ প্ৰশ্ন উত্থাপন কৰি কয় যে ‘অপাৰেচন সিন্দুৰ’ৰ পাছতো ভাৰতে কিয় ডুবাইত পাকিস্তানৰ সৈতে মেচ খেলিছিল?
মন কৰিবলগীয়া যে ভাৰত-পাকিস্তানৰ মেচখন বিশ্বৰ ভিতৰতে সৰ্বাধিক দৰ্শকে উপভোগ কৰা ক্ৰীড়া সমাৰোহ। এই মেচখন বাতিল হ‘লে সম্প্ৰচাৰকাৰী সকল বিশাল বিত্তীয় লোকচানৰ সন্মুখীন হ’ব পাৰে। পাকিস্তানে অভিযোগ কৰিছে যে বাংলাদেশে নিৰাপত্তাৰ কাৰণত ভাৰতত খেলিবলৈ অস্বীকাৰ কৰাত তেওঁলোকক বাহিৰ কৰি দি আইচিচিয়ে ‘দ্বৈত নীতি’ অৱলম্বন কৰিছে।
