পাকিস্তানৰ ৰাজধানী ইছলামবাদৰ সমীপৱৰ্তী তক্ষশীলা চহৰত গুলীয়াই হত্যা কৰা হৈছে এগৰাকী জনপ্ৰিয় টিকটক তাৰকাক। আৰক্ষীয়ে জনোৱা মতে, ঘটনাটো ১৪ আগষ্টত সংঘটিত হৈছিল। মৃত টিকটকাৰৰ নাম ছামছু বিবি, কিন্তু ছ’চিয়েল মিডিয়াত আয়েছা গিলাইমনা নামেৰে বেছি পৰিচিত আছিল। ২৮ বছৰীয়া আয়েছাৰ টিকটকত প্ৰায় ১৩ লাখ ফ’ল’ৱাৰ আছিল।
মৃত যুৱতীগৰাকীৰ পিতৃ ফজল চাহিবজাদাই আৰক্ষীক এজাহাৰ দাখিল কৰিছে। অভিযোগ অনুসৰি কাচিফ ওৰফে ‘কাচি’ নামৰ এজন লোকে আয়েছাক ফোন কৰি ঘৰৰ পৰা ওলাই আহিবলৈ কয়। ইয়াৰ পিছত আয়েছা ১৫ বছৰীয়া ভগ্নী আছিমা আৰু ভাতৃ নাইমাতুল্লাহৰ সৈতে গাড়ীৰে ঘৰৰ পৰা ওলাই যায়।
পিছত পৰিয়ালটোৱে আয়েছাক গুলীয়াই হত্যা কৰাৰ খবৰ লাভ কৰে। খবৰটো শুনি দেউতাকে ততাতৈয়াকৈ তক্ষশীলাৰ THQ হাস্পতাললৈ যায়। তাতে তেওঁ মৰ্গৰ পৰা কন্যাৰ মৃতদেহ চিনাক্ত কৰে।
এজাহাৰ অনুসৰি ভাতৃ নাইমাতুল্লাই পৰিয়ালটোক জনোৱা মতে, মটৰবাইকত অহা দুজন লোক পেট্ৰ’ল পাম্পৰ ওচৰত তেওঁলোকৰ গাড়ীৰ কাষ চাপিছিল। তেওঁলোকৰ বয়স ৩০ৰ পৰা ৩৫ বছৰৰ ভিতৰত বুলি অনুমান কৰা হৈছে। ইয়াৰ পিছতে গাড়ীখনলৈ গুলীচালনা আৰম্ভ কৰে।
আক্রমণকাৰীয়ে মূলতঃ আয়েছাক লক্ষ্য কৰি লৈছিল৷ এটা গুলী পোনে পোনে ডিঙিত লাগে আৰু থিতাতে তেওঁৰ মৃত্যু হয়। এই ঘটনাৰ পিছতে গাড়ীখনৰ চালকে নিয়ন্ত্ৰণ হেৰুৱাই গাড়ীখনে আন এখন গাড়ীৰ সৈতে খুন্দা মাৰে। এই দুৰ্ঘটনাত আয়েছাৰ ভগ্নী আছিমা গুৰুতৰভাৱে আহত হয়। তেওঁক চিকিৎসাৰ বাবে চিকিৎসালয়লৈ লৈ যোৱা হৈছে।
জানিব পৰা মতে, এই ঘটনাৰ পিছতে দুজন লোকক মটৰবাইকেৰে পলায়ন কৰা দেখা গৈছে। আৰক্ষীয়ে ফুটেজ পৰীক্ষা কৰি সন্দেহযুক্ত লোকক চিনাক্ত কৰাৰ চেষ্টা অব্যাহত ৰাখিছে। হত্যাকাণ্ডৰ কাৰণ জানিবলৈ কৰ্তৃপক্ষই তদন্ত আৰম্ভ কৰিছে। অৱশ্যে এই হত্যাকাণ্ডৰ প্ৰকৃত উদ্দেশ্য এতিয়াও জানিব পৰা হোৱা নাই।
