কামৰূপ জিলাৰ কমলপুৰ বিধানসভা সমষ্টিৰ অন্তৰ্গত পানাৰাত উদিত সূৰুয সংঘৰ উদ্যোগত যোৱা ১৪ আৰু ১৫ এপ্ৰিলত দুদিনীয়া বৰ্ণাঢ্য কাৰ্যসূচীৰে পানাৰা আঞ্চলিক ৰঙালী বিহুৰ সোণালী জয়ন্তী উদযাপন কৰা হয়। ১৯৭০ চনৰে পৰাই প্ৰথম অৱস্থাত পানাৰা শিল্পী সংঘ আৰু বৰ্তমান উদিত সূৰুয সংঘৰ উদ্যোগত অনুষ্ঠিত এই বিহুৱে অঞ্চলটোত সাহিত্য, সংস্কৃতি আৰু সমাজ গঠনত উল্লেখনীয় অৱদান আগবঢ়াই আহিছে। ঐতিহ্যমণ্ডিত এই বিহুখনৰ পঞ্চাশ বছৰীয়া বৰ্ষপূৰ্তি উপলক্ষে অঞ্চলটোৰ ৰাইজৰ অংশগ্ৰহণেৰে এক উৎসৱমুখৰ পৰিৱেশৰ সৃষ্টি হয়।
প্ৰথম দিনৰ কাৰ্যসূচীৰ শুভাৰম্ভণি সংঘৰ পতাকা উত্তোলনেৰে কৰা হয় আৰু সোণালী জয়ন্তীৰ লগত সংগতি ৰাখি বিভিন্ন বিশিষ্ট ব্যক্তিৰ উপস্থিতিত পঞ্চাশখন বিহু পতাকা উত্তোলন কৰা হয়। এই অনুষ্ঠানৰ অন্যতম বিশেষ আকৰ্ষণ হিচাপে জ্যেষ্ঠ চিকিৎসক তথা নেমকেয়াৰ হাস্পতালৰ পৰিচালন সঞ্চালক ডাঃ হিতেশ বৰুৱাক শিক্ষক তথা সমাজসেৱক ‘অক্ষয় চৰণ দত্ত সোঁৱৰণী আজীৱন সমাজসেৱক বঁটা’ৰে সন্মানিত কৰা হয়। অশোক কুমাৰ দত্তৰ পৰিচালনাৰে নিৰ্মিত সোণালী জয়ন্তী উদযাপনৰ মূল সংগীতটো মুকলি কৰাৰ লগতে বঁটা গ্ৰহণ কৰি ডাঃ হিতেশ বৰুৱাই এক ধন্যবাদমূলক বাৰ্তা প্ৰদান কৰে। তেওঁ উল্লেখ কৰে যে পানাৰাৰ দৰে সংস্কৃতি সমৃদ্ধ স্থানত সোণালী জয়ন্তী উদযাপনত অংশগ্ৰহণ কৰি তেওঁ অতিশয় আপ্লুত। এনে উদ্যোগে সমাজত পৰম্পৰা, সংস্কৃতি আৰু সমাজসেৱাৰ মানসিকতা আগবঢ়াই নিয়াত গুৰুত্বপূর্ণ ভূমিকা গ্ৰহণ কৰে বুলি মন্তব্য কৰি তেওঁ এই সন্মানৰ বাবে আয়োজকসকললৈ আন্তৰিক কৃতজ্ঞতা জ্ঞাপন কৰে।
অনুষ্ঠানৰ অংশ হিচাপে প্ৰাণৰ শিল্পী জুবিন গাৰ্গৰ প্ৰতি শ্ৰদ্ধা জনাই আয়োজন কৰা সদৌ অসম ভিত্তিক ‘জুবিন গাৰ্গৰ সংগীত প্ৰতিযোগিতা’ত ৰাজ্যৰ বিভিন্ন প্ৰান্তৰ অৰ্ধ শতাধিক প্ৰতিযোগীয়ে অংশগ্ৰহণ কৰে। আনহাতে, দ্বিতীয় দিনা অসমৰ বিভিন্ন জাতি-জনগোষ্ঠীৰ কৃষ্টি-সংস্কৃতিক প্ৰতিফলিত কৰা এক বাৰেৰহনীয়া সাংস্কৃতিক শোভাযাত্ৰা উলিওৱা হয়, য’ত প্ৰায় দুশতাধিক লোকে অংশগ্ৰহণ কৰে। এই দুদিনীয়া কাৰ্যসূচীত বিশিষ্ট অভিনেতা প্ৰণৱ দত্তকে প্ৰমুখ্য কৰি বহুকেইগৰাকী বিশিষ্ট ব্যক্তি উপস্থিত থাকে।
সোণালী জয়ন্তী উদযাপনৰ লগত সংগতি ৰাখি বিশিষ্ট চলচ্চিত্ৰ পৰিচালক প্ৰণৱ ভৰালীয়ে ‘প্ৰভাতী পানাৰা’ শীৰ্ষক এখন স্মৃতিগ্ৰন্থ উন্মোচন কৰে। সন্ধিয়াৰ ভাগলৈ বিশিষ্ট অভিনেতা হিৰণ্য ডেকাই সাংস্কৃতিক মঞ্চ উদ্বোধন কৰাৰ পিছতে অসমৰ লোক সংস্কৃতিৰ বিভিন্ন দিশ সাঙুৰি ‘একতাৰ সুৰ’ নামৰ অৰ্কেষ্ট্ৰা দলে এক সুন্দৰ অনুষ্ঠান পৰিৱেশন কৰে। সাংস্কৃতিক সন্ধিয়াৰ বিশেষ আকৰ্ষণৰূপে অসমৰ জনপ্ৰিয় কণ্ঠশিল্পী নেকিবৰ উপস্থিতিয়ে দৰ্শকক মন্ত্ৰমুগ্ধ কৰে। অনুষ্ঠানৰ অন্তত সোণালী জয়ন্তী উদযাপন সমিতিৰ সম্পাদক অপূৰ্ব দত্ত আৰু ৰাহুল দত্তই কমলপুৰ সমষ্টিৰ বিধায়ক দিগন্ত কলিতাকে ধৰি বিহু উদযাপনত সহায়-সহযোগিতা আগবঢ়োৱা সকলোলৈকে ধন্যবাদ জ্ঞাপন কৰে।
