একেজন ব্যক্তি। কিন্তু বিভিন্ন এপিক নম্বৰত নাম আছে বংগ আৰু বিহাৰৰ ভোটাৰ তালিকাত। তৃণমূল কংগ্ৰেছে ২৪ ঘন্টা পূৰ্বে এনে কেইবাজনো ‘সন্দেহজনক ভোটাৰ’ক লৈ অভিযোগ উত্থাপন কৰিছিল। ইয়াৰ পূৰ্বে কংগ্ৰেছ নেতা ৰাহুল গান্ধীয়ে বিজেপি আৰু নিৰ্বাচন আয়োগৰ বিৰুদ্ধে এনে ‘ভোট চুৰি’ৰ বিৰুদ্ধে সৰৱ হৈছিল। এইবাৰ পাঁচখন ৰাজ্যৰ নিৰ্বাচনৰ ঠিক পূৰ্বে কেন্দ্ৰীয় বিত্তমন্ত্ৰী নিৰ্মলা সীতাৰমনৰ স্বামী অৰ্থনীতিবিদ পৰকলা প্ৰভাকৰে উত্থাপন কৰিছে বিস্ফোৰক অভিযোগ।
দুদিন পূৰ্বে দিল্লীত এখন সংবাদমেলত তেওঁ অভিযোগ কৰিছে যে ২০২৪ চনৰ অন্ধ্ৰপ্ৰদেশ বিধানসভা নিৰ্বাচনত মাজনিশাৰ পিছত প্ৰায় ১৭ লাখ ভোট ৰকেট গতিৰে নথিভুক্ত হৈছিল। প্ৰতিটো ভোটৰ বাবে মাত্ৰ ৬ ছেকেণ্ড সময় লাগিছিল! কি ‘যাদু’ৰ দ্বাৰা সেয়া সম্ভৱ হৈছিল?
প্ৰসংগক্ৰমে দুবছৰ পূৰ্বে অন্ধ্ৰপ্ৰদেশৰ বিধানসভা নিৰ্বাচনত চন্দ্ৰবাবু নাইডুৰ টিডিপি নেতৃত্বাধীন এনডিএ শিবিৰে বৃহৎ জয়লাভ কৰিছিল। ১৭৫খন বিধানসভাৰ আসনৰ ভিতৰত ১৬৪খন আসনত জয়লাভ কৰে। কেন্দ্ৰৰ প্ৰধানমন্ত্ৰী নৰেন্দ্ৰ মোডীৰ বৰ্তমানৰ চৰকাৰখন বৰ্তি থকা দুটা ‘স্তম্ভ’ৰ ভিতৰত এটা চন্দ্ৰবাবু।
কিন্তু চন্দ্ৰবাবুৰ ৰাজ্যত বিধানসভা নিৰ্বাচনৰ ফলাফল সন্দৰ্ভত নিৰ্মলা সীতাৰমনৰ স্বামীয়ে উত্থাপন কৰা অভিযোগক গুৰুত্বসহকাৰে ল’বলৈ অনিচ্ছুক নিৰ্বাচন আয়োগ। কিন্তু স্বচ্ছতাৰ সন্দৰ্ভত প্ৰশ্ন উত্থাপন হোৱাত সমগ্ৰ দেশতে নিৰ্বাচনৰ ফলাফলৰ ‘অডিট’ৰ দাবী জনাইছে প্ৰাক্তন মুখ্য নিৰ্বাচন আয়ুক্ত এছ ৱাই কুৰেশ্বীয়ে। জ্যেষ্ঠ অধিবক্তা প্ৰশান্ত ভূষনে বুথসমূহত ভোটদানৰ অভিলেখ থকা ১৭চি প্ৰ-পত্ৰ ৰাজহুৱা কৰাৰ লগতে স্বচ্ছতা নিশ্চিত কৰাৰ বাবে ভিভিপিএট স্লিপ গণনা বাধ্যতামূলক কৰিবলৈ দাবী জনাইছে।
অন্ধ্ৰ নিৰ্বাচন সন্দৰ্ভত প্ৰভাকৰৰ অভিযোগ হ’ল ৰাজ্যৰ ৩৫০০ বুথত বিয়লি ৫ বজালৈ নহয়, নিশা ২ বজালৈকে ভোটদান চলিছিল। নিশা ১১:৪৫ বজাৰ পৰা নিশা ২ বজালৈ মুঠ ভোটৰ প্ৰায় ৪.১৬ শতাংশ ভোটদান হৈছিল। নিশা ৮ বজাৰ পৰা নিশা ২ বজালৈ ৫২ লাখ ভোটৰ ৰেকৰ্ড হৈছে। ইয়াৰে মাজনিশাৰ পিছত ১৭ লাখৰো অধিক ভোট।
আটাইতকৈ আমোদজনক কথাটো হ’ল মাজনিশাৰ পিছত দুটা ভোটৰ মাজত ব্যৱধান আছিল ২০ ছেকেণ্ডৰ। কিন্তু ভোটিং মেচিনটো ৰিষ্টাৰ্ট হ’বলৈকেই ১৪ ছেকেণ্ড সময় লাগে। অৰ্থাৎ প্ৰতিটো ভোটদানত সময় লাগিছে মাত্ৰ ৬ ছেকেণ্ড। ভোটদাতাই মাত্ৰ ৬ ছেকেণ্ডতে ভোটকেন্দ্ৰত প্ৰৱেশ কৰি ভোটদান কৰি ওলাই অহা সম্ভৱনে? নিশা ৮ বজাৰ পিছত নিশ্চিতভাৱে ‘অস্বাভাৱিক’ কিবা এটা ঘটিছিল।
২০২৪ চনৰ ১৩ মে’ত সন্ধিয়া ৫ বজাত ভোটদান সমাপ্ত হোৱাৰ পিছত অন্ধ্ৰ প্ৰদেশৰ মুখ্য নিৰ্বাচনী বিষয়াই ভোটদানৰ হাৰ ৬৮.০৪ শতাংশ বুলি কৈছিল। নিশা ৮ বজাত ইয়াক ৬৮.১২ শতাংশলৈ আপডেট কৰা হয়। নিশা ১১:৪৫ বজাত আয়োগে ৭৬.৫০ শতাংশ ভোটদান হোৱা বুলি জানিবলৈ দিয়ে। চাৰিদিন পিছত পুনৰ কয় যে চূড়ান্ত ভোটাৰৰ হাৰ ৮১.৭৯ শতাংশ।
অৱশ্যে এই ‘অসামঞ্জস্য’ৰ সন্দৰ্ভত আয়োগৰ সূত্ৰই কয় যে অন্ধ্ৰৰ কোনো প্ৰাৰ্থীয়ে কোনো অভিযোগ উত্থাপন কৰা নাই। আদালতলৈ যোৱাৰ পথো মুকলি আছিল। কিন্তু ফলাফল ঘোষণা হোৱাৰ দুবছৰৰ পাছত এনে অভিযোগ উত্থাপন কৰাটো ‘অসাংবিধানিক’।
