ভাৰতীয় ক্ৰিকেট নিয়ন্ত্ৰণ ব‘ৰ্ড চমুকৈ বিচিচিআইয়ে ১৫ বছৰীয়া ক্ৰিকেটাৰ বৈভৱ সূৰ্যবংশীৰ পিতৃ-মাতৃক ভাৰতীয় দলৰ আগন্তুক শ্ৰীলংকা আৰু ইংলেণ্ড ভ্ৰমণত একেলগে যাবলৈ অনুৰোধ জনাইছে। ৰাষ্ট্ৰীয় নিৰ্বাচক মণ্ডলীয়ে নৱাগত বৈভৱক টি-২০ দলত স্থান দিয়াৰ পিছতেই ব’ৰ্ডে এই সিদ্ধান্ত গ্ৰহণ কৰিছে।
প্ৰথমবাৰৰ বাবে জ্যেষ্ঠ খেলুৱৈৰ সৈতে খেলিবলৈ যোৱা এই উদীয়মান খেলুৱৈগৰাকীৰ বাবে বিচিচিআইয়ে বিশেষ ব্যৱস্থা কৰিছে। এই ভ্ৰমণত অংশগ্ৰহণ কৰি বৈভৱে মহান ক্ৰিকেটাৰ শচীন টেণ্ডুলকাৰৰ অভিলেখ ভংগ কৰি ভাৰতৰ হৈ অভিষেক ঘটোৱা আটাইতকৈ কনিষ্ঠ খেলুৱৈ হিচাপে পৰিগণিত হোৱাৰ পূৰ্ণ সম্ভাৱনা আছে। উল্লেখযোগ্য যে শচীনে মাত্ৰ ১৬ বছৰ ২০৭ দিন বয়সত আন্তঃৰাষ্ট্ৰীয় ক্ৰিকেটত অভিষেক ঘটাইছিল।
বিচিচিআইৰ সম্পাদক দেৱজিৎ শইকীয়াই সংবাদ মাধ্যমৰ আগত প্ৰকাশ কৰা অনুসৰি, সাধাৰণতে ব’ৰ্ডে খেলুৱৈসকলৰ লগত পিতৃ-মাতৃক যোৱাৰ অনুমতি নিদিয়ে। কিন্তু বৈভৱৰ ক্ষেত্ৰত এক বিশেষ অনুমতি প্ৰদান কৰা হৈছে কিয়নো ভাৰতীয় দলে এনে এক বিৰল প্ৰতিভাক আগবঢ়াই নিব বিচাৰিছে। যিহেতু তেওঁ এতিয়াও নাবালক আৰু জ্যেষ্ঠ খেলুৱৈসকলৰ সৈতে ভ্ৰমণ কৰিব, সেয়েহে তেওঁৰ সুবিধাৰ্থে পৰিয়ালৰ লোকক লগত যোৱাটো ব’ৰ্ডে উচিত বুলি গণ্য কৰিছে। শইকীয়াই লগতে কয় যে বৈভৱৰ পিতৃ ইতিমধ্যে শ্ৰীলংকালৈ যোৱাৰ প্ৰস্তুতি চলাইছে আৰু পৰৱৰ্তী সময়ত তেওঁলোকে ইংলেণ্ড ভ্ৰমণলৈ যাব বিচাৰিলে ব’ৰ্ডে সম্পূৰ্ণ সহায় কৰিব যাতে এই কম বয়সত তেওঁ জ্যেষ্ঠ খেলুৱৈসকলৰ লগত সহজে মিলি যাব পাৰে।
বৈভৱ সূৰ্যবংশীৰ আকৰ্ষণীয় প্ৰদৰ্শনে ৰাষ্ট্ৰীয় নিৰ্বাচকসকলক তেওঁক দলত স্থান দিবলৈ বাধ্য কৰিছিল। মাত্ৰ ২৩ খন আই পি এল মেচতে তেওঁ এহেজাৰতকৈ অধিক ৰান সংগ্ৰহ কৰিছে। তেওঁৰ বেটিঙৰ শৈলী আৰু কঠিন পৰিস্থিতিত শান্ত হৈ থকাৰ ক্ষমতাই তেওঁক টি-২০ৰ অপেনাৰ হিচাপে সকলোৰে প্ৰিয় কৰি তুলিছে। নিৰ্বাচক মণ্ডলীৰ অধ্যক্ষ অজিত আগৰকাৰে কয় যে অনুৰ্ধ-১৯ আৰু আই পি এলত কৰা দুৰ্দান্ত প্ৰদৰ্শনৰ বাবেই তেওঁ নিজে নিজৰ স্থান নিশ্চিত কৰিছে।
আগৰকাৰে লগতে উল্লেখ কৰে যে বৈভৱে আই পি এলৰ প্লে-অফৰ সময়ত ৰাজস্থান ৰয়েলছৰ হৈ প্ৰায় অকলেই যুঁজ দিছিল। ইমান কম বয়সতে তেওঁৰ এনে ধৰণৰ বিস্ফোৰক বেটিং আৰু খেলৰ মোৰ সলনি কৰিব পৰা ক্ষমতাই সকলোৰে মনত আশা জগাই তুলিছে। ইংলেণ্ড ভ্ৰমণৰ বাবে ঘোষণা কৰা ভাৰতৰ টি-২০ দলটোত শ্ৰেয়াছ আয়াৰক অধিনায়ক আৰু তিলক বাৰ্মাক উপ-অধিনায়ক হিচাপে ৰখা হৈছে। দলটোৰ আন খেলুৱৈসকল হৈছে ক্ৰমে ৰবি বিষ্ণৈ, অভিষেক শৰ্মা, নীতিশ কুমাৰ ৰেড্ডী, মহম্মদ চিৰাজ, সঞ্জু ছামছন, অক্ষৰ পেটেল, হৰ্ষিত ৰাণা, ঈশান কিষাণ, ৱাশ্বিংটন সুন্দৰ, অৰ্শদীপ সিং, শিৱম ডুবে, বৰুণ চক্ৰৱৰ্তী, প্ৰিন্স যাদৱ আৰু বৈভৱ সূৰ্যবংশী।
