আলফাৰ সেনাধ্যক্ষ পৰেশ বৰুৱাই চীনৰ সৈতে অতি আন্তৰিকতাপূৰ্ণ সম্পৰ্ক বজাই ৰখাৰ কথা স্বীকাৰ কৰিছে। ‘দ্য উইক’ আলোচনীৰ ‘২ ডিচেম্বৰ ২০১৮’ সংখ্যাত আলোচনীখনৰ সৈতে হোৱা এটা আছুতীয়া সাক্ষাৎকাৰত এই কথা বৰুৱাই প্ৰকাশ কৰিছে।
তেওঁ চীনৰ কেতবোৰ কিছুমান বাধ্য-বাধকতাৰ ওপৰতো সতৰ্ক কৰি দি কৈছে যে চীনৰ সকলো কথাই মানি ল’ব নোৱাৰি। বৰুৱাই আৰু কৈছে যে তেওঁ আন আন ৰাষ্ট্ৰৰো কাষ চাপিছে। অৱশ্যে তেওঁ কোন কোন ৰাষ্ট্ৰৰ কাষ, চাপিছে সেই কথা স্পষ্ট কৰা নাই।
আনহাতে আলোচনীখনেও এই সাক্ষাৎকাৰতো ব্যক্তিগতভাৱে সাক্ষাতৰ জৰিয়তে নে টেলিফ’ন কৰি নে ইমেইলৰ জৰিয়তে আৰু কিমান দিনৰ পূৰ্বে বৰুৱাৰ উত্তৰসমূহ গ্ৰহণ কৰিছে সেই কথা স্পষ্ট কৰা নাই।
উল্লেখ্য যে ভাৰতৰ ৰাষ্ট্ৰীয় নিৰাপত্তা উপদেষ্টা অজিত ডোভালে সীমা সম্পৰ্কীয় সমস্যা সন্দৰ্ভত চীনৰ বিশেষ প্ৰতিনিধি আৰু জাতীয় উপদেষ্টা ৱাং য়িৰ সৈতে আলোচনাত বহাৰ বাবে চীনত উপস্থিত হোৱাৰ সময়তেই আলোচনীখনৰ এই সংখ্যটো গৈ পাঠকৰ ওচৰ পাইছেগৈ।
উল্লেখ্য যে পৰেশ বৰুৱাক দেশত বিচাৰৰ সন্মুখীন হোৱাৰ বাবে ভাৰতৰ হাতত সমৰ্পণ কৰাৰ বাবে ভাৰতে ইতিমধ্যে চীনক আনুষ্ঠানিকভাৱে অনুৰোধ জনাইছে।
ডোভালে ২৩ আৰু ২৪ নৱেম্বৰত অনুষ্ঠিত হ’বলগীয়া আলোচনাত বিষয়টো উত্থাপন কৰিব নে নকৰে সেই কখথা জানিব পৰা নাই।বৰুৱাই আৰু কৈছে যে এনএছচিএনৰ খাংগো কনিয়াকক সংগঠনৰ পৰা বাহিৰ কৰাৰ ক্ষেত্ৰত তেওঁ এটা ভূমিকা পালন কৰিছিল।
বৰুৱাই আলফাত (স্বাঃ) নতুন নেতৃত্বৰ প্ৰয়োজনীয়তাৰ ক্ষেত্ৰতো জোৰ দিয়ে। অৱশ্যে তেওঁ সংগঠনটোত কোনো নেতৃত্ব পৰিৱৰ্তনৰ প্ৰস্তাৱ দিয়া নাই। তেওঁ আৰু কৈছে যে শেহতীয়াভাৱে আলফাত বহুতো নতুন সদস্য ভৰ্তি হৈছে।
বৰুৱাই ভাৰতীয় প্ৰশাসনক চীন আৰু উত্তৰ কোৰিয়ালৈ গৈ দেশ দুখনৰ প্ৰগতি নিজ চকুৰে চাই আহিবলৈ উপদেশ দি কয় যে ভাৰতত গৰুৰ মাংস খোৱাত নিষেধাজ্ঞা আৰোপ কৰা হৈছে আৰু মানুহ উৎসৱ-পাৰ্বণত মজি আছে। বৰুৱাই কৈছে যে অসমৰ ৰাষ্ট্ৰীয় নাগৰিক পঞ্জীৰ উন্নীতকৰণ প্ৰক্ৰিয়াটো ভাল হোৱা নাই।
আলফাৰ সেনাধ্যক্ষগৰাকীয়ে কূটনীতি আৰু সশস্ত্ৰ সংগ্ৰাম দুয়োটাৰে পোষকতা কৰে। তেওঁ আৰু কয় যে তেওঁ শেহতীয়াভাৱে প্ৰতি মাহে বিদেশী প্ৰতিনিধিসকলক সাক্ষাৎ কৰি আছে।
ধাৰণা কৰা হৈছে যে একাংশ সংবাদ মাধ্যমে এটা পথ দুৰ্ঘটনাত পৰেশ বৰুৱাৰ মৃত্যু হোৱা বুলি দাবী কৰাৰ পূৰ্বেই এই সাক্ষাৎকাৰটো গ্ৰহণ কৰা হৈছিল বুলি অনুমান কৰা হৈছে। কাৰণ সমগ্ৰ ৩ পৃষ্ঠাজোৰা সাক্ষাৎকাৰটোৰ ক’তোৱেই এই সন্দৰ্ভত কোনো প্ৰশ্ন অথবা প্ৰতিক্ৰিয়াৰ প্ৰসংগ পোৱা নাযায়।
