বিগত পাঁচ বছৰীয়া কাৰ্যকালৰ পিচত অনুষ্ঠিত হ’ব লগা অসম বিধান সভাৰ নিৰ্বাচনত ৯৩ নং বোকাখাত সমষ্টিটোত অসম গণ পৰিষদ আৰু ভাৰতীয় জনতা পাৰ্টিৰ মিত্ৰ জোঁটৰ প্ৰাৰ্থী হিচাবে অতুল বৰাই প্ৰাৰ্থীত্ব পোৱাতো নিশ্চিত হোৱাৰ পিচত ক্ষোভিত হৈ পৰিছে বোকাখাতৰ বিজেপি দলৰ তৃৰ্ণমুল কৰ্মীসকল৷
মিত্ৰজোঁটৰ প্ৰাৰ্থী হিচাবে অতুল বৰাৰ নাম নিশ্চিত হোৱাৰ পিচতেই বোকাখাত নগৰত থকা বিজেপিৰ কাৰ্যালয় বাজপেয়ী ভৱনত তৃৰ্ণমুলৰ কৰ্মীসকল সমবেত হৈ প্ৰাৰ্থীত্বক লৈ হোৱা দলীয় সিধান্তত ক্ষোভ প্ৰকাশ কৰে৷
বিগত পাঁচটা বছৰেই বোকাখাত সমষ্টিৰ বিধায়ক হিচাবে থকা অতুল বৰাই সমষ্টিটোৰ বিজেপি কৰ্মীসকলক অৱহেলা কৰি অহা বুলিও ক্ষোভ উজাৰে বিজেপি কৰ্মীসকলে৷
আগন্তুক নিৰ্বাচনৰ বাবে বোকাখাত সমষ্টিত উমৈহতীয়া প্ৰাৰ্থী অতুল বৰাৰ বিপৰীতে বিজেপিৰ দলৰ নেতা আকাশ ফুকনক প্ৰাৰ্থীত্ব দিব লাগে বুলি বিজেপিৰ কৰ্মীসকলে দাবী উত্থাপিত কৰিছিল যদিও সেয়া হৈ নুঠাত এতিয়া ক্ষোভিত হৈছে বোকাখাতৰ বিজেপি কৰ্মীসকল৷
অতুল বৰাৰ প্ৰাৰ্থীত্বক সহজভাৱে ল’ব পৰা নাই তেওঁলোকে৷ বিগত কাৰ্যকালত আমি অতুল বৰাক বহুত সহায় কৰিছিলো, নিৰ্বাচনী বৈতৰণী পাৰ কৰি বোকাখাত বিধায়ক কৰিছিলো৷ ইয়াৰ পাচতো আমি অতুল বৰাৰ পৰা ৰাজহুৱা সহানুভুতি নাপালো৷ দলৰ নেতৃত্বকো এতিয়া আমি আস্থাত ল’ব নোৱাৰা হৈছো৷ এইদৰে ক্ষোভ প্ৰকাশ কৰিছে বোকাখাতত বিজেপি কৰ্মীসকলে৷
অতুল বৰাৰ প্ৰাৰ্থীত্বকলৈ বোকাখাতৰ বিজেপিত আৰম্ভ হৈছে দলীয় বিদ্ৰোহ৷ এনে পটভুমিত এই ক্ষোভৰ প্ৰতিক্ৰিয়া আগন্তুক বিধান সভা নিৰ্বাচনত পৰাৰ সম্ভাৱনা আছে৷ যাৰ বাবে কিছু পৰিমানে শলঠেকত পৰিব পাৰে অতুল বৰা৷
