আজি মাঘ বিহু বা ভোগালী বিহু। সমগ্ৰ অসমৰ লগতে টীয়কৰ কাকজান বামকুকুৰাচোৱা গাঁৱতো দেখা গ’ল মাঘ বিহু উদযাপনৰ পৰম্পৰাগত দৃশ্য।
গাঁৱৰ বয়োজেষ্ঠ সকলে হৰিধ্বনি দি মাঘৰ মেজি জ্বলাই সকলোৰে কুশল কামনা কৰিলে। লগতে মঘীয়া জুইৰ উম লৈ মেজিৰ কাষত ল’লে বিহুৰ জলপানৰ জুতি।
উল্লেখযোগ্য যে পূৰ্বৰ পৰা বামকুকুৰাচুৱা গাঁৱবাসীয়ে এইদৰে মাঘ বিহুৰ পৰম্পৰা ৰক্ষা কৰি আহিছে।
উৰুকাৰ নিশাৰ ভোজ ভাতৰ পাছত পুৱা গাঁৱৰ পুৰুষ-মহিলা, বৃদ্ধ-বৃদ্ধা সকলো বুঢ়া মেজিৰ তলত আধ্যাত্মিকতা ৰক্ষা কৰি সেৱা লোৱাৰ লগতে সকলোৱে মেজি স্থলীতে একেলগে পুৱাৰ চাহ জলপান গ্ৰহণ কৰিছে আৰু সকলোৰে মংগল কামনা কৰি বুঢ়া মেজিৰ তলত সেৱা লৈছে।
লগতে পঢ়ক: অৱশেষত হৰিদ্বাৰ ধৰ্ম সংসদত বিদ্বেষমূলক মন্তব্যৰ বাবে ‘অন্যতম অভিযুক্ত’ক গ্ৰেপ্তাৰ
তদুপৰি, মেজিৰ পাছতে দিনৰ ভাগত টেকেলী ভঙা, ৰচী টনা, দৌৰ, পিছল খুটাত বগুৱা আদি পৰম্পৰাগত খেলৰ প্ৰতিযোগিতাৰও অনুষ্ঠিত কৰা হৈছে।
সন্ধিয়া স্থানীয় শিল্পীসকলৰ সমাহাৰেৰে এক সাংস্কৃতিক কাৰ্যসূচীৰো আয়োজন কৰা বুলি জানিবলৈ দিছে উদ্যোক্তাসকলে।
