পঞ্চায়ত নিৰ্বাচনৰ পূৰ্বে আধাৰশিলা ৰাজনীতিৰে চমক সৃষ্টি কৰাৰ প্ৰয়াস কৰিলেও বটদ্ৰৱা সমষ্টিৰ বিধায়িকা আঙুৰলতা ডেকাৰ চমক সৃষ্টিৰ প্ৰয়াসে সমষ্টিত এতিয়া সৃষ্টি কৰিছে প্ৰতিক্ৰিয়াৰ। কিয়নো আঙুৰলতাই ২০১৬-১৭ বৰ্ষত সমষ্টিটোৰ বাটপথ উন্নয়নৰ বাবে এনৰেগা আঁচনিৰ অধীনত একেদিনাই ৪৫টাতকৈও অধিক পথৰ আধাৰশিলা স্থাপন কৰি চমক সৃষ্টি কৰিছিল যদিও প্ৰায়বোৰ পথৰে আজি পৰ্যন্ত সম্পূৰ্ণ নহ’ল নিৰ্মাণ কাৰ্য।
ইতিমধ্যে চমক সৃষ্টিকাৰী বিধায়িকা হিচাপে চৰ্চিত হোৱা আঙুৰলতা ডেকাই শেহতীয়াভাৱে স্থাপন কৰা আধাৰশিলাক লৈও ৰাইজ সন্তুষ্ট হ’ব পৰা নাই। উল্লেখ্য যে আজিৰ পৰা কেইদিনমান পূৰ্বে গড়কাপ্তানী বিভাগৰ পুঁজিৰে বিধায়িকাগৰাকীয়ে ২০টাকৈ পথৰ আধাৰশিলা স্থাপন কৰিছিল। সমষ্টিটোত ৭০ কিলোমিটাৰতকৈ অধিক পথ স্কুটী চলাই বিধায়িকাগৰাকীয়ে পথসমূহৰ আধাৰশিলা স্থাপন কৰি আন এক চমক সৃষ্টি কৰিছিল।
তথ্য অনুসৰি, ২০১৬-১৭ বৰ্ষত বিধায়িকাগৰাকীয়ে স্থাপন কৰা আধাৰশিলা সমূহৰ আজি দুবছৰৰ পিছতো অসম্পূৰ্ণ হৈ থকাৰ লগতে কিছুমান পথৰ নিৰ্মাণ কাৰ্যই আৰম্ভ নহ’ল। সমষ্টিটোৰ দলংঘাট উন্নয়ন খণ্ডৰ অন্তৰ্গত কুঁজীডাহ-জামগুৰি গাঁও পঞ্চায়তৰ জাজৰি গড়কাপ্তানী পথৰ পৰা হাতীচোং মহাবিদ্যালয়লৈ ৫০০ মিটাৰ পথ চি চি ব্লকৰ নামত ২৩.৬৪ লাখ টকা আৱন্টন দি ২০১৬ৰ ৯ ডিচেম্বৰত বিধায়িকাগৰাকীয়ে আধাৰশিলা স্থাপন কৰিছিল যদিও ১০০ মিটাৰ পথতহে চি চি ব্লক বহোৱা হয়। বাকী ৪০০ মিটাৰ পথত চি চি ব্লক বহোৱা নহ’ল।
ইফালে বিশ্ব বেংকৰ পুঁজিৰ দ্বাৰা জামুগুৰি পথৰ পৰা কুৰুৱাবাহী-মৰিগাঁও পথলৈ ৩০০ মিটাৰৰ বাবে ১৩ লাখ টকা আৱন্টন দি আধাৰশিলা স্থাপন কৰিছিল যদিও চি চি ব্লকটো বাদেই আজি পৰ্যন্ত পথটোত এচপৰাও মাটি নপৰিল।
ইপিনে সমষ্টিটোৰ নিজ হাতীচোং গাঁও পঞ্চায়তৰ পৰা এম ভি স্কুললৈ ১২০ মিটাৰ পথৰ বাবে ৬ লাখ টকা আৱন্টন দি ২০১৬ৰ ১১ ডিচেম্বৰত আধাৰশিলা স্থাপন কৰিছিল। কিন্তু নিৰ্মাণ নহ’ল পথটোৰ। একেদৰে ক্ষেত্ৰী গাঁও তিনি আলিৰ পৰা গৰীয়াপুখুৰীলৈ ৫০০ মিটাৰ পথৰ বাবে আঁচনিৰ অধীনত ১৭.৩৪ লাখ টকা আবন্টন দি ২০১৬ৰ ১১ ডিচেম্বৰতে আধাৰশিলা স্থাপন কৰিছিল যদিও আজি পৰ্যন্ত পথটোৰ নিৰ্মাণ সম্পূৰ্ণ নহ’ল।
উল্লেখ্য, যোৱা এটা মাহৰ ভিতৰত বটদ্ৰৱা সমষ্টিৰ বিধায়িকা আঙুৰলতা ডেকাই ৪০টাৰো অধিক আধাৰশিলা স্থাপন কৰি চমক দিছিল। কিন্তু পূৰ্বৰ উদাহৰণে উন্মোচিত কৰিছে বিধায়িকাগৰাকীয়ে ৰাইজক আকৰ্ষিত কৰিবলৈ স্থাপন কৰা আধাৰশিলাসমূহ বছৰ বছৰ ধৰি আধাৰশিলাই হৈ থাকে, কাৰ্যত পৰিণত নহয়। তদুপৰি বটদ্ৰৱা সমষ্টিৰ বহু পথ দলঙৰ দুৰাৱস্থাই সমষ্টিটোৰ ৰাইজক ক্ষুভিত কৰি তুলিছে।