শোণিতপুৰ জিলাৰ ঠেলামৰাৰ ভঙাশিঙৰি অঞ্চলত ৰাম মন্দিৰৰ ভূমি পুজন উপলক্ষে বজৰং দলে বাইকৰেলী বাহিৰ কৰাৰ সময়তে সৃষ্টি হৈছিল এক অপ্ৰীতিকৰ পৰিস্থিতিৰ।
খবৰ অনুসৰি বজৰং দলৰ শতাধিক সদস্যই এক বৃহৎ বাইক ৰেলী কৰি গৈ থকা সময়তে ভঙা শিঙৰি অঞ্চলত আন একাংশ উন্মত্ত জনতাই দা-যাঠিৰে প্ৰহাৰ কৰে ৰেলীত অংশগ্ৰহণ কৰা বজৰং দলৰ সদস্যক।
ইয়াৰ পাছতে এই বিষয় লৈ ছ’চিয়েল মিডিয়াত সৃষ্টি হৈছে মিশ্ৰিত প্ৰতিক্ৰিয়াৰ।
বজৰং দলৰ সদস্যৰ মতে তেওঁলোকে শান্তিপূৰ্ণভাৱে সমদল কৰি গৈ থকা সময়তে পথত বাঁহ পেলাই আগুচি ধৰি একাংশ উন্মত্ত জনতাই দা-যাঠিৰে মাৰ-পিট কৰিছিল। আনকি কেইজনমান বজৰং দলৰ সদস্যক উক্ত অঞ্চলৰ একাংশ লোকে আঠু কঢ়াই পাকিস্তান জিন্দাবাদ ধ্বনি দিবলৈ বাধ্য কৰাইছিল আৰু প্ৰহাৰ কৰিছিল বুলি গুৰুতৰ অভিযোগ উত্থাপিত হৈছে।
আনকি একাংশ উন্মত্ত জনতাই ৰেলীৰ কেইবাখনো বাইক আৰু মেজিক জ্বলাই দিয়াৰ লগতে ঘটনাস্থলীত সন্ধ্যা গৈ উপস্থিত হোৱা উপায়ুক্তৰ বাহনত শিলাবৰ্ষণ কৰি ক্ষতি সাধন কৰিছিল।
আন একাংশৰ মতে বজৰং দলৰ সদস্যসকলে ধৰ্মীয় সংখ্যালঘু অঞ্চলটোত উচ্চস্বৰে ডি.জে বজাই জয় শ্ৰীৰাম ধ্বনি দি গৈ থকাৰ বাবে অঞ্চলটোৰ ইছলাম ধৰ্মী একাংশ লোকে আক্ৰমণ কৰিছিল।
ইয়াৰোপৰি, আন একাংশই অভিযোগ কৰা অনুসৰি এখন মুছলমান অধ্যুষিত এলেকাত মছজিদৰ চৌহদত সোমাই বজৰং দলৰ সদস্যই হুলস্থুল কৰি ফটকা ফুটাইছিল বাবেই এজন বৃদ্ধ নামাজীয়ে তেওঁলোকক বাধা দিয়াত তেওঁক বজৰং দলৰ সদস্যই প্ৰহাৰ কৰিছিল। তাৰ পাছতে একাংশ ইছলাম ধৰ্মী লোক উত্তেজিত হৈ তেওঁলোকক প্ৰহাৰ কৰে।
এনেদৰেই সামাজিক মাধ্যমত বিভিন্ন ধৰণে প্ৰচাৰ হৈ থকাৰ সময়তে নিৰপেক্ষতাৰে দুটা কথা উল্লেখ কৰিব লাগিব যে ‘কিয় আইন হাতত তুলি একাংশ আক্ৰমণকাৰীয়ে সৃষ্টি কৰিলে জিঘাংসাৰ?
তথা কাৰ অনুমতিত চৰকাৰী নিৰ্দেশনাক ভেঙুচালি কৰি ঢেকীয়াজুলিত বজৰং দলে উলিয়ালে বৃহৎ বাইক ৰেলী?
এই সন্দৰ্ভত আমি সমাজৰ বিভিন্ন স্তৰৰ ব্যক্তিৰ সৈতে কথা পাতিছিলো।
এই সন্দৰ্ভত মানৱ অধিকাৰ কৰ্মী ড০ দিব্যজ্যোতি শইকীয়াই আমাৰ সাংবাদিকৰ আগত প্ৰতিক্ৰিয়া প্ৰকাশ কৰি কয়, ‘সমগ্ৰ ভাৰতবৰ্ষতে আনলক প্ৰক্ৰিয়া চলি আছে যদিও এনেকুৱা নহয় যে চৰকাৰৰ নিৰ্দেশনা ভংগ কৰি কোনোবাই ৰেলী বাহিৰ কৰিব পাৰিব বা জুম বান্ধিব পাৰিব। কালি যি ৰেলী অনুষ্ঠিত হ’ল তাৰ অনুমতি কোনে দিছিল বা অনুমতি প্ৰকৃততে দিছিল নে নাই?’
তেওঁ লগতে কয়, ‘যদি প্ৰকৃততে ৰেলী বাহিৰ কৰিবলৈ অনুমতি দিছিল তেন্তে কি ভিত্তিত দিছিল? যদি ৰেলী বাহিৰ কৰিবলৈ অনুমতি দিয়া হোৱা নাছিল তেন্তে ক’ৰ’না কালত চৰকাৰৰ নিষেধাজ্ঞাত নস্যাৎ কৰি কেনেকৈ ৰেলী বাহিৰ কৰিবলৈ পালে? ইয়াৰ এক উচ্চ পৰ্য্যায়ৰ তদন্ত হ’ব লাগে।‘
দ্বিতীয়তে যি এনেধৰণে মাৰ-পিট কৰাৰ ঘটনা সংঘটিত কৰিলে সেয়া অতি গৰিহনাযোগ্য বুলি উল্লেখ কৰি শইকীয়াই কয়, ‘এতিয়ালৈকে গম পোৱা অনুসৰি এই ঘটনা সংঘটিত কৰা লোকসকল ইছলাম ধৰ্মীয় যদিও এই ঘটনাৰ ভিতৰত কোন জৰিত আছে সেই কথা পোহৰলৈ অহা নাই। ইছলাম ধৰ্মীয় লোকসকলৰ একাংশই এই আক্ৰমণ কৰিলে।‘
তেওঁ আৰু কয়, ‘এনে ঘটনা সংঘটিত হোৱাৰ পাছত আমাৰ দৰে ব্যক্তিয়ে বাহিৰৰ ৰাজ্যৰ লোকসকলক কেনেকৈ বুজাম যে আমাৰ ইছলাম ধৰ্মাৱলম্বী লোকসকলে ধৈয্য ধৰে বা তেওঁলোক শান্তিপ্ৰিয় বা একতাৰ ডোলৰে সকলোকে বান্ধি ৰাখিব বিচাৰে। ইমানদিনে চলি অহা সম্প্ৰীতিৰ নিদৰ্শনত ব্যাঘাত জন্মিছে বা ভৱিষ্যতে বেয়াৰ দিশলৈ যোৱাৰ সম্ভাৱনা আছে।‘
‘এনেধৰণৰ ঘটনা বন্ধ কৰিব লাগে আৰু জাতি-ধৰ্ম বৰ্ণ নিৰ্বিশেষে সচেতন লোক এনেধৰণৰ সাম্প্ৰদায়িকতাৰ বিৰুদ্ধে থিয় দিব লাগে,‘-সমাজৰ সচেতন লোকসকললৈ আহ্বান জনাই শইকীয়াই এইদৰে কয়।
আনহাতে, এই সন্দৰ্ভত প্ৰতিক্ৰিয়া প্ৰকাশ কৰি সমাজ কৰ্মী মীৰা বৰঠাকুৰে কয়, ‘কালিৰ এই ঘটনাত দুই পক্ষৰে ভুল আছে। ৰামক ভগবান হিচাপে সকলোৱে মানে। ৰাম মন্দিৰ স্থাপন হোৱাত ভাৰতৰ হিন্দুৱেই হওঁক বা মুছলমানেই হওঁক অসাম্প্ৰদায়িক বা কোনেও এইটোত বেয়া পাব নালাগে। কিন্তু ইয়াৰ সমান্তৰালকৈ আৰু এটা কথা আহি পৰে অযোধ্যাত ৰাম মন্দিৰৰ ভূমি পুজন হোৱা বুলি উত্তেজিত হোৱাৰ পৰিবেশ কিয় সৃষ্টি কৰিব লাগে?’
তেওঁ লগতে কয়, ‘প্ৰত্যেকটো ক্ৰিয়াৰে একোটা প্ৰতিক্ৰিয়া থাকে। গতিকে ক্ৰিয়া কৰাৰ বাবে এনেধৰণৰ প্ৰতিক্ৰিয়া হ’বলৈ পালে। দুয়োটা পক্ষই কৰিব নলগীয়া কাম কৰিছে। ৰামৰ আদৰ্শ সহনশীল আৰু যুদ্ধৰ পৰা বিৰত থকাটোৱেই অযোধ্যা। কিন্তু অসমত যিটো হত্যা-হিংসাৰ পৰিবেশৰ সৃষ্টি কৰিব বিচৰা হৈছে ই ৰামৰাজ্যৰ পৰিপন্থী।‘
আন এগৰাকী সমাজ সচেতক ব্যক্তি প্ৰশান্ত বৰ্মণে এই সন্দৰ্ভত প্ৰতিক্ৰিয়া প্ৰকাশ কৰি কয়, ‘কোনো ক্ষেত্ৰতে আইন হাতত তুলি জিঘাংসাৰ সৃষ্টি কৰাটো কেতিয়াও নিবিচাৰো। যদি কিবা বিশৃংখল পৰিবেশ সৃষ্টি হৈছিল তাৰ নিয়ন্ত্ৰণৰ বাবে আৰক্ষী আছে বা প্ৰশাসনৰ লোক আছে। আইনৰ যোগেদি তেওঁলোকে ব্যৱস্থা গ্ৰহণ কৰিব লাগিছিল। কিছু ৰাজনৈতিক দল সংগঠনে নিৰ্বাচনৰ পূৰ্বে ইচ্যু বিচাৰি আছে, এনেক্ষেত্ৰত কোনোৱে এইক্ষেত্ৰত উচটনি দিব পাৰে। ইয়াৰ এক উচিত তদন্ত হ’ব লাগে।‘
আনহাতে, ক’ৰ’নাৰ ভয়াবহতাৰ সময়ত এনেধৰণে বৃহৎ ৰেলী বাহিৰ কৰাটো সমীচীন নহয় বুলি উল্লেখ কৰি তেওঁ কয়, ‘যিহেতু চৰকাৰে ২০ জনতকৈ অধিক লোক একেলগে সমবেত হোৱাৰ ক্ষেত্ৰত নিষেধাজ্ঞা আৰোপ কৰিছে এনে সময়ত শ-শ বাইক লৈ বৃহৎ ৰেলী কৰাতো সমীচিন নহয়। এই ক্ষেত্ৰত কোনে এনেদৰে শ-শ বাইক লৈ ৰেলী অনুষ্ঠিত কৰিলে তাৰ এক উচিত তদন্ত হ’ব লাগে।‘
